Job 8

₂“¿Chihlatek leleyej ämtes tä tehentso

tä tet iwoye leyalh lhayis tä äytesiche?

₃¿Hä Dios ichofwnhat m'ak tä is alhoho?

¿Hä lham tä laj tumfwaya

inuhattshi m'ak tä matche?

₄N'älej tä ales tä iwoye lech'isukyajay wet tatayhlä Dios,

wet häp tä is alhoho tä lham itiyej lewit'äyhyaj.

₅Ukwe Dios wet ap'altsene

lham tä laj letumfwaya.

₆Che ahäpe elh tä is alhoho wet lajit akeya,

lhaikhajyenla wet inech'aynhihila m'ak tä lew'en.

₇Wet tej tä wuj m'akmhaj i'amej,

mat tehlat iwoye m'ak tä lhämsaj,

tsi m'ak tä imälhhen tä i'amej

lhäy'ehila lhip tä wuj.

₈“Achufwenej m'ak tä iyej lhatetsel

lhäy'e lhamel letäfwnhayaj p'ante.

₉N'amel n'anech'ehen t'at,

m'ak n'ahanhiyejt'a,

tsi lhaka ifwalas tä y'ehi

tet iwoye hupel tä nit'una.

₁₀Mat lhatetsel aichufwenla,

wet ifwenla amho m'ak tä matche

tä tälho lechowhal.

₁₁“¿Hä lhaichiyhelit äyel che newahi inät?

¿Hä lhaichiyhelit tuskal che newawhäye inät?

₁₂Tej tä õknistahen

wok tej tä w'atshanhen,

che inät newachufwi

ichun tä tamchäyhen,

tä kamaj hon'al iyhäj n'ilahen.

₁₃Mälhyejentso lhamel tä iwoye m'ak tä ni'isachehen,

häp lhamel tä hip'ethetlä Dios.

Tehentso leniwhayajay, nofwej t'at.

₁₄Lhamel t'ekhahyaj t'unhit'a,

wet leniwhayaj tet iwoye chohot kaniyäkw.

₁₅Che fwetaj itsokche, nit'unhiyalhi t'at.

Tej che lhaithatpe, lechahit'a.

₁₆Wichi tä iwoye m'ak tä ni'isachehen

tet iwoye hon'al tä ifwala hip'e'pe

tä lhaichiyhelthen tä w'awulho n'olafwek.

₁₇Lefwettsil yiklhachetshi

pajtha hits'ulhakejwethä tuntey

wet äp satejen.

₁₈Che iche elh tä itonhiche,

ihichet'ala elh tä ihanej ihi

lhip tä ihit'apmhaji.

₁₉Tä nem iche,

wet iyhäj hon'al tä tälho lew'et n'aji.

₂₀“Dios iwomhit'a elh tä is alhoho,

wet tek tach'ote wichi tä iwoye m'ak tä ni'isachehen.

₂₁Lham yachajila ame ascheyhyaj,

wet äp let'änla tä akäjyaj ihi.

₂₂Mat atayhfwas taw'uyhihila len'äfwlhi,

wet wichi tä ni'isahen lew'etes wasihichela t'at”