Job 30

₁“Mat athana mamses t'ischey n'oyej.

Häpehen wichi tä lajchalis w'et m'ayhay t'at,

nits'ilakhiyat che op'ajthiyejn'e

asinhäs tä oy'uhyene oläy tson'atas.

₂Niwohit m'ak tä oisej

che tälhe hin'oltso

tä nem lakhajyhayaj ihi takweyey.

₃Lhamel lep'altseyajay ilän nehläsejen,

wet tä honatsi lhamel ilanche

hal'äy fwettsil tä tamchäy

tä iche ts'anis wet yets'äjchehen.

₄Itonhiche hal'äy w'atshan tä tapay,

y'isej lefwettsil wet tuj t'at.

₅Häpe t'at wichi tä n'ot'ulhnhay,

õ'tech'aynej etantses tä õt'änpe tä õ'wenej.

₆Yen w'etesa chowhay

wet tachenhas tä tafwochechufwi tä tuntey.

₇T'änhitwethä m'ak tä yelaj,

wet ilethanchechufwi hon'al.

₈Häpe wichi tä m'ak nitälhaye,

w'et ichehen t'at,

õyokwes'atch'oye honhat tä yen w'eta.

₉“Athana lhamel leles

t'ischeywethä n'oyej tä iläkwlhin'o.

₁₀Lhamel pajtha ifwats'unpe ottey tä y'ulhann'o,

wet nech'e lhaitonte n'ohlä.

₁₁Tä w'et om'ayek t'at wet laj och'otyaja,

lhamel ifwunhit'a n'oye.

₁₂Lhailhokon n'o'pe tä inu n'oye

wet ithatn'o katsi.

Lhamel t'uhläk ilänn'o.

₁₃Hip'ohi on'äyij tä t'uhläk ihämitn'o,

wet niwohiyat täjche ifwoneje täjtso.

₁₄Tet iwoye sip'äl tä ifwoynho

n'olafwek tä tuntey wet tiyäjche,

lhamel inu n'oye wet wes n'o'pe.

₁₅M'ak tä hich'atej tä ni'isa nichät n'o'pe.

On'ohyaj ile n'oyej,

tet iwoyek leyalhtas ichäj,

wet otamsek yik n'och'oye,

tet iwoye pule tä wey'ä.

₁₆“Nemhit oyenek oläyhihila,

tsi olhaklis lhayen hin'oya n'oyej.

₁₇M'ak tä olät tumchehen olhiley,

ilehiyejt'a tä nichätlha n'o'pe tä honatsi.

₁₈Dios itsok ow'o,

wet lakhajyhayaj isichätchephä oka wiley.

₁₉Ithat n'oye iyhät,

itech'ayen n'oyej honhat mok.

₂₀“Dios, ot'än hach'oye

wet kachulhat n'oho,

olhaip'altsen ame

wet katach'ahuyat n'oye.

₂₁Aka'tshayaj leti n'oyej,

wet lehänyenlhi n'oyej awäk.

₂₂Lene'tek leyalhtas ichäjphän'o

wet äp inät tä yafwuteji isichät n'ohi.

₂₃Ohanej t'at tä lehän n'oye ot'ilek,

häp lhip tä õ'näyhlä

wichi tä kamaj iläyhiche.

₂₄Am lew'ennaj tä ot'uyehenpej p'elitses

wet ofwayhtej lewit'äyhyaj tä iyejpej.

₂₅Am lew'ennaj tä oy'äyenpej

iyhäj tä leteläythayaj ihi,

wet op'altsenpej iyhäj tä iwatlä m'ak.

₂₆Oniwhilhi m'ak tä is,

wet näm at m'ak tä ni'isa.

Oniwhilhi isi,

wet honatsi t'at tä nichät n'o'pe.

₂₇“Ot'otle iläfwel nilhok lewhäy.

Lajla lepesa ifwalas tä olhaklis iche.

₂₈In'oyej ofwitajayaj,

ifwala hutunek nehiyat n'o'pe.

Olhoknej tä ot'alheje lech'otyaj.

₂₉Tet häp che opuhfwas m'awolis,

che äp ot'unfwas t'at wänlhäs.

₃₀Ot'äj ichalaj t'at,

tsi ot'inhayaj tä y'ajlha n'oho

häp tä hip'o.

₃₁N'ofwolis lepakas tä ischehen

welan at n'olhafwyhayaja.