Job 17

₁“Tä oyalh nofwphä,

ow'atshancheyaj yiklhayet lepes,

op'itsekw'et wak'alh.

₂Wichi tä in'oyej ts'ilak t'at aläkwyhantses,

ow'en t'at tä iti n'oyej lefwitseyaj.

₃“Dios, is che am tä lewo han'äyeka

tä hin'äype otes tä õ'ti n'oyej,

tsi niwoyat täjche tach'ot n'oye.

₄Lhäm tatsufwel letichunhayajay,

häpkhilek nikalha n'ohi.

₅Elh tä õtispe t'isufwkanyaj tä itiyej lepuhfwas,

laha häpkhilek leles nichuyuhen.

₆Wichi lhämtes tä iti n'oyej

häpe t'at leläkwyhanyaj,

wet äp ifwats'unpe ottey.

₇M'ak tä olät y'omathen ottelhoy,

wet matche tä olopen,

ot'isan nemhit lehupel ihi.

₈Wichi tä isen che hiw'en tähestso,

wuj tä leselthayaj ihi,

tawäkwäyhen wet yok,

Hin'oni lajit t'ekhahyaja.

₉Mat oyok, elh tä iwoye m'ak tä is

ilehichet'a len'äyij tä is alhoho,

wet elh tä lajit lakeya

t'aylhatshi t'at lehusek khajyhayaj.

₁₀Mat amel lhokayej tä leho kana,

ihichet'a elh amel che ahantsaj.

₁₁“Tefwachetshi ifwalas tä oläyhi,

wet olhetnhayajay tatäylhin t'at.

₁₂Amel letech'ayen ifwalayej honatsi.

Tej tä ichalajchä,

mat lhoyaykwe, Ifwalahlä.

₁₃M'ak tefwaji tä oniwhihlä häpe t'at ot'ilek,

häpkhilek omäyej at katsi honataj tä wuj.

₁₄Tseyhayw'etes tehlat iwoye olhokwey,

wet iwos tehlat iwoye opuhfwas.

₁₅¿Chi tä ihitso oniwhayaj?

¿Chi tä ihitso otamsek?

₁₆Oniwhayaj lhäy'e otamsek nekhila n'okwe

che otiyäjo tseyhayw'etes,

pajla'tha ohonhat mok.”