Jesús yäme Dios Lew'et tä wasihila
1Tä Jesús yikch'oye häp Dios Lew'et, wet lechufwenkay elh yok:
–Maestro, ¡lhek yahinya, matche tä isis hupuy tä Dios Lew'etna, lhäy'e tuntey tä lhäy'e lhip tä wus tä õyenejwethä!
2Mat Jesús ifwenho tä yok:
–¿Hä lew'en nilhokej hupuyna? Lhek tetshan olhämet, oyok, Niwohit tunte chik ihla'pe elh. Imälhehilawek chik wasihila.
M'ayhay tä äyteschehen
3Wet lhamel yikhen tä iho'pe häp chenaj tä Oliwachat tä tatayhlä Dios Lew'et. Tä yäm kanhi, Jesús tatayphä, wet tä ts'ilak lham lhäy'e Pedro, Santiago, Juan, lhäy'e Andrés, lhamel tay'ätshane tä yok:
4–Lhek fwel n'ohohen, ¿atsi lewhäy chik ihichela m'ak wit'äytso? Wet chik tott'aye tähestso, ¿atsi n'otetnek chik ihichela?
5Jesús nichulho wet yok:
–Uyayhlä, häpkhilek nehit katsik aiwetahat. 6Tsi wujla'pe lhamel tä nämhihena wet yenla lheya olham olhey, yohlak, “Ohäpe N'ofwayhthi tä Dios Chenek.” Wet lhamel iwetahatla wujpe wichi.
7“Chik leläthiyela tä õyäme n'oka'tshayajay tä ni'tosayehen lhäy'e tä toye tä ihiche honhates tä atosehen, yej nuhata amhohen. Tsi ihichela tähestso, mat kamaj häpkhit'ala lewhäy tä lepes. 8Tsi wichi tä ihiche honhates tatayhlawek, wet niyatey iwohla laka'tshayajayej niyatey iyhäj. Wet ihichela honhat w'ahu tä äytesiche tä ihiche honhates, lhäy'e häp nehläs. Mat nilhokej tähesna hätehlat iwoye atsinha tä nech'e iwo tesa tä lhailät tä takaw'ahan.
9“U'amehen amel, tsi tä ahäpehen iyhäj tä ihänlhin'o, õyachajila amehen häp concilios wet õ'aipäjlawethä tä ihiche n'ohusew'etes. Häte õ'hänla amehen häp niyatey lhäy'e n'owustas. Mat chik mälhyejtso, nech'e lehanayej lewoyneje chik lhenay ämetan'o tä lhehi tä lhamel tatache. 10Wet häp tä chik kamaj kalepesa, iwohiyet'ak õkniwoya silätayej nilhokej wichi tä ihiche honhates häp Dios Silätyaj tä Is.
11“Wet chik õyachaj amehen niyatey, yej lhak'ale ämet chik lewohiyela, mat ena ämeta m'ak chik Dios hiw'en amhohen häp lewhäytso. Tsi khit'ala amel chik lhämwethä, mat häpkhila häp Espíritu tä Dios T'amajchet.
12“Ofwel amhohen tä iyhäj tä lhalepuhfwas yachajiyela t'ilek häp lepuhfwas, wet lajchalis yachajiyela t'ilek häp leles, wet leles tatayhlahlä lajchalis wet ne'tehlak õ'länhen. 13Wet tä ahäpehen iyhäj tä ihänlhin'o, nilhokej wichi n'äyihila amhomche. Mat elh chik nileyayej mat tujlhache t'at yäk lepes, häpkhilek tafway.
N'olhakli tä lhäy'e lhip tä äytaj
14“Lew'enayhla häp m'ak tä tanhowatnhan tä hich'atej tä ni'isa chik ihi tä kalew'eta. (Häp am tä leyahyen, hanej n'olhämetna.) Chik taj lewhäytso, wet häp lhamel tä ihi honhatna tä Judea is chik ilethane chenhas. 15Wet häp elh chik i'pe lewukwe lhip tä tumphä, isit'ak yike lakhäy tä ichufwi lewukwe tä inuhchä, mat is tä yik t'at. 16Wet elh chik ihi lelafwek, isit'ak tapile lew'uy.
17“Häp ifwalastso wuj tä p'elitsesla atsinhay tä hich'otshanhen lhäy'e iyhäj tä tach'awejwethä leles. 18Alhaye Dios häpkhilek m'ak wit'äytso ninäma chik fwiy'etil. 19Tsi häp ifwalastso häpkhila n'olhakli tä ihanhiyejt'a chik iche, tälhe tä nech'e Dios yenlhi honhat yäk nämena, wet tek äp ihichela ifwalas tä iw'echehi tä oyämetso. 20Wet chik Lhawuk yämhi pitaj lewhäytso, nehit katsik tafway. Mat häp iyhäj tä lham pajche tatshupiye, häp tä tamenej tä yämhit'ala pitaj.
21“Wet ifwalastso, chik wo elh chik ifwel amhohen chik yok, ¡Lhek yahinya, ikana N'ofwayhthi tä Dios Chenek!, wok elh yok, ¡Lhek yahinya, ikanhi!, yej chayela lhämet. 22Tsi n'änhila häp hin'ol tä fwetaj häpehen N'ofwayhthi tä Dios Chenek, wok fwetaj häpehen Dios lhämetwos. Lhamel yenlawethä letetnhay tä iselkatejen wichi, t'uhläk iwetahat iyhäj tä pajche Dios tatshupiye, chik ikalhi p'iya. 23¡Uyayhlä! Nilhokej tähesna pajche ofwel amhohen athana tä kamaj nichätaye lewhäy.”
Jesús tapinla alhoho
24Wet Jesús äp yok:
–Mat häp ifwalastso, chik tajyäme lewhäy häp n'oteläythayajtso tä wuj, wet ifwala y'omhila, iwel'a nemla isi, 25wet katetsel nathichelahchä, wet m'ayhay tä ipuleye nemla kalelhäjen lew'etes. 26Wet nech'e wichi hiw'enla Hin'o Lhäs tä nek i'pe pules, tä ihi lakhajyhayaj tä wuj lhäy'e lesilatyaj. 27Wet ichenla laka ángeles, ne'tehlak ihutwek wichi tä lham pajche tatshupiye tä tälhe tä ifwala tälhche, lhäy'e tä ifwala y'uy, lhäy'e tä tafwojhiye, lhäy'e tä tapinhiye, lhäy'e tä tälhe honhat lhip tä tajlhama yäk nichäte lhip tä lepese.
28“Lhek achufwenejen ochufwenyaj tä otech'aynej higo lhile. Chik lhachal nech'e w'atshan wet iwo tesa tä tälh lak'asel, wet lehanayej tä nämla yachup. 29Wet häp tä hätet iwoye, chik lew'enay chik mälhyej tä oyämetso, hanayej tä Hin'o Lhäs tott'a alhoho wet nämla. 30Matche tä ofwel amhohen, Ihichela nilhokej m'ayhaytso tä kamaj nileyayej honhat häp wichi tä ihi ifwalasna. 31Häp pule lhäy'e honhat nemla iche, mat olhämtes ihichepeja, nofwit'ala.
32“Mat häp fwala wok hora tä häpkhila, nehit katsik ihanej, tej tä Lhajcha laka ángeles tä ipuleye, lhäy'e lham Lhäs, ihanhiyejt'a, tajlhamat lham Lhajcha tä ihanej.
33“Wet täjtso häp tä tamenej tä oyok, Yej tekm'ahatwethä wet yej lemähen, tsi tek lehanayej häp lewhäy che nämla. 34Hätet iwoye che oyäme häp hin'o tä iwo lew'ekyaja tä ihoye honhat elh. Chunkat ne'tek lakawos t'uye lew'et, wet hiw'enho elhpej häp lechumet tä is che iwoye, wet äp ne'tek huppewo lhäy'e lhip tä nowaype. 35Wet häp tä mälhyej'attso, oyok, Yej lemähen, tsi lehanhiyejt'a lewhäy chik hup lewuk nämla. Elat honaj p'iya, wok honatsi chowej, wok chik ho'o y'ip p'iya, wok chik nech'e ifwala. 36Tsi elat iselkatpe honhat chik näm, wet nilhok amehen tä lemähen. 37Tä mälhyejtso, m'ak tä ofwel amhohen ofwenho nilhokej, oyok, ¡Yej lemähen!”
