Job 16

₂“Pajchepej olätchehen m'ayhay tä tehentso.

Amel lep'altsenhit'an'o

wet äp lech'atay n'oyej tä lelhaklitn'o.

₃¿Hä lepes ihichet'a ämtes

tä m'ak nitälhaye tä tet iwoye leyalh?

¿Chi lewoyaye tä lechulhay n'oho?

₄Che i'amejen m'ak tä in'oyej,

olhämtes tehin'et iwoye

amel ämtes tä lewoyej n'oye.

Oaihowatshanhihenn'e t'at,

tek oneytsehiyejn'e amehen olhämtes,

₅häpkhin'ek yachajo tä akhajyhayaj ihi

wet nemhit äytaj atichunhayaj.

₆“Che oyämlhi, lechahit'a tä olhailät.

Che oyok tam, äp n'up'atthiya t'at m'ak tä äytaj.

₇Dios ihämit okhajyhayaj,

wet iso n'oyej ot'unfwas tä ihuminn'o.

₈Hip'o n'ohi, ifwel n'ohomche wichi iyhäj.

Wichi hiw'en tä olopen,

wet yäme tä fwetaj otes ihi.

₉Dios lhaitech'aynej itshäwet tä fwitsaj,

tatey ilän n'oye tsi yenn'o letayhfwaya.

Ipitsente letsotey n'oyej,

inu n'oye wet iwo olhipeya.

₁₀Wichi lhaihut n'oyej wet iläkwlhin'o,

lhamel ipäjwethä och'alos.

₁₁Dios inachaj n'oye wichi tä iwoye m'ak tä ni'isachehen,

wet iti n'ohi takweyey.

_12-13Tä otamsek ihi, wet itsok ow'o,

tafwom n'oyej wet iwo olhipeya.

Tiyäjlhi n'oyej lech'ähal

wet iwasthi ot'isan,

tsi hip'altsenhit'an'o.

₁₄Yachajopej tä iwo olätshaya,

tet iwoye n'oka'tshayajwo tä inu n'oye

wet ihichäjlhi n'oyej lehun.

₁₅Otw'uyhi ow'uy tä yelajpe,

wet olhetek y'uyhot honhat mok.

₁₆Ottey t'ukwahen tä otafwyalhi,

wet äp ottelhoy ipelajen,

₁₇tej tä n'am wo m'akayej oelh thayej,

tajlhamet ot'alhyaj tä ts'ilak.

₁₈“¡Honhat, yej tajänlä ot'änyaj!

¡Yej p'o n'o'pe, pajla'tha n'äl tä laj otesa!

₁₉N'älej tä iche elh tä ipuleye

tä tach'otla n'oye wet yämhilhila n'o'pe.

₂₀Ikalelhthihola Dios otichunhayaj,

häpkhilek hiw'en olhafwyhayajay.

₂₁Tahuyhla n'o'pe tä ihi tä Dios tatache,

tet iwoye hin'o tä tahuype elh.

₂₂Nekchämis tä niwuja

tä tatäy n'oyej tefwayhitshila,

wet onuhikwela on'äyij tä n'am tapinhila.