Job 10

₁“Oy'elej on'äyij.

Ofwelphä m'ak tä äytajchehen

tä ihi ohusek tä tapay.

₂Oyok, ¡Dios, yej lhen otesa!

¡Fwel at n'oho m'ak tä letiyej n'ohi!

₃¿Hä lhen at isa tä lelhaklitn'o?

¿Hä let'ulhann'o tä ohäpe enek,

nemhit leneytse n'oyej,

wet lhen akäjyaja wichi tä ni'isahen lakeyis?

₄¿Hä tä letetshan m'ak,

tet iwoye hin'ol tä fwetaj

itetshan m'ak at che häpe?

₅¿Hä aka ifwalas tet iwoye hin'ol laka ifwalas,

wok aka nekchämis tet iwoye wichi lakapes?

₆Tä mälhyejtso,

¿chipte tä let'ukwepej och'isukyaj,

wet leyahinch'oye m'ak tä ni'isa tä in'ohi?

₇Lehanej t'at tä laj otesa

wet äp newache elh che ifwayhatn'o amej.

₈“Akwey tä yenlhin'o,

¿wet äp letäyhthilan'o?

₉Tichunlä tä letech'ayen n'oyej

iyhät tä lhenlhin'o,

¿wet äp lhachajohla tä lhen n'oye honhat mok?

₁₀Letech'ayen n'oyej t'os

tä pajtha isop'anhi pajtha äp t'un.

₁₁Lew'uyyen n'ohi ot'äj wet ot'isan,

wet äp lepätsin n'oyej osätäy wet olhiley.

₁₂Lew'en n'oho ow'atshancheyaj wet lep'altsenn'o,

wet matche tä let'u n'oye.

₁₃Mat nech'e ohanej tä iche

m'ak tä tumchä tä ihi achowej,

₁₄tsi häp tä letetshan'atn'o

che owon'aj och'isukyaja,

häpkhilek leti n'oyej otes.

₁₅Che otes ihi, wet ottäy t'at,

wet che ois alhoho, okäjyaj ihihit'a,

tsi laj on'ohyaja wet matche tä olhakli ihi.

₁₆Che olhaikhajyen, atet iwoye

t'owalhaj tä ichowalh n'oye,

wet lhäy'e lhip tä letatayej n'ohlä

m'ayhay tä äyteschehen tä lewoye.

₁₇Lhäy'epej lhip awäk tä leti n'oyej,

yachajopej tä lenu n'oye,

tet iwoye nifwotaj tä nileyayej tä iwo laka'tshayaja.

₁₈“¿Chipte tä letach'anlhaye tä oiche p'ante?

Isi p'ante t'at che n'am newche,

häpkhin'ek õkniw'enhiyetn'o.

₁₉Tehin'et iwoyek õ'tälhet n'oho oko kachowej

wet õ'that n'oho n'ot'olis.

Häpkhin'ek niwoyat täjche hiw'en n'o'pe.

₂₀Tä nipitaja ow'atshancheyaj, wo otamseka,

ch'anlhaye tä owoyej lhame lhimphaj otamsek,

₂₁tä kamaj n'am nek che ohoye

honhat tä honataj ihi wet otpinhit'a.

₂₂Häpe honhat tä nikalelhäja m'ayhay tä ihi.

Tej che isi i'pe, mat kamaj ichalajchä.”