Josué hiw'enhomche Israel lhayis häp honhat tä Canaán
1-2Athana oyäme häp honhates tä Israel lhayis iyhäj lhayen p'ante lewuhuya tä ihi honhat tä Canaán, häp tewok Jordán lhip tä tumej kaphä. Häp sacerdote tä lhey Eleazar, lhäy'e Josué, lhäy'e wichi laka niyatey, lhamel hiw'enhatejen honhatestso häp wichi tä tälhehen letetsel tä ihi nueve, lhäy'e lechowej Manasés laka wichi, yämthilek lhayen lewuhuya. Wet m'ak tä Eleazar iwoye, tafwomej tunteyhas, wet wichi chik õtajej honhat chik häpe, lewuk t'at, mälhyej Lhawuk lhämet tä ifwenho p'ante Moisés tä ne'tek õ'woye.
3-4Tsi Moisés pajche hiw'enho Rubén laka wichi lhäy'e Gad laka wichi häp honhates tä tumej Jordán lhip elh, lhäy'e lechowej elh häp Manasés laka wichi. (José leles p'ante Manasés lhäy'e Efraín, iche laka wichi tä tälhe lhamel.) Mat häp Leví laka wichi tek õhw'enhomche honhates. Tajlhama tä õhw'enho hupuy yämthilek ihi, wet õyachaje yämthilek iwo lelafweya lhäy'e tä ichihelit w'asetas, tson'atas lhäy'e kayla lhayis.
5Israel lhayis hiw'en lhamhomche honhates mälhyej tä Lhawuk ne'tep'antek Moisés ifwenhomche lhamel yämthilek iwoye.
Õyachaje Caleb honhat tä lewuk
6Tä ifwala elh p'ante tä Israel lhayis kamaj ihi Gilgal, wet wichi tä tälhe letes Judá lhamel ihoye Josué yämthilek yämhoplhi. Wet Caleb, häp hin'o tä lhey Kenaz leles tä lepes lhele elh tä häpe Jefone lhäs, lham tahuyej Josué wet yok:
–Am lehanej t'at Lhawuk lhämet tä ifwelte amho wet äp ifwelte n'oho tä tahuyejte lakawo Moisés täjte y'ehi Kadés-barnea. 7Olham ow'ente cuarenta nekchämis tä Moisés ichenn'o tä otälho Kadés-barnea tä ne'tek otetshan honhat. Wet tä oyäplehte, ofwenhohte m'ak tä ow'en. 8Matkat hin'ol tä nek n'okwe, ikhajyenhit'a wichi letichunhayaj mat inhoch'ayenchehen lhämtes. Mat olham olehiyejt'a Owuk Dios. 9Tä mälhyejtso, Moisés hit'unhatche lhämet tä ifwel n'oho tä yok, “Häp honhatn'aj let'äspe, alewukla t'at, lhäy'e ales tä lepes lheley yämthilek tiyäj'attsiy, häp tä lelehiyejt'a Lhawuk Dios.”
10“Wet athana lew'en tä Lhawuk ichätyen n'oye fwalasna, yäm pitaj ow'atshancheyaj, mälhyej lhämet tä iwoye. Athana tajyäme cuarenta y cinco nekchämis tälhe täjte Lhawuk ifwenho lhämet Moisés tä Israel lhayis inukwe ts'anis. Tä mälhyejtso, athana nech'e ow'en ochenta y cinco nekchämis. 11Mat kamaj wuj tä otkhajay, hätet iwoye ifwalahte Moisés ichenn'o tä t'uhläk otetshan honhat. Okhajyhayajte in'oyej ifwalas tä oyämetso kamaj häpe t'at tä in'oyej athana, wet okalhi t'at chik olunlhi, otiyäjomche honhates yämthilek owo oka'tshayaja.
12“Häp tä tamenej tä ot'alh ame athana yämthilek lew'en n'oho honhat tä chenhas ihi tä Lhawuk ifwelte n'oho tä hiw'enla n'oho. Lehanej t'at tä gigante tä lhey Anak leles tä lepes lhele, häp tä yen w'eta. Wet häte iche hupuy tä wus, wet n'olafwey tä õyen lep'ota elhpej lhäy'e lhip tä tach'opwayhen wet lhäy'e lhip tä t'un. Mat chik Lhawuk ihla n'oyej, oyokwesila wichitso, mälhyej tä pajche ifwel n'oho.”
13Tä mälhyejtso, Josué takäpfwaye Caleb wet hiw'enho Hebrón yämthilek laka honhat t'at, lhäy'e leles tä lepes lhele. 14Wet häp tä Hebrón nech'e lewuk t'at häp Caleb lhäy'e leles tä lepes lhele yäk nichäte ifwalasna. Tsi Caleb ilehiyejt'a tä yen Lewuka häp Israel laka Dios. 15Häp Hebrón lhey tä pajche Kiriat-arba, tsi gigante leles elh tä letoyaj ihi tä lhey p'ante Arba, häp tä lew'et p'ante.
Tä tajyäme täjtso, letamsek ihi t'at wichi tä ihi honhat.
