Mar 11

₁Tä Jesús lhäy'e lechufwenkay tott'aye p'ante Jerusalén, nichätho hupuyhas tä Betfagé lhäy'e Betania tä ihi lhip chenaj tä lhey Oliwachat. Wet Jesús ichen täkwfwas lhamel ₂wet ifwenhomche tä yok:

–Mäyay hoyaye häp wichi tä y'attaye l'ini, wet che lechätaye, lew'enla asnofwaj tä õ'nayhit tä kamaj kan'ow'uteya. Lanhila wet chäja alhoho. ₃Wet che iche elh che yok, “¿Chipte tä lelanhi?”, olak, “Lhawuk tä iwatlä, mat inachajila.”

₄Lhamel yikhen, tä nichätho wichi lew'etesas, hiw'en asno tä õ'nayhit tä ihi lakawayhi, iwhäye huppe, wet lhamel ilanhi.

₅Wet wichi tay'ätshane tä yok:

–¿Chi lewoynayeje asno? ¿Chipte tä lelanayhi?

₆Lhamel nichulho wet yok:

–Lhawuk tä iwatlä, mat inachajila.

Tä wichi iläte, iwahintshi

₇wet lechufwenkay ichäje Jesús. Tä näme, wet lhamel ithatpe lew'uyis wet nech'e Jesús i'pe. ₈Wet wujpe wichi tä hich'enche lew'uyis häp n'äyij, wet iyhäj hich'enche hal'ä pesey tä pajche yisthen tälho tayhi. ₉Wet häp lhamel tä ichun lhäy'e iyhäj tä imälheche len'äyij, lhamel t'änhen wet yok:

–¡Lewujyaj ihi! ¡Is che Lhawuk itiyej lakäpfwayaj tä is häp hin'o tä näm tä Lhawuk lhämetej! ₁₀¡Wujyen lhachäti David niyatyaj tä nek! ¡Wunit Dios tä ipuleye!

₁₁Jesús nichätho Jerusalén wet ihoye Dios Lew'et wet iyahinlhi. Tä ileyej, wet yäple Betania, lhäy'e lechufwenkay tä ihi doce, tsi honaj t'at.

₁₂Ifwala elh p'ante, lhamel yikch'oye Betania wet Jesús nichuyu. ₁₃Wet hiw'ene häp higo lhile tä lew'oley ihi, wet ihoye, t'uhläk hiw'en che lhay ihi p'iya. Mat tä nichäte, hiw'en tä newache, tajlhamat lew'oley tä ihi, tsi häp tä kamaj lewhäyhit'a che iwo lhaya. ₁₄Wet nech'e tahuye wet yok:

–¡Nemla iche elh che tuj ay!

Wet lechufwenkay iläte lhämetna.

₁₅Tä lhamel nichätho Jerusalén, Jesús tiyäjo häp Dios Lew'et wet yokwesphä lhamel tä ihi tä iwom lhäy'e tä ichäj m'ayhay. Wet itilhkatchehchä mesas tä lewuk lhamel tä iwo iyhäjahi chinaj t'äj, lhäy'e häp lew'etes tä iyej lhamel tä iwom hokwinhas. ₁₆Wet iwahnhiyejt'a wichi tä ifwutche tä tilhäj m'ak at che häpe. ₁₇Wet nech'e iwo lechufwenyaja wet yok:

–Dios lhämet tä ihi Lehi yok, “Ow'et lheyla N'ot'alhyaj tä Lew'et, yämthilek wichi tä tälhe honhat at che häpe ihoye tä iwo t'alhyaja.” ¡Matlhat amel lhenayp'at etantsesw'eta!

₁₈Häp sacerdotes tä len'ohyajay ihiche, lhäy'e hin'ol tä lhayen lewosayej Ley p'ante tälhe Moisés, tä lhamel ilätch'oye täjtso, nech'e t'ukwe m'ak che iwoyeje Jesús yämthilek ilän. Tsi nowaye, häp tä wichi wuj tä ihumin lechufwenyaj. ₁₉Mat tä honatsi lham lhäy'e lechufwenkay yikch'oye hupuy.

₂₀Häp ifwala elh tä nech'e ifwala, lhamel inukwe lhip häp higo lhilenaj Jesús tahuye, wet hiw'en tä y'il tälhe lefwetes. ₂₁Wet nech'e Pedro lehusekch'oye wet ifwenho Jesús tä yok:

–Maestro, lhek yahinya, häp higo lhilenaj letakäpfwayeje lewit'äyhyaj, y'il t'at.

₂₂Wet Jesús yok:

–Chayaye häp Dios. ₂₃Matche tä ofwel amhohen tä elh at che häpe che tahuye chenajni wet yok, “¡Mäch'oye tä lhehi, athat inäte!”, wet matche, mälhhiyejattso, che nilhahtayej lakachuhanyaj mat ichaye mälhyej tä ne'tek lhaiwoyneje. ₂₄Wet häp tä ofwel amhohen tä oyok, M'ak at che häpe che let'alhaye tä lewo alhyaja, chaye tä lekatej, wet matche, ihlat amejen. ₂₅Wet che lewoyay alhyaja, täyhatay m'ak at che häpe tä lhen tesayej aelh, häpkhilek häte Ajchayay tä ihi pule itäyhat amejen ates.

₂₇Wet lhamel yachajo tä nichätho Jerusalén, wet tiyäjo häp Dios Lew'et. Wet tä Jesús ilunche lhip, sacerdotes tä len'ohyajay ihiche ihoye, lhäy'e hin'ol tä lhayen lewosayej Ley p'ante tälhe Moisés, lhäy'e hin'ol tä thänhäy, ₂₈wet tay'ätshane Jesús wet yok:

–¿Chi tälhe han'ohyaj tä lewoye m'ayhay tä lhenlhitso? ¿Atsi tä hiw'en amho?

_29-30Jesús nichulho wet yok:

–Häte iche m'ak tä olham oty'ätshanej amehen. ¿Chi tälhe Juan Bautista len'ohyaj tä ibautisaynhente wichi? ¿Hä tälhe Dios wok hin'ol? Lhek chulh n'oho, wet häte olham ofwenla amhohen elh tä on'ohyaj tälhe tä owoye m'ayhay tä oyenlhitso.

₃₁Tä lhamel iläte, yämwethä lhamhohen tä yok:

–¿Atsi m'ak tä y'awoye? Chik y'ok, “Tälhe Dios”, wet lham yohlak, “Tä mälhyejtso, ¿chipte tä kat'ekhayaye?” ₃₂Mat ¿chihla iwoye chik y'ok, “Tälhe hin'ol...”?

Tsi lhamel nowaye wichi, häp tä nilhokej ihumin Juan wet fwetaj matche tä häpe profeta. ₃₃Tä mälhyejtso, lhamel nichulho Jesús wet yok:

–Ohanhiyejt'a.

Wet Jesús yok:

–Tä mälhyejtso, olham häte tek ofwel amhohen elh tä on'ohyaj tälhe tä owoye m'ayhay tä oyenlhitso.