Lam 3

₁Olham tä ohäpe hin'o

tä wuj tä leteläythayaj ihi.

Lhawuk tä itasin n'oyej lewäkw.

₂Ihän n'oye honhat tä honatsi ihi,

ihän n'okwe n'äyij tä newache isi.

₃Matche tä tawäkwäy n'oye.

Imälhewek ifwala yachajopej tä iti n'oyej takwey.

₄Ikänchi ot'äj wet hich'uthat,

wet inäksen olhiley.

₅Iti n'ohi olhakli lhäy'e oteläythayaj,

tet iwoye olafwek tä oilech'oye.

₆Iti n'ohi honataj tä wuj,

itech'ayen n'oyej oiyhäj

tä pajchey tä y'inhen p'ante.

₇Ilafwlhi n'oyej n'olafwek tä lajit lepeya,

wet yäyit n'oyej chinhas tä choyhthen.

₈Tej tä ot'än, ot'änch'oye chik tach'ot n'oye,

mat tach'ahuhit'a n'oye.

₉Hip'oyeji on'äyhitaj tayhi tä wujpey.

Itsayhthen on'äyhitas.

₁₀Lhawuk tet iwoye t'owalhaj tä fwitsaj, iniwhin'o,

tet iwoye sulaj tä nephä tä inu n'oye.

₁₁Iton n'oye n'äyij lhip, iwo olhipeya.

Yik n'ohlä wet iwomn'o katsi.

₁₂Tachumho lelutsej,

itayhat n'oye lech'äha.

₁₃Lhawuk tiyäj n'oyej lech'äha

wet yämhow olätsek.

₁₄Nilhokej oka wichi lhamel iläkwlhin'o,

wet nech'e ohäpe t'at n'oläkwik nilhokej ifwalas.

₁₅Lhawuk yäm tapo n'oyej oteläythayaj,

tet iwoyek iyäyen n'oyej olhät tä tapay.

₁₆Ok'aj tiji honhat, otsotey ichähen,

honhat tapoyej ok'aj.

₁₇Nemhit otamsek ihi,

wet nemhit oyen tichunhayaja okäjyaj.

₁₈Otichunhayaj yok, Nofw t'at okhajyhayaj,

lhäy'e oniwhayaj tä otiyej Lhawuk.

₁₉Wuj tä ontichunche tä ofwitajayaj ihi

lhäy'e tä nemhit ow'et akalelhäj.

Matche tä oyenpej tichunhayaja

olhakli lhäy'e oteläythayaj.

₂₀Lajit lepesa tä nemhit op'ethatlä m'ayhayna,

wet ochowej ilehat at lhamej.

₂₁Mat iche m'ak tä oyen tichunhayaja,

wet häp tä oniwhihlä:

₂₂Lhawuk lajit lepesa lehumnhayaj

wet nofwit'a lep'altsenyaj.

₂₃Tä nech'e fwalapej inech'aynhiche t'at

lehumnhayaj lhäy'e lep'altsenyaj.

¡Matche tä afwtintsaj Lhawuk!

₂₄Iwohiyet'ak Lhawuk newa n'oyej,

häp tä tamenej tä ot'ekhaye Lhawuk.

₂₅Lhawuk lechowej iyeji wichi tä t'ekhaye

lhäy'e tä t'ukwe lham.

₂₆Is tä hin'o iwo letamseka

wet iniwhihlä chik Lhawuk ifwayhat.

₂₇Tä kamaj ahan'äfwaj

achufwenej tä leteläytej.

₂₈Chik Lhawuk ilhuhyenej hin'o häp m'ak tä choyhat,

is chik lhaits'ilkatej t'at wet yok tam.

₂₉Is chik lhay'ayhatchä wet t'upeyhen.

Ch'athiyeja wet Lhawuk hip'altsen.

₃₀Is chik itihlä lech'alo

häp elh chik iwo lelätseka.

Tej chik wuj tä õy'aj,

tha is chik akäjejlhi t'at.

₃₁Tej chik Lhawuk ileyej ayej hin'o,

mat chik paj yachajo tä iyej.

₃₂Tej chik hiw'enho leteläythayaj hin'o,

mat kamaj hip'altsen t'at,

tsi lepes ihihit'a lham lehumnhayaj.

₃₃Tek ihumin chik iwo lelhakliya wichi,

ihuminhit'a chik iwo leteläythayaja.

₃₄Lhawuk ihuminhit'a tä ch'atej tä õknit'amajayej

wichi tä õhp'ohiche.

₃₅Lhawuk ihuminhit'a chik õ'näyejo hin'o

häp n'okalelhthayaj tä is alhoho.

Tsi n'äl tä õttayhlä häp lham

tä häpe Dios tä N'owujtaj tä Lhamya.

₃₆Wet Lhawuk ihuminhit'a chik kamatache

n'okalelhthayaj tä lewos iwoye.

₃₇Chik iche m'ak tä õyäme,

wok m'ak at chik häpe,

Lhawuk tä tamenej tä iche täjtso.

₃₈M'ayhay tä isen lhäy'e m'ayhay tä ni'isahen,

Lhawuk t'at tä ne'tek iche.

₃₉Isit'a chik hin'o tume

chik õ'tasinpe häp lech'isukyaj tä iwoye.

₄₀N'äm matche tä y'atetshan m'ak tä y'awoye,

wet n'äple häp Lhawuk.

₄₁N'aneyhtejphä lhatichunhayajay Dios tä ipuleye,

wet n'awo lhat'alhyaja tä y'ok:

₄₂“Olhamel owo och'isukyaja wet ottay ahilä,

wet tek letäyhat otes.

₄₃“Awäkw ilunlhinaj n'oyejen,

ihänlhi n'ohen.

Nemhit iche hap'altsenyaj chik leti n'oyejen

tä leso n'oyejen ow'atshancheyaj.

₄₄Lep'oyej atape pule,

häpkhilek kaläta n'oyehen

chik olhamel olhaip'altsen ame.

₄₅Lhen n'oyehen m'ak tä matche tä kok'aye

tä wichi tä ihiche honhates y'ulhan.

₄₆“Nilhokej otayhfwas iyet n'oyehen,

tsi tatay n'ohlähen.

₄₇Lhamel lhayen chowalhnhasa n'oyejen,

wet wuj tä olhamel onowaye.

Matche tä olhamel owit'äyhyaj ihi,

wet lhamel ikänchi owukwey tä iwasthiche.”

₄₈Tet iwoye tewok olham ottet'ilis tä nitsäyhchä,

tä ow'en tä wasi oka wichi laka honhat.

₄₉Lajit lepesa tä olhafwyhayaj ihi,

wet ihichet'a elh chik iso n'oyej,

₅₀pajla'tha lham Lhawuk tä ikaphä

chik iyahnej n'ohchähen.

₅₁Äytes ottelhoy wet wuj tä ilän otichunhayaj

tä ow'en m'ak tä iyej atsinhay tä lew'et Jerusalén.

₅₂Niwohit m'ak chik tamenej

tä otayhfwas ichowalhi n'ohlä.

Itech'ayen n'oyej afwenche tä ichowalh.

₅₃Lhamel imälhetn'o oläyej

tä ithat n'okwe chowej

wet hip'oyej n'o'pe tuntey.

₅₄Inät hip'o n'o'pe

wet ofwitaj nech'e ottäy t'at.

₅₅Iwuk, ot'ännaj hach'oye

tä oihi chowej tä pitoj.

₅₆Letach'ahunaj n'oye tä ot'alh ame

tä oyonajkwe, “Woye tä owoye,

yej le n'oyej mat ch'ot n'oye.”

₅₇Wet lehonaj n'oye täjnaj ot'än hach'oye,

wet lefwelnaj n'oho tä lhok, “Yej noway.”

₅₈Wet am, Iwuk, letach'otnaj n'oye

wet matche tä lefwayhatnajn'o.

₅₉Iwuk, ch'ot n'oye

wet woyej n'oye m'ak tä is alhoho,

tsi lew'en m'ak tä ni'isa tä õ'ti n'oyej.

₆₀Lew'en otayhfwas m'ak tä t'uhläk iwoyej n'oye,

wet lhamel letichunhayajay iwaklhat tä tatay n'ohlä.

₆₁Iwuk, leläte t'at lhamel leläkwyhanyajay tä iti n'oyej,

lhäy'e letichunhayajay tä iwaklhat tä tatay n'ohlä.

₆₂Lhamel yämlhi n'oyej imälhewek ifwala,

wet matche tä iti n'oyej lhämtes tä ni'isachehen.

₆₃Lhek yahin, Iwuk, nilhokej m'ak tä lhamel iwoye.

Nech'e ohäpe t'at m'ak tä n'oläkwik.

₆₄Iwuk, ¡wo haya m'ak tä ni'isa tä iwoye!

¡W'enho lhamel m'ak tä t'uhawetej lakeyis!

₆₅¡Soyej letäfwnhayaj

wet käpfwayeje lewit'äyhyaj!

₆₆Iwuk, ¡hänwethä wet chuwetehen!

¡Is chik tatäy tä i'pe honhat!