Joel 1

₂Lhek ch'ahu n'oye,

amel tä ahin'ol tä thänhäy,

lhäy'e nilhokej amel tä haw'et honhatna.

¿Hä lew'en m'ak wit'äyhyaj tä te iwoye täja?

¿Hä iche p'ante m'ak tä mälhyejna?

Ihichet'a.

₃Is chik amel lefwenho häp ales,

wet häpkhilek lhamel ifwenho leles,

pajla'tha nichäte lepes lheley.

₄Chol tuj t'at m'ak tä nech'e,

wet m'ak tä iyhäj imälhthi

äp nämhen iyhäj chol wet tuj,

wet noj yachuyaj.

₅¡Amel tä aw'oknhas, yahinchephä!

¡Tä lehumin tä leyäyayej hat'es,

änhen wet afwchehchä,

tsi häp uva t'i õ'so amejen!

₆Tsi chol tiyäjo oka honhat,

tet iwoye nifwotaj tä wujtaj'atpey

wet lakhajyhayaj ihi.

Wet letsotey tet iwoye häp t'owalhaj tsotey.

₇Wet olhamel ochumtes noj t'at,

häp uva lhilechat noj,

lhäy'e higos lhiley nojchehen, ts'ilakchehen,

tsi õtuj häp t'ähes

tä imälhewek hal'ä lhäy'e lhachal.

₈Afwchehchä amel, tet iwoye atsinha

tä taw'uyhi wesaj tä yelaj

wet y'äyenche laka'is tä ileyej honhat.

₉Mälhyej'attso tä lhafwyhayaj ihi sacerdotes,

häp lhamel tä tach'ote Lhawuk lechumet.

Tsi häp tä hiw'en tä nits'ilakhiyat

hat'es lhiphaj wok yachuyaj lhayhas

chik ichufwi Lhawuk Lew'et

yämthilek yen t'awayhata.

₁₀Lewit'äy ihi yachuyajw'etes,

wet honhat ichalajphä tet iwoye atsinha tesa.

Trigo tatäy wet y'im uvas t'i,

lhäy'e olivos t'i y'im t'at.

₁₁Amel tä lew'en achumtes tä noj,

afwchehchä tä nichät atape awit'äyhyaj,

tsi noj t'at akäs wet yachuyaj tatäy.

₁₂Wet uva lhiley tamchäy,

lhäy'e higos lhilechat,

äpte fwitsuk tamchäy,

lhäy'e nilhok hal'äy tä ihi tayhi,

wet wichi nemhit lakäjyaj ihi.

₁₃Sacerdotes, amel tä letach'ote oka Dios lechumet,

w'uyhiche haw'uyis tä yelaj

wet afwchehchä nilhok honatsi,

tet iwoye m'ak chik lelät.

Tsi lehanej tä aka Dios Lew'et

nemhit iche häp hat'es wok yachuyaj lhay

chik lhen t'awayhata.

₁₄Änehen wichi yämthilek lhaihute Lhawuk

wet lhaichuyhathen tä ihi tä tatache.

Änehen hin'ol tä thänhäy,

lhäy'e nilhokej wichi tä ihi honhat,

yämthilek lhaihuthiwek

häp Lhawuk Dios Lew'et,

wet änch'oye häp lham.

₁₅¡Lhawuk laka ifwala atott'a alhoho!

¡Häpkhila lewhäy tä äytaji,

tsi Lhawuk tä laj letumfwaya

itonla alhoho lhawit'äyhyaj!

₁₆Nemhit iche m'ak chik õyen t'awayhata Lhawuk

tsi õ'sonaj n'amejen,

wet noj n'okäjyaj tä ihi lhaka Dios Lew'et.

₁₇Y'inhen häp yachuyaj lhoy tä õ'tihiche lewhay,

wet wasiche n'okapuchehis,

nemhit lechumet ihi,

tsi tatäy yachuyaj.

₁₈Y'ipwethä häp w'asetas

tä t'ukwe huphas tä newache,

lhäy'e häp tson'atas tä laj lhäka,

elhpej y'ilejlhi häp nehläs.

₁₉Am t'at, Iwuk, tä ot'än hach'oye,

tä ow'en itäj tä iwunhomche häp hup

lhäy'e nilhokej hal'äy tä ihi tayhi.

₂₀Y'aje itshätäy tä tayhi lheley

tä t'än hach'oye,

tsi häp tä inätw'etes y'imche,

wet itäj hip'o t'at huphas tä i'pe honhat.