Mat 12

₁Häp fwala tä n'ot'elakw'et p'ante, Jesús lhäy'e lechufwenkay ilunche yachuyaj. Wet lechufwenkay nichuyuhen, wet iwo tesa tä itonhiche trigo lhay tä kamaj lakonkay wet tufw. ₂Mat tä Fariseo lhayis hiw'en, tahuyej Jesús tä yok:

–Lhek yahinya achufwenkay, lhamel iwoye m'ak tä tek õ'wahnej elh che iwoye häp fwala tä n'ot'elakw'et.

₃Mat lham yok:

–¿Hä leyahyenhit'a m'ak tä David iwoye p'ante? Iche p'ante fwala tä lham lhäy'e let'unfwas nichuyuhen, ₄wet tä lham tiyäjchufwi p'ante Dios Lew'et, tufw t'at pan tä õyen t'amajchetesayej Dios, häp m'ak tä tek õ'wahnej p'ante che lham, wok let'unfwas, wok elh che häpek tufw, mat tajlhamat iyhäj tä sacerdotes tä õ'wahnej. ₅¿Wok hä leyahyenhit'a Ley p'ante tälhe Moisés tä yäme häp sacerdotes, tä tej tä nileyayej lechumet tä ihi Dios Lew'et häp fwala tä n'ot'elakw'et, mat letes ihihit'a? ₆Wet ofwen amhohen, ikana m'ak tä inu'pe Dios Lew'et. ₇N'äl tä lehanhiyejt'a m'ak tä häpe Dios lhämet p'ante yok,

₉Jesús yikch'oye täja wet ihochufwi n'ohusew'et, ₁₀wet iche hin'o tä takwech'o tamchäy. Wet tä Fariseo lhayis t'ukwe m'ak che yen tesayej Jesús, häp tä lhamel tay'ätshaneje tä yok:

–¿Hä õ'wahnej che õ'chesat t'inhayaj länek häp fwala tä n'ot'elakw'et? ₁₁Jesús nichulho wet yok:

–¿Atsi elh amel tä lelä tson'ataj ihi, wet che nichäte chowej häp fwala tä n'ot'elakw'et, hä nekaye yämlek tachuma wet itonphä? ₁₂Wet tä hin'o laha lhäy'e lhip tä inu'pe tson'ataj, tä mälhyejtso, õ'wahnej t'at che õ'woyeje n'oelh m'ak tä is häp fwala tä n'ot'elakw'et.

₁₃Wet nech'e tahuyej hin'o tä takwey tamchäy wet yok:

–Piyen akwey.

Wet hin'o ipiyen takwey wet iches, nech'e hätet iwoye elh. ₁₄Mat tä Fariseo lhayis inukwephä, wet iwo lehuseya'pe m'ak che fwetaj iwoyeje Jesús yämlek ilän.

₁₅Tä Jesús ihanej tä Fariseo lhayis iwo huseya'pe, yikch'oye täjtso, wet wujpe wichi tä ihän. Wet ichesthen nilhokej, ₁₆wet yäm äytajche lhämet tä ifwenho lhamel tä yok:

–¡Yej lhenay ämetan'o!

₁₇Täjtso, lhayäm matche Dios lhämet p'ante profeta Isaías yen silätyaja tä yok:

₂₂Õ'häne Jesús ahät länek tä asnam wet isuk. Wet Jesús ichesat, wet hin'o nech'e tahuy wet hiw'enche honhat. ₂₃Wet wichi lhäy'e lhip tä iseltejen wet yok:

–Elat häpe N'ofwayhthi tä Dios Chenek p'iya, David Lhäs.

₂₄Tä Fariseo lhayis iläte wichi, wet yok:

–Beelzebú tä ahät lhayis kaniyat, häp tä hiw'enho lakhajyhayaj yämthilek inuhatchephä ahät lhayis.

₂₅Mat Jesús nitäfwelej lhamel letichunhayaj, wet yok:

–Häp honhat che häpe, che lhaich'esaj n'oniyatyaj tä ihi, tatay lahilä, wet noj t'at. Wet che wichi tä lhalew'et lheley lhaiw'enhathen, nofwila. ₂₆Wet che häpe Satanás tä ichenphä Satanás, n'äl tä lhaiw'enhat, wet nemla niyat. ₂₇Wet tä amel lhämaye tä onuhtejchephä ahät lhayis lhamel laka niyat Beelzebú, che mälhyejtso, ¿atsi tä hiw'enhomche lakhajyhayaj häp iyhäj amel tä inuhatchephä ahät lhayis? Oyok, amel aiyhäjtso hin'älit tä lewetahen t'at, mathichet'a ämtes. ₂₈Mat tä häpe Dios laka Espíritu tä onuhtejchephä ahät lhayis, n'äl tä Dios Niyatyaj näm amehen.

₂₉“Lhek tetshan olhämet, ¿chip lhaiwoyneje hin'o che tiyäjchufwi elh tä takhajay lewukwe yämthilek isoyej m'ak tä iyej, che nichunkata tä inayhit lhamtso? Mat che ichunkat tä inayhit, nech'e häpkhilek ihanej tä isolhi.

₃₀“Elh che newa n'oyej häpe t'at otayhfwa, wet elh che nitch'ota n'oye tä ohutwek wichi, häpe t'at elh tä itsatkatpe honhat.

₃₁“Wet häp tä ofwel amhohen tä oyok, Dios itäyhthiyeja letes häp wichi nilhokej lesukyajay lhäy'e lhämtes tä ni'isachehen tä isitäynej lham. Mat tek itäyhthiyeja letes häp elh che isitäynej lhämtes tä ni'isachehen häp Espíritu tä T'amajchet. ₃₂Itäyhthiyeja letes elh che häpe che itayejlä lhämet häp Hin'o Lhäs. Mat elh che itayejlä lhämet häp Espíritu tä T'amajchet, lham letes tatäyhit'a athana wet yämthilek tiyäj'attsiy.

₃₃“Häp hal'ä tä is, isen t'at lhay. Häp hal'ä tä ni'isa, isihent'a lhay. Tsi hal'ä che häpe, lhay t'at tä ikalelhät. ₃₄¡A'amlhäs t'at! ¿Chip iwoyek lhämaye m'ayhay tä isen tä ahäpehen iyhäj tä ni'isahen? Häp m'ak tä tapoyej hin'o lehusek, häpe t'at tä tälhche lak'aj tä yämlhi. ₃₅Hin'o tä is yäme t'at m'ayhay tä isen, tsi m'ak tä is ihi t'at lehusek. Wet häp hin'o tä ni'isa yäme t'at m'ayhay tä ni'isachehen, tsi m'ak tä ni'isa ihi t'at lehusek. ₃₆Ofwel amhohen, che nichäthiyela Fwala tä N'okalelhthayaj, Dios itetshanhiyeja nilhokej wichi häp lhämtes tä ni'isachehen tä iwoye. ₃₇Tsi ämtes häpkhilek tamen amej che Dios itäyhat ates wok nitäyhata.”

₃₈Elhpej Fariseo lhayis lhäy'e hin'ol tä lhayen lewosayej Ley p'ante tälhe Moisés, tahuyej Jesús wet yok:

–Maestro, olhamel ot'uhläk ow'en n'otetnek che lhenlhi n'oho.

₃₉Mat Jesús nichulho wet yok:

–¡Wichi tä ihi fwalasna lhäy'e lhip tä ni'isahen wet ileyej m'ak tä is alhoho! T'alhch'oye n'otetnek, mat naya t'at n'otetnek tä häpe profeta Jonás p'ante. ₄₀Tsi mälhyej tä Jonás ihi p'ante w'ahat tä wujche lets'e fwalas tres lhäy'e honatsis tres, wet häte Hin'o Lhäs õ'thathihola honhat fwalas tres lhäy'e honatsis tres. ₄₁Wet che Fwala tä N'okalelhthayaj, wichi tä ihi hupuy tä Nínive p'ante nehiphäla wet itihiyeja letes wichi tä iche fwalasna. Tsi Nínive lheley iwo p'ante lehusey iyhäja tä iläte Jonás lhämet. ¡Wet lhek yahinya, ikana m'ak tä inu'pe Jonás p'ante! ₄₂Häte che Fwala tä N'okalelhthayaj, häp niyat tsinha p'ante tälh tapinhiye nehiphäla wet itihiyeja letes wichi tä iche fwalasna. Tsi tej tä lhäy'e lhip tä tofwe lew'et niyat tsinhatso, mat ihoye p'ante Salomón yämthilek tach'ahuye lehanyaj. ¡Wet lhek yahinya, ikana m'ak tä inu'pe Salomón p'ante!

₄₃“Che ahät inuphä tä tälho hin'o, yik tä ilunche ts'anis, t'ukwe lew'et yämthilek iwo t'elakw'eta. Mat tä nilhokaye, yok, ₄₄Oyäpnhiyela ow'etnaj otälho. Tä tapile, hiw'en tä hin'o hätet iwoye hup tä õ'sekchufwi, wak'alh t'at, wet najit lheleya. ₄₅Tä mälhyejtso, chunkat tä yik, t'ukwe ayej iyhäj tä ihi siete tä hich'atej tä ni'isahen, wet nech'e lhamel tiyäjo häp hin'o wet yen lew'eta, wet nem koyhyaj lewit'äy, inu'pe tä ichun. Wet häp tä mälhhiyejattso lewit'äy häp wichi tä ni'isahen tä ihi fwalasna.”

₄₆Tä kamaj Jesús yämhoplhi wichi, nämhen lech'inhis lhäy'e lako María wet takasit alhoye, t'uhläk tahuyej. ₄₇Wet iche elh tä ifwenho Jesús tä yok:

–Ako lhäy'e hach'inhis i'alhoye, t'uhläk tahuy amej.

₄₈Mat Jesús nichulho lham wet yok:

–¿Atsi tä häpe oko, wet atsi tä häpe och'inhis?

₄₉Wet tapäye lechufwenkay wet yok:

–Lhamelni häp tä oko wet och'inhis. ₅₀Tsi elh at che häpe che iwoye Ojcha tä ihi pule lenech'ethayaj, häp tä och'inij, wet och'inhä, wet oko.