Jos 16

_1-4Häp tähesna honhates tä õhw'enhatejen p'ante José leles tä lepes lheley, wok oyok, Efraín laka wichi lhäy'e Manasés laka wichi: Laka honhat lepes tä tumej hichä häpe t'at tewok Jordán, häp lhip tä tott'ahomche inät lhayis tä ihi Jericó. Wet tälhe täja línea tiyäjche honhat tä ts'anis, wet inukwe chenhas yäk nichäte Betel, tä äp lhey elh Luz. Tälhe täja tiyäjche Arak lhayis kahonhat pajtha nichäte Atarot-adar. Wet äp õy'ayhettshi wet tiyäjche tä Jaflet lhayis kahonhat tä tumej kaphä, pajtha nichäte Bet-horón lhip tä tumchä lhäy'e Gezer. Tälhe täja tiyäje lewomekitaj Mediterráneo.

₅Häp honhates tä lewuk Efraín laka wichi, línea tiyäjche tä tumej hichä, tälhe Atarot-adar pajtha nichäte Bet-horón lhip tä tumphä. ₆Tälhe täja tiyäje lewomekitaj Mediterráneo. Wet laka honhates lhip tä tumej tafwojhiye häpe t'at Mikmetat. Tälhe täja línea tiyäjche tä hichä pajtha nichäte Taanat-silo. Tälhe täja tiyäjche lhip tä lhey N'otamsek, ₇wet tapile Atarot lhäy'e Naarat pajtha nichäte Jericó. Wet lepes häp tewok Jordán. ₈Wet lhip elh tälhe Tapúa wet tiyäjche tä kaphä, pajtha nichäte tewok lhäsaj tä lhey Kaná lhäy'e lewomekitaj Mediterráneo. Häp honhatestso häp tä lewuk Efraín laka wichi. ₉Häte iche hupuy lhayis iyhäj lhäy'e wichi lew'etes tä õhw'enho Efraín lhayis, tej tä ihi honhat tä lewuk Manasés laka wichi. ₁₀Mat Efraín laka wichi yokwesit'a Canaán lhayis tä ihi hupuy tä Gezer. Wet häp tä tamenej tä kamaj iyej t'at lhamel yäk häp fwalasna. Mat yen lakawosa, ichumyene lechumet tä äytajche.