Mar 12

₁Jesús tahuyej lhamel wet itech'aynej täja lhämtes wet yok:

–Iche hin'o tä yenlhi lelafwek wet itihchä uva, wet äp tijo tunte tä yen lehiya t'i, wet häte äp yenlhi hup tä tojphä yämthilek elh tä t'uye nilhokej ihi. Tä wak'alh, hiw'enho ayej häp chumhas, ne'tek ichumyenlhi, wet lham yik tä ihoye honhat elh. ₂Tä nichäte lewhäy, ichen lakawo, ne'tek yike m'ak tä chumhas hiw'enhatej tä tälhe lechumet. ₃Mat tä nichäte, lhamel itsoklhi wet ipäjlhi, wet ichen tä niwohit m'ak che hiw'enho. ₄Wet lewuk ichen elh lakawo, mat lhamel iläkwlhi wet iwo lelätsekahi lhetek. ₅Tä paj ichen elh, mat lhamel ilän. Wet wujpe tä ichenpej, mat iyhäj õ'päjwethä wet iyhäj õ'länhen.

₆“Mat kamaj imälhehi hin'o weihalha tä häpe t'at lhäs tä lehumnek. Wet tä lepese ichen t'at häp lhästso, tsi letichunhayaj yok, Lhamel tek yenla w'et m'ayeka, tsi olhäs t'at.

₇“Mat tä nichäte, wet chumhas yok, Häp täjtsi hin'o tä lewukla honhatna. ¡Mäh n'alän, wet n'amenlak n'alewuhuy!

₈“Wet lhamel itsoklhi wet ilän, wet ithat w'echehi n'olafwek häp lep'itsek.”

₉Wet nech'e Jesús äp yok:

–Tä mälhyejtso, ¿chiwoye lewuk? ¿Atsi m'ak tä lefwetajay iwohiyela? Oyok, nämla wet itäyhthihena häp laka chumhas, wet yachajiyela wichi iyhäj häp lechumettso.

₁₀“¿Hä tek leyahyenay häp Dios lhämet tä ihi Lehi tä yok,

₁₂Tä lhamel iläte täjtso, t'uhläk itsoklhi Jesús, tsi nitäfwelej tä lhamel t'at tä õ'tech'aynej chumhas tä ni'isahentso. Mat tä lhamel nowaye wichi, wet ileyej wet yikhen.

₁₃Tä paj wet õ'chene Jesús häp elhpej Fariseo lhayis lhäy'e iyhäj tä ihän Herodes lhayis, lhamel t'uhläk iläte lhämet yämlek yen tesayej. ₁₄Tä lhamel nichäte, wet yok:

–Maestro, olhamel ohanej tä ahäpe hin'o tä matche m'ak tä lhäme, wet nehit katsik lenowaye, wet letetshanhit'a hin'ol tä fwetaj häpehen iyhäj tä isen, mat lechufwenej t'at wichi m'ak tä Dios ne'tek lhamel iwoye. Tä mälhyejtso, olhamel oty'ätshan ame tä oyok, ¿Hä is t'at tä otis häp niyat Romano tä t'alhpe impuestos, wok kha? ¿Hä is alhoho wok ni'isa alhoho p'iya?

₁₅Mat Jesús nitäfwelej tä lhamel fwetaj ikanej, wet yok:

–¿Chipte tä lhelhtay n'oye? Lhek hänay n'oye chinaj t'äj yämlek oyahin.

₁₆Wet lhamel ihäne, wet Jesús tay'ätshane tä yok:

–¿Atsi tä lepeyäk lhäy'e lhey tä i'pe?

Lhamel yok:

–Häpe t'at niyat Romano.

₁₇Wet Jesús yok:

–Tä mälhyejtso, achaje niyat Romano häp m'ak tä lewuk, wet achaje Dios häp m'ak tä Lewuk lham Dios.

Wet lhamel wuj tä iseltejen tä iläte lhämettso.

₁₈Iche p'ante Judío lhayis iyhäj tä lhey Saduceo lhayis, fwetaj n'op'itseyhay ninuyakwephä. Wet elhpej lhamel ihoye Jesús wet yok:

₁₉–Maestro, häp Moisés hin'äy p'ante n'amejen lelesaynek tä yok, “Che hin'o iwo lech'efwaya, wet äp y'il tä kamaj naj lelesa, t'uhawetej che lech'inij icheyäjo lew'et wet yen ch'efwaya häp tesa, yämthilek iche leles tä tälhe elh tä pajche y'il.” ₂₀Tä mälhyejtso, iche p'ante siete hin'ol tä lhalepuhfwas, wet elh tä ichun iwo lech'efwaya, mat tä ileyej honhat wet leles ihihit'a. ₂₁Wet lech'inij tä ichunche äp iyej laka tesa, mat häte tä ileyej honhat wet leles ihihit'a. Wet äp lech'inij elh äp iyej, mat äp hätet iwoye lechilalis. ₂₂Wet mälhyej p'antetso yäk nofwej häp lhamel tä ihi siete, mat niwohit elh che leles ihi. Tä lepese atsinha häte ileyej honhat. ₂₃Tä mälhyej'attso, tä wichi yäme tä inuhikwephäla häp n'op'itseyhay yämthilek äp yachajo che iläyhen, ¿atsihila elh lhamel tä atsinhana lech'efwa? Tsi pajche nilhokej lhamel tä siete iyej.

₂₄Jesús nichulho lhamel wet yok:

–Lewetahen amel, tsi letäfwenhiyejt'a Dios lhämtes tä ihi Lehi lhäy'e häp Dios lakhajyhayaj. ₂₅Tsi che inukwephä n'op'itseyhay, hin'ol lhäy'e atsinhay nemla tawhayeyhen, häp tä mälhhiyeja iwoye häp ángeles tä ipuleye. ₂₆Wet tä õyäme tä n'op'itseyhay inukwephä, ¿hä tek leyahyenay häp Moisés lesaynek tä ihi Lehi, häp lhip tä yäme amlhäj lhawayuk tä itäj ihi p'ante? Häp tä Dios ifwenho Moisés tä yok, “Ohäpe häp Abraham laka Dios, Isaac laka Dios, wet Jacob laka Dios.” ₂₇Wet häp tä mälhyejtso, Dios häpe t'at wichi tä iläyhen laka Dios, tej tä pajche lhamel ileyej honhat. Amel wuj tä lewetahen.

₂₈Wet näm elh hin'ol tä häpe lewo Ley p'ante tälhe Moisés. Lham iläte Saduceo lhayis lhämtes tä iwoye, wet hiw'en tä is alhoho m'ak tä Jesús nichulhlä lhamel. Tä mälhyejtso, tay'ätshane Jesús tä yok:

–¿Atsi Dios lhämet tä inu'pe nilhokej iyhäj?

₂₉Jesús nichulho wet yok:

–Häp Dios lhämet tä inu'pe iyhäj, häp tä yok, “Ch'ahuyaye, Israel lhayis, häp n'amel Lhawuk Dios tajlhamat lham tä lhawuk. ₃₀Humin Awuk Dios, mälhewek ahusek, lhäy'e mälhewek atichunhayaj, lhäy'e mälhewek akhajyhayaj.” ₃₁Wet lhämet elh tä tumejlä häpe tä yok, “Humin aelh, tech'ayen amej tä alehumin.” Ihichet'a Dios lhämet tä inu'pe tähesna.

₃₂Tä hin'otso iläte Jesús lhämtesna, wet yok:

–Matche, Maestro, is alhoho ämet. Weihalha t'at Dios, ihichet'a elh. ₃₃Wet chik ohumin lham, mälhewek ohusek, lhäy'e mälhewek ohanyaj, lhäy'e mälhewek okhajyhayaj, wet äp otiyej ohumnhayaj oelh, otech'aynej tä olhaihumin, häp tä is, laha inu'pe nilhokej itshäwet tä õ'län wet õ'wunho wet õyen n'okhayajayej Dios.

₃₄Tä Jesús iläte m'ak tä hin'o nichulhejlä, wet hiw'en tä lehusek ihi wet yok:

–Tek a'atofwehlä häp Dios Niyatyaj.

Wet tajyäme täjtso, nemhit ikatsik äp tektshaneje yämthilek tay'ätshaneje Jesús m'ak at chik häpe.

₃₅Jesús iwo lechufwenyaja tä ihi Dios Lew'et, wet tay'ätshane wichi tä yok:

–¿Chipte tä hin'ol tä lhayen lewosayej Ley p'ante tälhe Moisés yäme tä N'ofwayhthi tä Dios Chenek tälhe David p'ante? ₃₆Tsi David lham tä isej p'ante Espíritu tä Dios T'amajchet tä lhaithatho wet yämyenlhi tä yok,

Wet wichi tä wuj ihumin tä tach'ahuye Jesús.

₃₈Wet Jesús iwo lechufwenyaja tä yok:

–Amaj amejenlä häp hin'ol tä lhayen lewosayej Ley p'ante tälhe Moisés. Tsi ihumin tä lew'uyis pites tä ilunhen, wet t'upejläk wichi n'okwiyej tä hiw'enlä wet itiyej lewujyaj. ₃₉Tä ihi n'ohusew'etes, ihumin lew'etes tä t'uhläk nilhokej wichi hiw'en, wet tä ihoye n'okäjyajay, häte iwatlä lew'etes tä isis. ₄₀Lhamel isoyejwethä tesalis lewukwey, wet tä lhaiskatejwethä tä häpehen akantses, yäm pites t'alhyajay tä iwoye. Oyok, ¡lhäy'ehila lhip chik Dios itiyejen letes lhamel!

₄₁Tä kamaj Jesús ihi Dios Lew'et, wet ihowhäye lhip tä Dios t'awayhtes lehis ihi wet tatayhiphä tä lhamel tatache, t'uhläk iyahin häp wichi tä ithatho chinaj t'äj. Wet wuj chinaj t'äj tä wichi tä hiw'en m'ayek ithatho. ₄₂Wet näm atsinha tesa tä p'elitsaj, wet ithatho täkwfwas chinaj t'äj tä lhimphaj laha. ₄₃Wet Jesús t'äne häp lechufwenkay wet yok:

–Matche tä ofwel amhohen, Häp m'akfwaj tä tesa tä p'elitsajtso ithatho lehi inu'pe m'ak tä nilhokej iyhäj ithatho. ₄₄Tsi m'ak tä lhamel iwom häpe t'at m'ak tä imälheyej, mat häp lham tä p'elitsaj iwom nilhokej m'ak tä isej.