Jerusalén leteläythayaj tä tälhe Lhawuk
1Matche tä wuj Lhawuk lewäkw
tä itiyej naji Jerusalén,
tet iwoye pule tä ichalaj tä hip'o'pe.
Ichene naji lewit'äyhyaj tä tälh puleye,
wet ikänchi lesilatyaj.
Wet nemhit yen tichunhayaja Lewukwe tä T'amajchet,
häp lewäkw tä wuj tä tamenej.
2Lhawuk niwohiyat elhaj wichi lew'etesas
tä ihi Judá chik imälhthi.
Wet lewäkw yokwet ihämit häp hupuy
tä hin'ol tä takhajayhen
tä õy'uhyene honhat ihiche.
Ithat katsi, nemhit laha ihi n'oniyatyaj,
lhäy'e niyatey.
3Häpet tä lhailhänhi Lhawuk lewäkw,
ihämit imälhewek Israel lakhajyhayaj.
Nemhit tach'ot n'ame tä y'attayhlä lhatayhfwas.
Iwunejo itäj häp Israel,
wet ihämit nilhokej m'ak tä iwhäye.
4Lhawuk nech'e tet iwoye lhatayhfwa,
tachumho lelutsej, imäyenpe takwey.
Tet iwoye elh chik nichuwet n'amehen,
ilän m'ak tä tatey akäjejlhi naji.
Ilänej lewäkw tä tet iwoye itäj
tä ichene lhaw'et Jerusalén.
5Lhawuk iwo ka'tshayaja,
tet iwoye lhatayhfwa, ihämit Israel.
Ithatche kanhi niyat lewukwey,
lhäy'e hupuy tä hin'ol tä takhajayhen
tä õy'uhyene honhat ihiche.
Y'isej lhip lelhakli lhäy'e lefwitajayaj
tä hiw'enho Judá lheley.
6Tet iwoye etantsaj,
nemhit yen t'amajcheta häp Lewukwe.
Iwasthi lhip tä laka wichi lhaihutpejwekchufwi.
Lhawuk itäyhat ifwalas
tä wichi fwitaj n'okwiyej häp lham,
häp ifwalas tä lhamel yen lakäjyaja,
lhäy'e ifwalas tä n'ot'elakw'et.
Lewäkw lhailhänhi wet nemhit iti lhamhi
rey lhäy'e sacerdotes.
7Lhawuk ileyej laka altar wet y'ulhan Lewukwe.
Yachaje letayhfwas häp lelafwek tä tuntey tä ilunejlhi.
Lhamel iwo käjyaja tä ikalh n'amhiche,
mälhyej ifwalasmhaj n'amel tä y'awo lhakäjyaja.
8Lhawuk yonajkwe:
“Matche tä othatla katsi
Jerusalén lelafwek tä tuntey.”
Tsi pajche Lhawuk iwaklhat naji m'ak tä iwohiyejela.
Nemhit ileche tä takwey itiyej tä itäyhat.
Hupuy lhäy'e n'olafwey tä tuntey
nech'e tet iwoye tesalis,
tan'ischetwek tä wasiche.
9Jerusalén nemhit lepe p'otes ihiche,
häp tä chinhas tä itsoklhi lepe p'otes nemhit ihiche.
Lhawuk t'at tä iwasthiche wet ichet katsi.
Laka rey lhäy'e laka niyatey
õ'häne naji honhat tä kalew'eta,
wet lhamel lhayej t'at wichi tä w'enha lhamejen.
Nemhit õyen chufwenyaja Lhawuk lhämtes,
wet profetas nemhit hiw'en lew'enhay tä tälhe Lhawuk.
10Hin'ol tä thänhäy tä Jerusalén lheley
tatayhichephä t'at honhat.
Lhamel yok tam, itsäche'pe honhat häp lhethey
wet taw'uyhiche lew'uyis tä tesa w'uyis.
Jerusalén laka lhutshay t'upechehchä
pajtha letachol tijiche t'at honhat.
11Olhafwyhayaj ilän ottelhoy,
wet oläte tä ot'okwe tet iwoyek hikw'esche.
nofw okhajyhayaj tä ow'en
tä wasi oka wichi laka honhat,
lhäy'e tä äp ow'en nä'tshas tä kamaj tiphasen
tä lewhäy t'at tä y'inhiyejena nehläs.
12Wet nä'tshas lhaip'altsene lakolis wet yok:
“Onchuyuhen, w'en n'oho m'ak chik otufw
lhäy'e m'ak chik oyäyej.”
Wet lhamel nichät at katsi
tä ihiche hup kawayhil,
tet iwoyek n'olänhay.
Lakolis tachuma
wet lep'itseyhay ihi t'at takweyey.
13Jerusalén, ow'en tä wuj awit'äyhyaj tä i'amej.
¿Atsi olhämet chik owoyej ame
yämlek nofw afwitajayaj?
Ihichet'a elh chik leteläythayaj
te iwoye ateläythayaj tä i'amej.
Tet iwoye lewomekitaj tä tsajphä,
wet newache elh chik aichesat.
14Aka profetas lew'enhaynaj ifwel amho
aifwech'enlhi, matche tä ikan amej.
Ifwenhit'a amho hach'isukyaj tä i'amej,
häpkhilek lewo achowej elha
wet letafwayej awit'äy tä tatay ame.
Ifwel amho lew'enhay tä kamatachehen wet aiwetahathen,
tsi t'uhläk let'ekhaye t'at häp lhamel.
15Wichi tä inukwe n'äyij,
tä aiw'en lhamel y'ajomche takwech'ol.
Ailäkwlhi, yafwutchehen lepästey,
ilanejwethä lhethey leläkwyhanyaj tä iwoyej ame.
Wet yäm ame wet yok:
“¿Hä wet häp täja honhat tä õyen häpeya
honhat tä inu'pe iyhäj honhates tä lesilatyaj ihi?”
16Nilhokej atayhfwas iyet ame.
Yafwutchehen lepästey
wet ititpe tatey leläkwyhanyaj tä iwoye,
lhäy'e tä aistunlhi wet yok:
“¡Imälhewek lesilatyaj tä y'akänchi!
¡Pajchey tä y'aniwhihlä ifwala chik mälhyejna!
¡Tä pajya y'asakanej ifwalana!”
17Lhawuk iwoye m'ak tä pajche yok,
“Owohiyela täjtso.”
Imatitche lhämette iwoye.
Nemhit iti amej lep'altsenyaj, aiwasthi t'at.
Hiw'enho lakhajyhayaj atayhfwas,
häpkhilek inu atape wet lhaichäjwethä amej.
18¡Jerusalén, honhatmhaj isilataj,
änch'oye Lhawuk!
¡Wot afwyhayaja ifwalapej honatsipej!
¡Is chik atet'ilis w'elekchehchä,
tet iwoye tewok lhayis!
¡Yej leyej tä letafwlhi,
yej wo t'elakw'eta atelhoy!
19Nephäpej tä honatsi,
yej wo pesa tä let'änlhi.
Ap'altsenepej Lhawuk,
is chik alhyajay tälho ahusek,
tet iwoye inät tä nitsäy.
Tichephä akweyey tä alep'altsene,
alhe, tichunlä aka nä'tshas lew'atshancheyaj,
tsi lhamel y'ilejen nehläs
tä ihiche hupuy kawayhil tselhäs.
20“Iwuk, ¿chipte tä lech'atej
m'ak tä lewoyej n'oyehen?
Ihichet'a wichi chik lewoyeje
m'ak tä mälhyejtso.
Lhek tetshan, ¿hä lefwitaj is t'at
tä atsinhay tufwen lelesas?
¿Wet hä lefwitaj is t'at
tä õ'länhen sacerdotes lhäy'e profetas
tä ichufwi Awukwe?
21“Mamses lhäy'e wichi tä thänhäy,
lhamel y'inhen ihiche hupuy kawayhil.
Mamses lhäy'e lhutshay õ'länejen n'ofwajnhates.
Ifwala tä awäkw ihi
matche tä lew'enho lewit'äyhyaj wichi.
Lelänhen, nemhit letiyej hap'altsenyaj.
22“Nilhokej honhat lhipey tä letälhte
owit'äyhyaj tä lechen n'oye,
tet iwoye wichi tä neke naji n'okäjyaj.
Iwuk, ifwala tä awäkw ihi
niwohiyat elh chik häpe chik lefwayhyaj ihi.
Nilhokej oka wichi tä ochihelit naji lhäy'e tä ot'uye,
otayhfwas t'at tä tifwej tä ilänhen.”
