Jos 15

₁Häp tähesna honhates tä õhw'enhatej p'ante wichi tä tälhe letes Judá: Línea tä lepes taje t'at honhat tä Edom lepes, wet línea tä tumej tapinhiye taje t'at honhat tä ts'anis tä lhey Zin. ₂Wet línea tälhe Lewomekitaj Nosoy lhip tä tumej tapinhiye, ₃wet tataye lhip tä fwala y'uy wet ifwache chenaj lhip tä lhey Chitsomw'et. Tälhe täja tiyäjo ts'anis tä Zin wet taje hupuy tä Kadés-barnea lhip tä tumej tapinhiye. Wet ifwache Hesrón wet inuhiphä chenaj pajtha nichäte Adar, wet hits'ulhakej tä tiyäje Karka. ₄Tälhe täja línea nichäte Asmón, wet inukwe tewok lhäsaj tä tumejlä Egipto wet nichäte lewomekitaj Mediterráneo, wet lepes. Häp täjtso línea tä tumej tapinhiye.

₅Wet línea tä tumej hichä inukwe tä Lewomekitaj Nosoy yäk nichäte lhip tä tewok Jordán tiyäjo. Wet línea tä tumej tafwojhiye tälhe täja ₆wet tiyäjche tä Bet-hoglaye. Tälhe täja tiyäjche tä Bet-arabaye lhip tä tafwojhiye yäk nichäte Bohán Kachenaj. Bohán häpe Rubén lhäs p'ante. ₇Tälhe täja tiyäjche chenhas kawayhi tä lhey N'owit'äyhyaj wet äp tiyäje Debir. Tälhe täja tataye Gilgal tä tatayhlä chenaj lhip tä tumejlä Honhatchät tä ihi lakawayhi lhip tä tumej tapinhiye. Tälhe täja tiyäjche Fwala Kahits'ifwik lhip tä inät ihi pajtha nichäte En-rogel. ₈Tälhe täja tiyäjche tä chenhas kawayhi tä lhey Ben-hinom, tumej chenaj tä lhey Jebús lhip tä tapinhiye, wok oyok, Jerusalén. Tälhe täja tiyäjpe chenaj tä tumejlä lakawayhi tä lhey Hinom lhip tä tumej kaphä, tä äp Refaím lhip tä tumej tafwojhiye, ₉pajtha nichäte inät tä ihi Neftoa. Tälhe täja pajtha nichäte hupuy lhayis tä i'pe chenaj tä lhey Efrón, wet tiyäjche hupuy tä lhey Ba'ala, wok oyok, Kiriat-jearim. ₁₀Wet líneatso tälhe Ba'ala, tiyäjche lhip tä tumej kaphä pajtha nichäte chenaj tä lhey Seír. Wet ifwache tä Kesalón, häp chenaj tä lhey Jearim lhip tä tumej tafwojhiye. Tälhe täja línea inuhihchä pajtha nichäte hupuy tä lhey Fwala Wukwe, wet tiyäjche Timna. ₁₁Wet tälhpe chenhas wet tiyäjche hupuy tä lhey Ekrón lhip tä tumej tafwojhiye. Tälhe täja tataye hupuy tä lhey Sikrón wet tiyäjche chenaj tä Ba'ala. Tälhe täja tiyäje Jabneel wet nichäte lewomekitaj Mediterráneo, wet lepes.

₁₂Tä mälhyejtso, häp honhates tä õhw'enho Judá laka wichi, lepes tä tumej kaphä häpe t'at lewomekitaj Mediterráneo.

₁₃Josué hiw'enho lhip honhates tä lewuk Judá laka wichi häp Jefone lhäs tä lhey Caleb. Mälhyej tä Lhawuk ne'tek õ'woye, wet hupuy tä hiw'enho Caleb häpe t'at Kiriat-arba, wok oyok, Hebrón, tä häpe gigante Anak leles tä lepes lheley laka hupuy tä lhamya. ₁₄Caleb yokwes tres Anak leles tä ihi honhattso. Elh lhey Sesay, elh lhey Ahimán, elh lhey Talmay. ₁₅Tä ileyej, nech'e ihoye Debir, häp hupuy tä lhey tä pajche Kiriat-sefer. ₁₆Wet yok:

–Hin'o chik inuye hupuyni wet ikalhi, ow'enhihola olhäse Acsa häpkhilek iyej.

₁₇Wet hin'o tä ikalhi p'ante hupuy häpe t'at Otoniel, häp Caleb lech'inij tä lhey Kenaz häp tä lhäs. Tä mälhyejtso, Caleb hiw'enho lhäse wet iyej. ₁₈Tä lhamel yikhen tä ihoye lew'et, Otoniel tahuyej atsinha wet yok:

–Alhe ajcha, is chik hiw'en n'amho lhip honhat tä is yämthilek otutcheyhi.

Tä mälhyejtso, atsinha inuhchä tä i'pe asno, wet Caleb tay'ätshane wet yok:

–¿Chip ate?

₁₉Lhäse nichulho wet yok:

–Ijcha, tä lew'en n'oho honhates tä ts'anis, woye tä owoye, p'ajtej honhates tä inätes iche.

Caleb yok:

–Is t'at. Honhates tä inätes ihi tä tumej kaphä lhäy'e tä tumej hichä, alewuk t'at.

₂₀Häp tähesna honhates tä lewuhuy Judá laka wichi tä lhamel hiw'en lhamhomche. ₂₁Häp hupuy tä lewuk tä ihi honhat tä tumej tapinhiye tä tott'aye Edom häpehen tähesna: Kabseel, Tson'atas, Jagur, ₂₂Lhup, Dimona, Tajmatyaye, ₂₃Kedes, Hasor, Itnán, ₂₄Zif, Telem, Lewuk Tsinha, ₂₅N'ow'et Nech'ayek, Keriot, Hesrón, wok oyok, Hasor, ₂₆Amam, Sema, Molada, ₂₇Tewok Lhip, Hesmón, N'oletnhawet, ₂₈M'awow'et, Beerseba, lhäy'e wichi lew'etes tä tott'ahomche, ₂₉Ba'ala, Wasiche, N'otkhajay, ₃₀Eltolad, Kesil, N'otäyhyaj, ₃₁Siklag, Madmana, Sansana, ₃₂T'owalhas, Inätw'etes, lhäy'e En-rimón. Nilhokej hupuyna iche veintinueve, tek õ'thatlä wichi lew'etes tä tott'ahomche.

₃₃Wet häp hupuy tä lewuk tä ihi honhat tä w'awulhchä häpehen tähesna: Estaol, Sora, Asena, ₃₄Zanoa, Inät Lafwey, Tapúa, Inät Täkwfwas, ₃₅Jarmut, Adulam, N'olafwek, N'ojäkw, ₃₆Lepelis, Aditaim, N'olafwek, lhäy'e N'olafwey Täkwfwas. Nilhokej hupuyna iche catorce, tek õ'thatlä wichi lew'etes tä tott'ahomche.

₃₇Häte iche hupuy lhayis tä lheyis Tson'ataj, Nech'ayek, Migdal-gad, ₃₈Dileán, Mispa, Jokteel, ₃₉Lakis, Boskat, Eglón, ₄₀Kabón, Lahmam, Kitlis, ₄₁N'olafwey, Dagónw'et, Isilataj, lhäy'e Makeda. Nilhokej hupuyna iche dieciséis, tek õ'thatlä wichi lew'etes tä tott'ahomche.

₄₂Häte iche Pelaj, Eter, Tutsey, ₄₃Ifta, Asena, Nezib, ₄₄Keyla, Akzib, lhäy'e Maresa. Nilhokej hupuyna iche nueve, tek õ'thatlä wichi lew'etes tä tott'ahomche.

₄₅Wet iche häp Ekrón, lhäy'e wichi lew'etes tä tott'aho, ₄₆wet tälhe Ekrón yäk nichäte lewomekitaj Mediterráneo, nilhokej hupuy tä tott'aho Asdod, lhäy'e wichi lew'etes.

₄₇Häte iche hupuy lhayis tä Asdod lhäy'e Gaza, lhäy'e wichi lew'etes tä tott'ahomche, pajtha nichäte tewok lhäsaj tä tumejlä Egipto lhäy'e lewomekitaj Mediterráneo lhip.

₄₈Wet häp hupuy tä lewuk tä ihi chenhas häpehen tähesna: Amlhäj Lhawayukw'et, N'owujyaj, N'olafwek, ₄₉Dana, Kiriat-sana (wok oyok, Debir), ₅₀Anab, Estemoa, Anim, ₅₁Gosén, Holón, lhäy'e Gilo. Nilhokej hupuyna iche once, tek õ'thatlä wichi lew'etes tä tott'ahomche.

₅₂Häte iche Takaniwhan, Yok Tam, Esán, ₅₃Janum, Bet-tapúa, N'olafwek, ₅₄Alhuw'et, Kiriat-arba (wok oyok, Hebrón), lhäy'e Sior. Nilhokej hupuyna iche nueve, tek õ'thatlä wichi lew'etes tä tott'ahomche.

₅₅Häte iche Maón, Carmel, Zif, Juta, ₅₆Jezreel, Jokdeam, Zanoa, ₅₇Lhup, Gabaa lhäy'e Timna. Nilhokej hupuyna iche diez, tek õ'thatlä wichi lew'etes tä tott'ahomche.

₅₈Wet iche Haljul, Bet-sur, Gedor, ₅₉Chowej, Bet-anot, lhäy'e Eltekón. Nilhokej hupuyna iche seis, tek õ'thatlä wichi lew'etes tä tott'ahomche.

₆₀Häte iche Kiriat-ba'al (wok oyok, Kiriat-jearim), lhäy'e Hup Lhokwetaj, häp täkwfwas hupuy lhäy'e wichi lew'etes tä tott'ahomche.

₆₁Wet häp hupuy tä ihi ts'anis tä lewuk Judá laka wichi häpehen tähesna: Bet-arabá, Midín, N'olafwlhi, ₆₂Nibsán, Nosoy, lhäy'e Kayla Kahits'ifwik. Nilhokej hupuyna iche seis, tek õ'thatlä wichi lew'etes tä tott'ahomche.

₆₃Mat Judá leles p'ante ikalhihit'a chik yokwes häp Jebús lhayis tä lew'et Jerusalén. Wet häp tä tamenej tä Jebús lhayis iyej t'at Judá leles tä ihi Jerusalén yäk häp ifwalasna.