Mat 26

₁Tä Jesús ileyej nilhokej lhämtestso, tahuyej lechufwenkay wet yok:

₂–Amel lehanej tä tatäy ifwalas täkwfwas wet häpkhila n'okäjyaj tä Pascua. Lewhäytso õyachajila Hin'o Lhäs yämlek õhp'ajtej cruz.

₃Wet ifwalastso sacerdotes tä len'ohyajay ihiche lhäy'e hin'ol tä thänhäy, lhamel lhaihutwek tä ihi Sacerdote tä Lhamya tä lhey Caifás lew'et, ₄wet iwaklhat t'akanyaj chik iwohiyejela Jesús yämlek itsoklhi wet õ'län. ₅Mat lhamel yok:

–Isit'ak y'atihi n'okäjyaj häp m'ak tä y'awoye, häpkhilek letamsek ihi t'at wichi.

₆Wet Jesús ihoye Betania wet iyej Simón lew'et, häp hin'o tä õyen lheya Amosteyis. ₇Wet näm atsinha tä ichäj hal'ä t'i tä lenij akäjche tä wuj laha, ihi lehi tä tuntemok. Wet tä Jesús t'ek, atsinhatso ihoye wet itsäype lhetek. ₈Mat tä lechufwenkay hiw'enej, lewäk ihi wet yok:

–¿Chipte tä w'et iwom m'ak tä wuj laha? ₉Isin'ek õ'wom, wet laha chinaj t'äj tä wuj õhch'otyeneje wichi tä p'elitses. ₁₀Mat Jesús nitäfwelej letichunhayaj, wet tahuyej wet yok:

–Tejtsi atsinha, ch'anlhayeje m'ak tä iwoyej n'oye tsi wuj tä is. ₁₁Häp wichi tä p'elitses ipej amejen, mat olham pitajit'a tä oi'amejen. ₁₂M'ak tä iwoyej n'oye tä itsäy o'pe hal'ä t'i, iwaklhat n'oyej chik õtjänlahlä op'itsek. ₁₃Matche tä ofwen amhohen, Häp honhat at chik häpe chik õyen lhämetahi Dios Silätyaj tä Is, häte õyämhiyela m'ak tä atsinhana iwoyene, häpkhilek õyen tichunhayaja lham.

₁₄Wet nech'e Jesús lechufwenkay tä ihi doce elh tä lhey Judas Iscariote, yik tä ihoye sacerdotes tä len'ohyajay ihiche, ₁₅wet yok:

–¿Atsi m'ak chik lew'enla n'oho chik oyachaj amehen Jesús?

Lhamel yok:

–Treinta chinaj t'äj.

Wet hiw'enho, ₁₆wet tälhe täjtso Judas t'ukwe m'ak chik iwoye yämlek yachaje Jesús häp lhamel.

₁₇Nichäte Judío lhayis lakäjyaj tä lhamel tufw pan tä levadura newahi. Wet ifwala tä ichun, Jesús lechufwenkay ihoye lham wet tay'ätshane tä yok:

–Tä häpe Pascua, ¿atsi lew'et tä lehumin yämlek olhamel owaklhat amho äk?

₁₈Wet lham yok:

–Mäyay hoyaye hin'o tä ihi hupuy wet fwenhola, olak, “Maestro yok, Tott'a n'oye owhäy. Oyenhilhila Pascua tä oihi haw'et, lhäy'e ochufwenkay.”

₁₉Wet lhamel yikhen wet iwoye m'ak tä Jesús ne'tek iwoye, wet iwaklhat lhäk. Tä wak'alh, wet yäple Jesús.

₂₀Tä nech'e honatsi, lham ihoye huptso, lhäy'e lechufwenkay tä ihi doce. ₂₁Wet tä t'ekhen, ifwenho lhamel wet yok:

–Matche tä ofwen amhohen, Elh amel yachajilan'o.

₂₂Tä lhamel iläte, wuj tä yen lefwitajayaja, wet nech'e elhpej tay'ätshaneje wet yok:

–Iwuk, ¿elat olham p'iya?

₂₃Jesús nichulho lhamel wet yok:

–Häp elh tä lhaiw'afwlhat n'oyej tä oy'uytho pan häp lhalhäk, häp tä yachajilan'o. ₂₄Hin'o Lhäs nichäthihola leteläythayaj lhäy'e t'ilek, mälhyej tä Dios Lhämtes tä ihi Lehi yämeje. Mat ¡p'elitsaj t'at hin'o tä yachajila, lewit'äy ihihila! ¡Isi p'ante chik newache!

₂₅Wet nech'e Judas, häp hin'o tä yachajila Jesús, tahuyej wet yok:

–Maestro, ¿elat olham p'iya?

Jesús nichulho wet yok:

–Am t'at tä lewoyetso.

₂₆Tä lhamel t'ekhen, Jesús tachuma pan, wet iwo graciasayej Dios, wet hich'esajen wet hiw'enho lechufwenkay wet yok:

–Chumaye, tufway, häp täja ot'isan.

₂₇Wet äp tachuma n'olhäthi tä vino ihi, wet iwo graciasayej Dios, wet hiw'enho lhamel wet yok:

–Yäyej täja, nilhokej amel. ₂₈Häp täja ow'oyis tä nitsäyhchä häpkhilek wujpe wichi tä isej wet tatäy t'at lesukyajay. Tsi häp ow'oyisna yäm kalelhäj Dios lhämet tä hit'unteji m'ak tä iwoye. ₂₉Ofwen amhohen tä nemla oyäyej vino pajla'tha oi'amejen tä y'ehi Ojcha Leniyatyaj, nech'ehilak olhamel oyäyej vino tä nech'ayek.

₃₀Wet lhamel ichoywethä tä iten salmos. Tä ileyej, yikhen tä ihoye häp chenaj tä Oliwachat. ₃₁Wet Jesús ifwenho lhamel wet yok:

–Lhek yahinya, honajchena lelhokej amel lewomayhlan'o. Mälhyejtso Dios lhämet p'ante ihi Lehi tä yok, “Olänla tson'ataswo wet leläy itsatla'pe honhat.” ₃₂Mat chik õ'nuhthiphälan'o chik otälho n'op'itseyhay, lew'enayhlan'o kanhi Galileaye tsi pajichela oihi.

₃₃Pedro yok:

–Tejlak nilhokej iyhäj aiwom, mat olham oaiwomhit'ala.

₃₄Mat Jesús tahuyej wet yok:

–Matche tä ofwel amho, Honajchena chik kamaj n'ipa ho'o, ihihila tres chik lhäme tä katäfwela n'oyej. ₃₅Mat Pedro nichulho wet yok:

–Tejlak otn'is amej chik y'at'inhen, mat oyohit'alak, “Tek ontäfwelej.”

Wet nilhokej lechufwenkay tä lhämet mälhyejtso.

₃₆Wet Jesús lhäy'e lechufwenkay ihoye lhip tä lhey Getsemaní. Tä nichäte, Jesús ifwenhomche lhamel wet yok:

–Tachephä ayej kana. Olham oho kanhi tä owo ot'alhyaja.

₃₇Wet ichäj lhamche Pedro lhäy'e Zebedeo leles täkwfwas. Wet nech'e ilät lhame tä äytaj lelhakli lhäy'e lefwitajayaj. ₃₈Wet tahuyej lhamel wet yok:

–Olät lhame tä ofwitajayaj wuj tä ilänn'o. Lew'enay tä omähit'a, mälhe ayej kana amel, häte yej lemähen.

₃₉Wet yik tä lhaitontehlä lhimphaj häp lhamel, wet takhos katsi wet lhaip'altsene Dios tä yok:

–Ijcha, chik iche elh on'äyij, fwayhat n'oyej olhät tä tapayna tä häpe oteläythayaj. Mat oyok, woye m'ak tä am anech'ethayaj, isit'a chik häpe olham onech'ethayaj.

₄₀Tä ileyej, wet tapile lechufwenkay wet hiw'en tä imähen. Wet tahuyej Pedro wet yok:

–¿Hä amel tek lekalhayhi chik kamäyahen lhimphaj, mälhyej tä n'am mä? ₄₁Yej lemähen mat woyay alhyaja häpkhilek nikalha amhihen n'olhelhtshayaj. Tsi ohanej tä let'uhläk lewoyaye olhämet, takhajayhen t'at ahusey, mat asanis takhajayhihent'a.

₄₂Wet yachajo tä äp yik wet iwo t'alhyaja wet yok:

–Ijcha, chik newache elh on'äyij yämthilek otfwayej oteläythayajna, is t'at, is chik häpe am anech'ethayaj.

₄₃Tä ileyej, wet tapil wet hiw'en tä lechufwenkay yachajo tä imähen, tsi nahati ihiche t'at tatey. ₄₄Wet yachajo tä äp yikch'oye lhamel, wet iwo t'alhyaja, yachajo lhämtesn'e pajche iwoye. ₄₅Tä ileyej, wet tapile lechufwenkay wet yok:

–¡Kamaj lemäfwasen t'at wet lewo elakw'etesa! Lhek yahinya, nech'e nichäte lewhäy tä õyachaje Hin'o Lhäs häp wichi tä ni'isahen takweyey. ₄₆Neyachephä, n'ekhen. Lhek yahinya, näm alhoho häp elh tä yachajn'o.

₄₇Tä kamaj yämlhi Jesús, näm häp Judas tä häpe lechufwenkay tä ihi doce elh, lhäy'e wujpey wichi tä tälhe sacerdotes tä len'ohyajay ihiche, lhäy'e tä tälhe hin'ol tä thänhäy. Wet lhamel ichäjwethä lefwajnhates lhäy'e hal'äy. ₄₈Wet Judas pajche iwo letetnekayej tä ifwenho wichitso wet yok:

–Häp elh chik ots'u lech'alo, häpe lham. Tsokaylhila.

₄₉Wet tatshupiye t'at Jesús wet yok:

–¡Eh Maestro, honatsi n'amejen!

Tä iwoyetso, hits'u lech'alo. ₅₀Wet Jesús nichulho wet yok:

–Yaelh, kelit m'ak tä lewoyej n'oye.

Wet nech'e iyhäj lhayämte Jesús wet tachuma wet itsoklhi.

₅₁Mat häp Jesús let'unfwas elh itonhi lefwajnhat, ifwajej Sacerdote tä Lhamya lakawo wet ilanhi lech'ote. ₅₂Mat Jesús tahuyej elhtso wet yok:

–¡Achajo lehi afwajnhat! Elh chik häpek yen khajyhayaja n'ofwajnhat, n'ofwajnhatlak ilän. ₅₃¿Hä lefwetaj n'am kalhi chik ot'alhe Ojcha yämthilek ichen n'oye wujpey laka nifwotas ángeles? ₅₄Mat chik mälhyejtso, ¿chip iwoyek lhayäm matche Dios Lhämtes tä ihi Lehi tä yäme tä häpe t'at täja owit'äyhyaj?

₅₅Wet nech'e tahuyej wichi wet yok:

–¿Chipte tä lewoyay afwajnhatesa wet lechäjaywethä hal'äy tä lenekhen yämthilek letsokaylhin'o, letech'ayenay n'oyej hin'o tä n'olhikoy? Nilhokej ifwalas naji tä ottayphä tä oihi Dios Lew'et tä owo ochufwenyaja, wet tek letsokaylhin'o. ₅₆Mat häp owit'äyna, lhayäm matche profetas lhämtes p'ante ihi Lehi.

Wet nilhokej lechufwenkay nech'e iwom wet inukwe alhoho tä yikhen.

₅₇Häp lhamel tä itsoklhi Jesús, ihäne häp Sacerdote tä Lhamya tä lhey Caifás lew'et tä hin'ol tä thänhäy pajche ihi tä lhaihutwek, lhäy'e iyhäj tä lhayen lewosayej Ley p'ante tälhe Moisés. ₅₈Wet Pedro ihän t'at mat tek lhaitott'ayne, wet nichätho Sacerdote tä Lhamya laka alhotaj. Wet tä t'uhläk hiw'enej m'ak tä lepese, tatayphä tä iyej sip'äl tä t'uye Dios Lew'et.

₅₉Wet häp sacerdotes tä len'ohyajay ihiche, lhäy'e nilhokej Concilio, lhamel t'ukwe m'ak chik isitäynej Jesús yämthilek yen tesayej wet ne'tek õ'län. ₆₀Mat nilhokhiyet'a, tej tä wujpe wichi tä fwetaj y'ithatejlhi letes tä kamatache. Tä lepese iche iyhäj täkwfwas ₆₁tä yok:

–Hin'otsi yonajkwe, “Ohanej owoyneje tä owasthi Dios Lewukwe, wet chik fwalas tres oneyhthiphäla.”

₆₂Tä Sacerdote tä Lhamya iläte täja, nephä wet tay'ätshane Jesús tä yok:

–¿Hä ihichet'a ämet? ¿Chiwoye m'ak tä õy'ithatlhi amejna?

₆₃Mat Jesús yok tam. Wet Sacerdote äp yok:

–¡Tä y'ehi tä Dios tä n'ilataj itayche, one'tek lefwel n'ohohen m'ak tä matche! ¿Hä ahäpe N'ofwayhthi tä Dios Chenek? ¿Hä ahäpe Dios Lhäs?

₆₄Jesús nichulho wet yok:

–Am t'at tä lewoyetso. Mat lhek tetshan olhämet, oyok, Tälhe fwalasna lew'enayhla Hin'o Lhäs tä itayhiphä lhip tä lefwomkat häp Dios tä Khajay, wet tä nek i'pe pules.

₆₅Tä Sacerdote tä Lhamya iläte, hich'esajche lham lew'uyes tä ihi tä Jesús itayche, tä yen tetnekayej tä wuj tä lewäk ihi. Wet tahuyej iyhäj tä yok:

–¡Iläkwlhi Dios! ¡Naya t'at, tek y'awatlä iyhäj chik yäme letes! ¡Amel lelätaye t'at lhämtes tä ni'isachehenna! ₆₆¿Atsi m'ak tä lewoyaye?

Lhamel yok:

–Letes ihi. T'uhawetej chik õ'län.

₆₇Wet nech'e lhamel ifwats'unpe tate'pe wet inhäpäjlhi. Wet iyhäj y'ajejlhi takwech'ol ₆₈wet yok:

–¡Tä ahäpe N'ofwayhthi tä Dios Chenek, lhek n'älte atsi tä ay'aj!

₆₉Pedro i'alhoye, tatayphä t'at. Wet nech'e atsinha tä n'okawo ihoye wet yok:

–Häte am lhewej naji Jesús, häp Galilea lhele.

₇₀Mat Pedro lhaifwon tä ihi tä nilhokej tatache wet yok:

–Ohanhiyejt'a m'ak tä lhäme.

₇₁Wet ihoye lepe. Tä nichäte, wet elh n'okawo'tsinha hiw'en wet ifwenho iyhäj wet yok:

–Hin'otsi iyej naji Jesús tä Nazaret lhele.

₇₂Mat Pedro yachajo tä lhaifwon wet hit'unhatche lhämet tä yok:

–¡Ontäfwenhiyejt'a hin'otso!

₇₃Tä pajfwaj wet häte wichi tä iyej ihoye wet yok:

–Matche tä ahäpe t'at lhamel elh. Tsi tä lhämlhi, n'äl tä ahäpe Galilea lhele.

₇₄Wet nech'e Pedro yäm äytajche lhämet tä iyetlhi wet yok:

–¡Is chik Dios yen tesa n'oyej chik kamatache olhämet tä oyok, Ontäfwenhiyejt'a hin'otso!

Häpet tä mälhyejtso, wet ho'o y'ip. ₇₅Wet Pedro nech'e lehusekch'oye Jesús lhämet mathi tä yok, “Chik kamaj n'ipa ho'o, ihihila tres chik lhäme tä katäfwela n'oyej.” Wet Pedro yikch'oye tä ihi wet wuj tä tafwlhi.