1“Chik nichäte ifwalastso, õ'tonhiphäla Judá laka reyes lhiley tä tälho n'op'itseyhay his, lhäy'e leniyatfwas lhiley, lhäy'e sacerdotes lhiley, wet lhäy'e profetas lhiley, lhäy'e iyhäj wichi tä lew'et t'at Jerusalén lhiley. 2Wet õ'tihlä häp ifwala lhäy'e iwel'a, wet lhäy'e häp katetsel, häp m'ayhay tä lhamel ihuminte wet yen lewuhuya wet iwo t'alhyajaye wet n'okwiyej. Ihichet'ala elh chik tachuma n'olhileytso wet tajänch'oye. Lhahilatpe honhat, tehlat iwoye y'amhuy tä õ'wom. 3Wet wichi tä ni'isahen, ihichela iyhäj tä kamaj iläyhiche. Mat olham oyokwesiyela lhamel honhatil tä w'enha lhamejen tä kalew'etesa, wet lhamel t'uhlach'oyek y'inhen t'at. Olham tä Lewukn'o olhämet täjtso.
Judá lheley lech'isukyaj wet Dios letasnhayaj
4“Am, Jeremías, fwenho häp wichi olham olhämetna tä ohäpe Lewuk Dios. Oyok,
Elh tä nichäthen, wet äp nephä t'at,
wet elh tä wetayej len'äyij, wet tapinhen.
5Mat amel tä oalaka wichi,
¿chipte tä lhek och'oye wet nemhit letapil?
Amel tä haw'et Jerusalén,
¿chipte tä alefwon n'ohlä?
Aletsokhiwethä m'ak tä kamatache
wet lhenhit'a atichunhayaja chik letapil n'oye.
6Olham oläte ämtes, mat isichet'a alhoho.
Ihichet'a elh chik iwo lehusek elha wet yok,
Matche tä ni'isa m'ak tä owoye.
Elhpej iwoyet m'ak tä iwoye,
tet iwoye yel'atajpej inu alhoho
tä tiyäjo n'oka'tshayaj.
7Lhek yahinya pätsaj,
tej tä atofwey lhip tä ihoye,
mat chik honaj tapinho t'at lhip tä yen lew'eta.
Wet sipup lhäy'e fwitsätaj ihanej t'at
lewhäy tä ihoye lhip elh honhat.
Mat amel tä oalaka wichi,
tek letäfwelche olhämtes.
8Amel lhäme tä lehanche m'akej
lhäy'e tä olhämtes i'amejen.
Mat lhek yahinya,
hin'ol tä lhayen lewosayej olhämtes
lhamel ichufwenhit'a amejen m'ak tä matche.
9Wet häp tä oyok,
lhamel tä ahantsesna len'äfwlhi ihihila,
tehlat iwoye itshäwet tä iselit lhamej tä õ'nayhit.
Tä lhamel ileyej olhämtes,
w'et lehanyaj ihi t'at.
10Tä mälhyej'attso,
olham oyachajiyela iyhäj hin'ol lhamel lech'efwas,
wet lhamel laka honhates lewukla iyhäj wichi.
Lhamel tä len'ohyajay ihiche
wet iyhäj tä laj len'ohyaja,
lhamel yen tichunhayaja m'ayhay
tä ikalheji m'ak tä ni'isa tä iwoye.
Wet profetas lhäy'e sacerdotes
iwoyet m'ak tä lhamel t'akanyaj.
11Tet iwoye kachawos tä nitetshana
m'ak tä iyhäj iläthen,
lhamel hiw'en m'ak tä ni'isa tä oka wichi iwoye,
wet yok, Is t'at.
12“Is t'at chik lhamel n'äfwelhpe
m'ak tä hich'atej tä ni'isa tä iwoye.
Mat len'äfwlhi ihihit'a,
ihanhiyejt'a tä iwo len'äfwlhiya.
Tä mälhyej'attso,
olham otihiyeja lewit'äyhyaj,
otan'isthiyeja iyhäj tä pajche tatäy.
Olham tä Lewukn'o olhämet täjtso.
13Olham otäyhthila oka wichi,
wet nofwila yachuyaj lhay,
wet hal'ä w'oley tamchäyhla.”
14Wet wichi yohlak:
“Isit'ak y'amälhehi täja.
Mäh n'ahoye hupuy tä takhajayhen,
tej chik n'ailänhen thayej,
Lhawuk Dios itihla n'amejen lelänyaj,
wet n'amel y'ahanej t'at
tä lhach'isukyaj tä tamenej
tä iyäyen n'amejen inät tä n'ot'ilek ihi,
tsi häp tä y'attayhlä Lhawuk.
15Wet y'aniwhihläk lhatamsekis ihi,
mat newache m'ak chik is.
Wet y'aniwhihlä lhachesyaj,
mat tanhoch'aype honhat.
16Nech'e nekhen t'at lhatayhfwas,
näme hupuy tä Dan tä itafwojyhiye.
Wet y'alätlä lew'utey yel'atas pakas
tä õ'nuyenche alhoho.
Tä y'iphen, tet iwoyek honhat w'ahu.
Wichitso näm tä iwasthi lhaka honhat
lhäy'e nilhokej m'ak tä ihi.
Itäyhthila hupuy wet ilänla wichi tä ihiche.”
17Lhawuk lhämet yok:
“Ochenla amehen amlhätas
tä n'ot'ilek ihi häpkhilek ayokwajen,
wet ihichet'a elh chik ihanej chik ifwihthen.”
Jeremías lefwitajayaj iyeji wichi
18Jeremías yok:
“Matche tä ilänn'o otichunhayaj,
lecha ihihit'a, wet ohusek nemhit takhajay.
19Pitsaje wichi lepakas tä äytesiche
tä nilhokpe honhat tä yok,
¿Hä Lhawuk nemhit ihi Jerusalén?
¿Hä nemhit niyatej?”
Nech'e Lhawuk nichulho tä yok:
“¿Chipte tä amel lewäkwyhayenn'o
tä len'okwiyej n'ocheyälis
tä häpe dios lhayis tä w'enha lhamejen
tä m'ak nitälhaye?”
20Tefwaytshi yachup wet nofw tä õ'lanhi yachuyaj,
wet ihichet'a n'amel lhafwayhyaj.
21Wuj tä op'elitsaj, otn'isej t'at wichi.
Tet iwoyek honatsi in'o'pe
wet matche tä ilänn'o otichunhayaj.
22¿Hä nemhit iche lecha tä ihi Galaad?
¿Hä nemhit iche elh tä ichesthen wichi?
¿Chipte tä nichesahen lhamel?
