Jos 6

₁Häp ifwalastso Jericó nehit katsik ihanej chik inuphä wok tiyäjo häp hupuy. Tsi wichi hip'ohiche n'olafwek lepelis tä nowaye Israel lhayis. ₂Matkat Lhawuk tahuyej Josué wet yok:

–Lhek yahinya, oyachaj ame Jericó, lhäy'e laka niyat, lhäy'e laka sip'äl. ₃Wet am lhäy'e nilhok aka nifwotaj, is chik lelunayej weihalhache ifwalapej häp hupuy, pajla'tha seis ifwalas. ₄Wet siete sacerdotes is chik ichunlä häp Arca tä Ot'amajchet tä olhämtes ihi, wet elh weihalhapej ichäj lefwol tä tson'ataj lech'u. Wet chik lechäte ifwala siete, lunejlhila siete veces, wet sacerdotes is chik yafwutchehen lefwolis. ₅Wet chik lelätaye lefwolis lepak tä itayhte hupuy, häte amel fwitseneja tä let'änhen. Wet n'olafwek tä ilunej hupuy nichätla katsi, wet elhpej amel letiyäjo häp hupuy.

₆Tä mälhyejtso, Josué t'äne sacerdotes wet ifwenho tä yok:

–Chäjay häp Arca tä N'ot'amajchet. Wet iyhäj siete amel is chik lechunlä häp Arca wet chäj afwolis tä tson'ataj lech'ul.

₇Wet äp tahuyej wichi wet yok:

–Mähen, lunayej hupuy. Wet nifwotaj is chik lhamel ichunlä häp Arca tä sacerdotes ichäj.

_8-9Wet nilhokej wichi iwoye häp Josué lhämet. Lhamel tä ichunhen tä yikhen häpe nifwotas, wet sacerdotes tä yafwutchehen lefwolis lhamel imälheche len'äyij. Wet äp yikhen häp iyhäj sacerdotes tä tilhäj Arca tä N'ot'amajchet. Wet ilepese iche nifwotaj lhip tä t'uye iyhäj. Wet sacerdotes ilehiyejt'a tä yafwutchehen lefwolis tä yikhen. ₁₀Wet Josué ifwenho nifwotaj wet yok:

–Oyay tam tä lhekhen, yej t'änaywethä. Taye pajla'tha nichäte ifwala chik olham one'tek let'änhen, nech'ehilak lefwitsenej chik let'änhen.

₁₁Tä mälhyejtso, Josué ne'tek sacerdotes ilunkatej hupuy häp Arca tä N'ot'amajchet. Tä lhamel ileyej, wet yäple lakasthawet wet ihi honajchetso. ₁₂Tä ifwala elh Josué nephä tä nech'e fwamlafwaj, wet sacerdotes tachuma Arca tä N'ot'amajchet. ₁₃Wet siete sacerdotes lhamel ichunlä häp Arca tä iyhäj ichäj wet yafwutchehen lefwolis. Wet nifwotaj ichunlä lhamel, wet iyhäj nifwotaj imälheche len'äyij häp Arca tä sacerdotes ichäj. Wet häp sacerdotestso lhamel ilehiyejt'a tä yafwutchehen lefwolis. ₁₄Tä mälhyejtso, lhamel yachajo tä ilunej hupuy. Tä ileyej, yäple lakasthawet. Wet mälhyejpejtso tä lhamel iwoye ifwalapej pajtha seis ifwalas.

₁₅Tä nichäte ifwala tä siete, häpet tä noj honatsi lhamel nechephä wet ilunejlhi hupuy mälhyej lakey, mat nech'e siete veces tä yäpilchepej len'äyij. ₁₆Wet tä lepes tä sacerdotes yafwutchehen lefwolis, Josué tahuye wichi wet yok:

–¡Änhen, Lhawuk yachaj amehen hupuyna! ₁₇Hupuy lhäy'e nilhokej m'ak tä ihi täyhat. Enaye m'ak tä lajit lahaya tä ihi tä Lhawuk tatache. Ts'ilak Rahab, häp atsinha tä lakain'oyaj ihi, yej lelän lham lhäy'e nilhokej lew'et lheley, häp tä lham iskat n'aji hin'ol tä y'achene hupuy yämthilek iyahinlhi. ₁₈Mat amaj amejen, yej tachumala m'ak at chik häpek ihi hupuy tä Lhawuk yachaje letäyhyaj. Tsi chik letachuma, wet hupuy lewit'äyhyaj tothila amejen, lhäy'e nilhokej Israel lhayis, wet tatäy. ₁₉Mat oro lhäy'e plata, lhäy'e m'ak chik bronce wok chinaj, häp tä n'ot'amajchetej Lhawuk yämthilek õ'tihi lakäywet.

₂₀Tä Josué ileyej tä iwoyetso, nech'e sacerdotes yafwutchehen lefwolis. Wet tä wichi iläte, ifwitsenej tä t'änhen wet yäm äytaji lepak. Wet n'olafwek tä ilunej hupuy nichät katsi, wet nifwotaj tiyäjo hupuy, elhpej hin'o w'enhayej lhip tä ihi, wet ikalhi. ₂₁Wet ilänejen lefwajnhates hin'ol lhäy'e atsinhay, nä'tshas, mamses, wumhay, lhäy'e w'asetas, tson'atas, asnolis. Nilhokej õ'täyhat t'at.

₂₂Josué tahuyej hin'ol tä ichene n'aji hupuy yämthilek iyahinlhi. Wet yok:

–Hoyaye lew'et häp atsinha tä kain'oyaj länek wet tonphä, lhäy'e lew'et lheley, mälhyej tä amel lefwenho n'aji.

₂₃Tä mälhyejtso, hin'oltso tiyäjchufwi Rahab lewukwe wet itonphä häp lham, lhäy'e lajcha, lako, lepuhfwas, lhäy'e nilhokej lew'et lheley. Wet yikchufwi wet iti w'echehi Israel lhayis kasthawet. ₂₄Wet nech'e Israel lhayis iwunho Jericó lhäy'e nilhok m'ak tä ihi. Tajlhama oro lhäy'e plata, lhäy'e m'ayhay tä bronce lhäy'e chinaj, häp tä itonchephä yämthilek itihi Lhawuk lakäywet. ₂₅Mat Rahab, Josué ilänhit'a, lhäy'e nilhokej lew'et lheley, tsi häp tä lham iskat p'ante häp hin'ol tä Josué ichene Jericó. Wet tälhe ifwalas p'antetso Rahab leles tä lepes lheley iyej t'at häp Israel lhayis.

₂₆Wet nech'e Josué iwoye lhämet tä hit'unhatche wet yok:

–Elh chik häpe chik fwetaj yachajok ineyhatphä häp Jericó, ihi t'at lewit'äyhyaj tä tälhe Lhawuk. Chik yenlhi lefwetes, tamenhiyeja lhäs tä lechunkatsek chik y'il. Wet chik itihi lepelis, tamenhiyeja lhäs elh tä lepes lhele chik y'il.

₂₇Wet Lhawuk iyej t'at Josué, wet letoyaj y'ajpe honhat.