Luc 9

₁Jesús ihutwek lechufwenkay tä ihi doce, wet hiw'enhomche lewahnhayaj lhäy'e lakhajyhayaj tä inu'pe ahät lhayis chik häpe yämthilek inuhatchephä, wet ichesthen t'inhayaj länhay. ₂Wet ichen lhamel wet yok:

–Mäh wo silätayej wichi Dios Niyatyaj wet chesthen lhamel tä t'inhayaj ilän. ₃Tä lenukwe n'äyij, yej chäj m'ak at chik häpe: wok atsut, wok akhäyhi, wok pan, wok chinaj t'äj, wok haw'uy elh. ₄Wet chik lhämay kanhi, chik lheyayej elh chik häpe lewukwe tä lehoyaye, ewej t'at pajla'tha lhekch'oye honhat tä ihi. ₅Wet chik iche lhip tä lechäte wet wichi tä ihi nitchuma ahilähen, mäch'oye lew'et wet sichätchä honhat tä ihiche apach'ol, häpkhilek lhamel hiw'en m'ak tä lewoye wet yen tichunhayaja tä letes ihi.

₆Tä mälhyejtso, lhamel yikhen, ihoyehen wichi lew'etesas wet iwo silätayej Dios Silätyaj tä Is, wet ichesthen t'inhayaj länhay.

₇Häp Galilea laka niyat Herodes, tä itoyench'oye tä wichi yämejlhi Jesús lhäy'e nilhokej m'ak tä yenlhi, wuj tä nikalelhäja letichunhayaj. Tsi wichi iyhäj yenek Juan Bautista tä inuphä tä tälho n'op'itseyhay, ₈iyhäj yenek profeta Elías tä n'äl, wet iyhäj yäme tä fwetaj häpe profetas tä pajchehen häp tä elh tä inuphä tä tälho n'op'itseyhay. ₉Mat Herodes yok:

–Olhamnaj tä one'tek õyiset lhetek häp Juan. Mat ¿atsi tä häpe hin'o tä wichi yämeje m'ayhay tä yenlhi?

Häp tä tamenej tä Herodes t'uhläk hiw'en Jesús.

₁₀Tä apóstoles tapilche alhoho, ifwenho Jesús nilhokej m'ak tä lhamel yenlhi. Wet Jesús hits'ilkat lhamel wet yok:

–Mäh n'ahoye hupuy tä Betsaida.

₁₁Mat tä wichi ihanej, ihän. Wet Jesús tachumlä lhamel, wet ifwenhomche Dios Niyatyaj wet ichesthen t'inhayaj länhay.

₁₂Wet tä fwala itayhchä, lechufwenkay tä ihi doce ihoye Jesús wet yok:

–Wo tsilhekayej wichi häpkhilek yikhen wet ihoye hupuy lhäy'e wichi lew'etes tä ni'tosayehen, yämlek elhpej t'ukwe lew'et chik imähi lhäy'e m'ak chik tufw. Tsi niwohit m'ak chik ihi lhip tä y'ehina.

₁₃Mat Jesús nichulho wet yok:

–Amel tä is chik lew'enho lhäk.

Lhamel yok:

–Tajlhamat cincofwas pan tä y'aw'en lhäy'e täkwfwas w'ahat. Mat ¿chiwoye? ¿Hä lene'tek olhamel ot'ukwe p'iya n'olhäk tä w'awulhej wichi tä wujna?

₁₄Tsi iche p'ante cinco mil hin'ol. Mat Jesús tahuyej lechufwenkay wet yok:

–Fwenho wichi, is chik tatachephä, cincuentapej tä lhaiw'enhathen.

₁₅Lechufwenkay iwoynejetso wet nilhokej wichi tä tatachephä. ₁₆Wet Jesús tachuma pan tä ihi cinco lhäy'e w'ahat täkwfwas, wet iyahin puleye wet iwo graciasayej Dios. Tä ileyej, wet hich'esaj wet hiw'enhomche lechufwenkay, ne'tek lhamel hiw'enhomche wichi. ₁₇Wet nilhokej t'ekhen yäk yipsejen. Wet lechufwenkay ihanche doce lehis tuskalis tä õyenlhi häp lhipey tä imälhe katsi.

₁₈Ifwala elh p'ante, Jesús ts'ilak lham tä iwo let'alhyaja. Wet lechufwenkay iyej, wet lham tay'ätshane lhamel wet yok:

–¿Atsi tä wichi yenek ohäpe?

₁₉Lhamel nichulho wet yok:

–Iyhäj yenek ahäpe Juan Bautista, iyhäj yenek ahäpe Elías, iyhäj yenek ahäpe elh profetas tä pajchehen tä inuphä tä tälho n'op'itseyhay.

₂₀Wet Jesús yok:

–¿Wet cho amel, atsi tä lhenayek ohäpe?

Pedro nichulho wet yok:

–Ahäpe N'ofwayhthi tä Dios Chenek.

₂₁Mat Jesús yäm äytajche lhämet tä ifwenho lhamel wet yok:

–Yej fwenhola elh at chik häpe.

₂₂Wet äp yok:

–Lhek tetshan olhämet, Hin'o Lhäs iwohiyet'ak niwohila leteläythayaja. Häp hin'ol tä thänhäy, lhäy'e sacerdotes tä len'ohyajay ihiche, lhäy'e hin'ol tä lhayen lewosayej Ley p'ante tälhe Moisés, lhamel itihit'ala lhamhi, wet õ'länla, mat chik tres ifwalas inuhiphäla tä tälho n'op'itseyhay.

₂₃Wet nech'e tahuyej nilhokej wichi wet yok:

–Elh chik häpe chik t'uhläk yen hänekan'o, is chik lhaifwonlä lham lenech'ethayaj wet ifwalapej tilhäj laka cruz wet nek n'okwe. ₂₄Tsi elh chik nit'uyahläk leteläythayaj ihi, tatäyhla. Mat elh chik matche tä ihänlhin'o wet ninowayaye leteläythayaj, tafwayhla. ₂₅¿Atsi m'ak chik hin'o isej chik ikalhi p'iya nilhokej m'ayhay tä ihi honhat, mat lham tatäy wet noj? ₂₆Tsi elh chik n'äfwelh n'o'pe lhäy'e olhämtes, häte Hin'o Lhäs n'äfwelhla'pe chik näm tä lewujyaj ihi, lhäy'e tä nekche lewujyaj tä iyej Lajcha lhäy'e ángeles tä t'amajchetes. ₂₇Matche tä ofwel amhohen, Häp iyhäj amel tä lheyay kana athana, y'inhihent'ala yäk hiw'enpe Dios Niyatyaj.

₂₈Tä ocho ifwalas tä tajyäme tä Jesús yäme m'ayhaytso, iho'pe chenaj yämlek iwo let'alhyaja, wet ichäj lhamche Pedro lhäy'e Santiago lhäy'e Juan. ₂₉Tä iwo let'alhyaja, tate'pe w'enha lhamej wet lew'uyis wuj tä ipelajen, isi t'at. ₃₀Wet lechufwenkay iseltejen tä hiw'en hin'ol täkwfwas tä yämhoplhi Jesús, häpehen Moisés lhäy'e Elías. ₃₁Lhamel ihi t'at lechowej isi tä tälh puleye, wet yäme chik Jesús ihi Jerusalén tajila lewhäy chik yikch'oye honhat.

₃₂Wet Pedro lhäy'e t'unfwas wuj tä nahati ilänhen, mat tek imähen, wet häp tä lhamel hiw'en t'at Jesús lesilatyaj lhäy'e hin'ol tä iyej. ₃₃Tä hin'oltso yikch'oye Jesús, Pedro tahuyej wet yok:

–Maestro, wuj tä is tä olhamel oikana. Oyenhilhila tres hupuyhas, elh tä am haw'et, wet elh tä Moisés lew'et, wet elh tä Elías lew'et.

Pedro ihanhiyejt'a lhämet tä iwoye. ₃₄Tä kamaj yämlhi, pule näm wet hip'o'pe lhamel, wet wuj tä nowayhen. ₃₅Wet nech'e iche n'opak tä tumho pule tä yok:

–Häp täjtsi Olhäs, häp Elh tä ottshupiye. Ch'ahuyaye.

₃₆Tä n'opak ileyej tä yämlhi, lechufwenkay iyahinchephä wet hiw'en Jesús tä ts'ilak t'at tä takasit. Wet ifwalastso lhamel yok tam, ifwenhihot'a elh chik häpe m'ak tä hiw'en.

₃₇Tä ifwala elh p'ante, tä lhamel inuhchä tä tälhpe chenaj, wet wujpe wichi tä yikhen tä lhaichutyenej Jesús. ₃₈Wet iche hin'o tä ifwitsenej lechos wet yok:

–Maestro, woye tä owoye, lhek yahinya olhäs, tefwaj'atni tä in'oyej. ₃₉Ahät tachumapej wet hit'änyenlhi t'at, itäyhatpej leyalh wet itälhetche lakhofw lak'aj. Matche tä iwit'äyen, tek t'uhläk ileyej. ₄₀Olhaip'altsenene achufwenkay chik inuhatphä, mat ikalhihit'a.

₄₁Tä Jesús iläte täja, wet yok:

–¡Wichi tä lechayaj newahi lhäy'e tä ni'isa! ¿Chihätefwas ifwalas tä oihla amejen wet oteläythila amejen? Lhek hän kana äs.

₄₂Tä mamse ihoye, ahät ithat katsi wet leyalh tatäy. Mat Jesús ifwone ahät, wet ichesat mamsetso, wet yachaje lajcha. ₄₃Wet nilhokej wichi wuj tä iseltejen Dios lewujyaj tä hiw'en.

Wet tä wichi kamaj yen tichunhayaja m'ak tä iseltejen tä Jesús yenlhipej, lham tahuyej lechufwenkay wet yok:

₄₄–Ch'ahuyay n'oye, tiyäjaynho ahusey olhämtesna. Häp Hin'o Lhäs õyachajiyela hin'ol takweyey.

₄₅Mat lhamel ihanhiyejt'a m'ak tä yäme, tsi lep'ot ihi letäfwnhayaj, wet häte ifwawalhe chik tay'ätshaneje.

₄₆Wet lechufwenkay yämejwethä lhamhomche wet yok:

–¿Atsi n'aelh tä inu'pe iyhäj?

₄₇Mat Jesús nitäfwelej lhamel letichunhayaj, wet ichuma han'äfwaj, iti lewhäye, ₄₈wet tahuyej lhamel wet yok:

–Elh chik häpe chik ichumlä häp han'äfwaj tä mälhyeja tä ihänlhin'o, olham t'at tä ichum n'ohlä. Wet elh chik ichum n'ohlä häte ichumlä Elh tä lechenekn'o. Wet häp tä elh tä lhäy'e lhip tä w'et m'ayekfwaj t'at tä i'amejen, häpe elh tä inu'pe iyhäj.

₄₉Juan tahuyej Jesús wet yok:

–Maestro, olhamel ow'en naji hin'o tä inuhtejchephä ey ahät lhayis. Mat tä kahäpeya elh n'amel, on'äyejo.

₅₀Mat Jesús yok:

–Yej n'äyejo, tsi elh tä nittayahlä amel, häpe aelh t'at.

₅₁Tä tott'aye p'ante lewhäy chik Jesús yäpil puleye, wet t'otle t'unhat wet yik t'at tä ihoye Jerusalén. ₅₂Wet ichunkat lahilä lechenhay tä ihoye wichi lew'et tä ihi Samaria, tä t'ukwe Jesús lew'et yämthilek ihi ayej. ₅₃Matkat Samaritano lhayis iwohit'a lew'eta tsi ihanej tä ihoye t'at Jerusalén. ₅₄Tä lechufwenkay Santiago lhäy'e Juan hiw'en täjtso, lhamel yok:

–Iwuk, ¿hä is chik y'at'alhe itäj tä tälh puleye yämthilek ihämit lhamel?

₅₅Mat Jesús nitilhaklä wet ifwoneje lhämettso. ₅₆Wet lham lhäy'e lechufwenkay yikhen tä ihoye elh wichi lew'et.

₅₇Tä lhamel inukwe n'äyij, iche hin'o tä tahuyej Jesús wet yok:

–Iwuk, oyikhila amche, honhat at chik häpe chik lehoye.

₅₈Jesús nichulho wet yok:

–M'awo lhayis lhokwe ihi, wet afwenchey lhupis ihi t'at. Mat häp Hin'o Lhäs lew'et ihihit'a yämthilek lhay'up'at chik imä.

₅₉Wet tahuyej elh hin'o wet yok:

–Nek n'okwe.

Mat hin'o yok:

–Iwuk, ch'anlha aj n'oye tä ochunkat tä oyäpil wet otjänch'oye ojcha lep'itsek.

₆₀Jesús nichulho wet yok:

–Tejtsi. Is chik lhamel tä häpe lep'itseyhay tajänch'oye iyhäj tä y'inhen. Mat am mäh, en ämeta Dios Niyatyaj.

₆₁Wet hin'o elh tahuyej wet yok:

–Iwuk, oyikhila amche, mat ch'anlha aj n'oye tä ochunkat tä ohoye ayej ow'et lheley yämthilek owo tsilhekayej.

₆₂Jesús nichulho wet yok:

–Elh tä iwo tesa tä isaji honhat, wet iyahinche tä tälhche, ikalhihit'a chik fwetaj iwoye Dios Niyatyaj lechumet.