Jos 7

₁Häp Lhawuk pajche n'äyejo Israel lhayis chik tachuma m'ak at chik häpe tä ihi Jericó tä õtkäpfwayeje letäyhyaj. Mat õ'näk'äs täjtso. Tsi elh lhamel tä Judá laka wichi tä lhey Acán, tä lajcha lhey Carmi wet lechätilis Zabdi wet Zera, lham tachuma m'ayek wet iti lhamej. Wet häp tä tamenej tä Lhawuk lewäk nichätpe Israel lhayis.

₂Wet tä lhamel ihi Jericó, Josué ichen iyhäj hin'ol yämthilek iyahinlhi häp hupuy tä lhey N'owastsek tä tumej Betel lhip tä fwala tälhche wet äp tott'aho N'omukwehyajw'et. Wet lhamel yikhen tä iyahinlhi t'at. ₃Tä tapile Josué, wet ifwenho tä yok:

–Naya t'at chik dos wok tres mil hin'ol chik inuye hupuy. Yej chen nilhokej nifwotaj, tsi wujit'a wichi tä ihi.

₄Tä mälhyejtso, yikhen tres mil hin'ol tä inuye N'owastsek. Matkat häp wichi tä ihi yokwes lhamel ₅wet ilänhen treinta y seis. Wet iyhäj tä inukwe alhoho, N'owastsek lheley ihänwethä lhamel tä tälhe hupuy tä lhamel fwetaj inuye, yäk nichäte lhip tä nistakchä wet ilänhen.

Tä Israel lhayis ihanej täjtso, inuhat lhamhohen wet nemhit lakhajyhayaj ihi lhamel. ₆Wet Josué lhäy'e hin'ol tä thänhäy hich'esajen lew'uyis wet itsäype lhethey honhat mok tä yen tetneka tä wuj tä äytaj letichunhayaj tä hiw'en lhamel lewit'äyhyaj. Wet takhosche katsi tä ihi tä Arca tä N'ot'amajchet tä Lhawuk lhämtes lehi tatache, yäk letachol tajiche t'at honhat, pajtha ifwala tatayhchä. ₇Wet Josué yok:

–¡Eh Iwuk Dios! ¿Chipte tä lefwayhtej naji tewok tä Jordán häp wichina? ¿Häpe p'iya tä let'un'ajläk lhachaj n'oyehen Amorreo lhayis yämthilek itäyhat olhamel? ¡Isn'aj t'at chik olhamel oihi t'at tewok lhip elh! ₈Iwuk, ¿atsi olhämet chik owoye tä athana letayhfwas yokwes häp Israel lhayis? ₉Wet Canaán lhayis lhäy'e nilhokej wichi iyhäj tä ihi honhat, lhamel ihanhiyeja olhamel owit'äyhyajna. Wet nämla wet inuhla n'oyehen, wet itäyhthila n'ohen. Wet chik mälhhiyejatso, ¿atsihila m'ak chik lewoye yämthilek wichi nitiya amej lakachuhanyaj?

₁₀Lhawuk nichulho Josué wet yok:

–¿Chi alewoyneje tä let'upeyhi tä lhehitsi? ¡Nephä! ₁₁Ofwel amho, Israel lhayis iwoye lech'isukyaj, inäk'äs olhämetnaj owoyeje. Lhamel tachuma m'aknaj one'tek itäyhat nilhokej, wet t'etane wet iskat tä y'uytho lakäywet. ₁₂Häp täjtso tä tamenej Israel lhayis tä nemhit ikalhi letayhfwas. Lhamel inuhikwela alhoho chik letayhfwas yokwes, tsi nech'e lhamel t'at tä t'uhawetej chik õ'täyhat. Tä mälhyejtso, chik amel katäyhata m'aknaj one'tek letäyhatay, nemla oi'amejen.

₁₃“Lhek fwenho oka wichi Israel, olak, Häp täja Lhawuk Dios lhämet tä yok, Awaklhathen wet a'enay ot'amajchetesa, häpkhilek fwala lehoyay n'oye. I'amejen häp m'aknaj one'tek letäyhthen. ¡Tiyayej kanhi wet täyhthen, häpkhilek yachajo tä lekalhayhi atayhfwas!

₁₄“Chik nech'e fwala is chik iho kana nilhokej wichi tä tälhehen letetsel tä ihi doce. Wet laka niyat elh chik ottshupiye, is chik ihän n'oye nilhokej laka wichi. Wet laka wichi elh chik ottshupiye, is chik ihän n'oye nilhokej lhamel tä lhalew'etfwas. Wet lhamel tä ottshupiye, is chik ihän n'oye nilhokej laka hin'ol tä iyej. ₁₅Wet elh chik n'älejpe m'aknaj one'tek õ'täyhat, is chik õ'thatho itäj, lham lhäy'e leles lhäy'e nilhok m'ak tä lewuk. Tsi inäk'äs olhämet wet iwoye m'ak tä nit'uhawetayej Israel lhayis.”

₁₆Tä ifwala elh Josué nephä tä nech'e fwamlafwaj tä kamaj ninuyaphä ifwala, wet t'äne nilhokej Israel lhayis. Wet Dios tatshupiye Judá laka wichi. ₁₇Tä mälhyejtso, Josué ne'tek Judá laka wichi iho alhoho, wet Dios tatshupiye iyhäj lhamel tä tälhe hin'o p'ante lhey Zera. Wet Josué äp ne'tek Zera laka wichi iho alhoho, wet Dios tatshupiye iyhäj lhamel tä häpehen hin'o tä lhey Zabdi lew'et lheley. ₁₈Wet Josué t'äne elh weihalhapej hin'ol tä iyej, wet Dios tatshupiye elh tä lhey Acán tä häpe Carmi lhäs, tä lechätilis häpehen Zabdi lhäy'e Zera tä häpehen Judá laka wichi.

₁₉Tä mälhyejtso, Josué tahuyej Acán wet yok:

–Yäs, fwel n'oho m'ak tä matche tä lhehi tä Lhawuk, häp Israel laka Dios, tatache. Fwel n'oho m'ak tä lewoye n'aji, yej leskat n'oho.

₂₀Acán nichulho wet yok:

–Matche. Olhaifwel amho tä owoye t'at och'isukyaj, ottayhlä Lhawuk, Israel laka Dios. Häp m'ak tä owoye naji, ₂₁tä y'akalhi Jericó, ow'en wesaj tä isilataj tä tälhe Babilonia, lhäy'e doscientos chinaj t'äj tä plata, lhäy'e oro tä imälhewek tä inu'pe medio kilo. Oy'akäne naji tä ow'en, wet häp tä otchuma naji wet ot'amajej tä otichufwi owukwe tä tsänt'äj tä otjänlä, wet chinaj t'äj tumchä.

₂₂Tä Josué iläte, ichene lakawos wet lhamel inukwe alhoho tä tiyäje Acán lewukwe. Tä nichäte, hiw'en tä matche, nilhokej m'ayhay ichufwi, lhäy'e chinaj t'äj tä tumchä. ₂₃Wet itonchephä wet ihäne Josué lhäy'e wichi, wet lhamel itihi tä Lhawuk tatache. ₂₄Wet nech'e Josué lhäy'e wichi, lhamel tachuma Acán, lhäy'e chinaj t'äj, lhäy'e wesaj tä isilataj tä leskalhek, lhäy'e oro tä imälhewek, lhäy'e leles tä hin'ol lhäy'e tä atsinhay, lhäy'e leläy w'asetas, asnolis, tson'atas, lhäy'e lewukwe, lhäy'e nilhokej m'ak tä lewuk, wet lhamel ihäne honhat tä w'awulhchä tä lhey N'owit'äyhyaj. ₂₅Wet Josué tahuyej Acán wet yok:

–¿Chipte tä letonpe lewit'äyhyaj häp olhamel? ¡Athana is chik am tä Lhawuk ithat atape awit'äyhyaj!

Tä ileyej tä iwoyetso, nech'e nilhokej Israel lhayis ithatejlhi tuntey Acán lhäy'e nilhokej lew'et lheley, wet ilänhen wet ithatho itäj. ₂₆Wet nech'e lhamel iskonpe tuntey häp lep'itsek, wet ifwalasna kamaj iche t'at. Häp tä tamenej tä õyen lheya honhattso N'owit'äyhyaj.

Tä mälhyejtso, Lhawuk ileyej tä itiyej lewäk häp Israel lhayis.