Job 29

₂“Is t'at che oyäple ifwalaste

Dios t'amaj n'oyej nilhok lewhäy,

₃täjte lham tet iwoye ochäkw

tä ihutun n'o'pe tä ow'elekhilhi honataj.

_4-5Is t'at che oyäple ifwalaste nech'e othaläkw

tä Dios tä laj tumfwaya t'uyepej ow'et.

Ifwalasmhajtso lham in'oyej,

wet oles iwopej ot'unfwaya.

₆Wuj m'ak tä ow'ente,

wet aceite tälhomche tachenhas tä tuntey.

₇Täjte ottayphäpej tä oiyej wichi

tä lhaihutwek tä ihi hupuy,

₈häp mamses tä hiw'enn'o lhayämetchetshi

wet thänhäy nechephä wet takasthen.

₉Hin'ol tä lahal ihi ileyej tä yämwethä

wet itiche'pe lak'as takwech'ol.

₁₀Niyatey nifwitsenayejen lepakas,

ithathomche lak'ajlhich'ul lak'ajch'ol.

₁₁“Ifwalasmhajtso wichi

tä hiw'enn'o wok ilät n'oye,

iwujyen n'oyej lakäpfwayajay

wet yok, Is hin'ona.

₁₂Tsi ofwayhtej lep'altseyaj

p'elitses tä t'än och'oye,

lhäy'e chipenhas tä niwoya täjche t'uye.

₁₃Elh tä tawit'äy lakäjyaj tälh n'oye.

Och'otyaj tä otiyej tesalis häpe lakäjyaj.

₁₄Häp m'ak tä is alhoho häpe op'ot

nilhokej lewhäy lhäy'e ifwalaspej.

₁₅Ohäpe asnam telhoy

wet ohäpe tsufwlaj pach'ol tä yikejpej.

₁₆Wichi tä iwatlä m'ak tet iwoyek lajchan'o,

wet honhat elh lheley ispej n'oyej.

₁₇Otäyhthen lakhajyhayajay häp wichi

tä iwoye m'ak tä ni'isachehen,

wet osoyej lelänhay takweyey.

₁₈“Otichunhayaj yomhajkwe,

Oka ifwalas wujla'pey,

tehlat iwoye holo tä wuj.

Che othaläkw, op'itsek ihihlat ow'et.

₁₉Otet iwoye hal'ä tä tälhpe inät,

wet iyas nitsäypejpe lhachal tä honatsi.

₂₀Owujyaj nech'ehipej,

okhajyhayaj nipajiyahit che tatäyhla n'oyej.

₂₁“Wichi tach'ahumhaj n'oye,

lhamel yok tam tä tach'ahuye ochufwenyaj.

₂₂Tä oleyej tä oyämlhi,

niwohiyat täjche nichulhche.

Olhämtes nitonlha'pe lhamel,

₂₃wet lhamel niteläjwethä,

tet iwoye tä niteläjlä pelhay tä nahayhos.

₂₄Tä ok'aj t'ischeyhi,

iwetya tä imatitche.

Lhamel akäjejlhi tä hiw'en

okäjyaj tä i'pe ottey.

₂₅Oti'pe on'ohyaj lhamel,

ofwenho m'ak tä lhamel iwoyepej.

Otet iwoye niyat tä ichunlä laka nifwotaj,

wet okhajyenhen lhamel tä lefwitajayaj ihi.