Israel lhayis lhaifwelej lech'isukyajay
1Ifwala tä veinticuatro, häp iwel'atso, wet Israel lhayis lhaihutwek yämthilek lhaichuyhathen. Wet taw'uyhiche lew'uyis tä yelaj wet itsäche'pe lhethey häp honhat. 2Wet lhaitiyej kanhihlä wichi tä w'enha lhamej tä iyej, wet takasthen wet yok:
–Olhamel och'isukyaj ihi, hätet iwoye olhamel ochätilis p'ante.
3Wet lhamel takasthen tres horas wet õyahyen Lewuk Dios lhämtes. Wet tä õ'leyej, äp tres horas tä lhamel lhaifwelejen lech'isukyajay wet n'okwiyej Lewuk Dios. 4Wet nech'e Leví lhayis tä lheyis Josué, Binuy, Cadmiel, Sebanías, Buni, Serebías, Bani, lhäy'e Quenani, lhamel iho'pe n'ot'äsawet wet ifwitsenej lechos tä t'änch'oye Lewuk Dios. 5Wet Leví lhayis tä häpe Josué, Cadmiel, Binuy, Hasabnías, Serebías, Hodías, Sebanías, lhäy'e Petaías, lhamel tahuyej wichi wet yok:
“¡Nechephä, wunitay Awuk Dios
yämthilek tiyäj'attsiy!
¡Wujyen häp lham tä lewujyaj ihi,
tej tä lham matche tä inu'pe ämtes tä lewujyenej!”
6Wet wichi iwo t'alhyaja wet yok:
“Ahäpe Dios tä matche, ihichet'a elh.
Am lhenlhi pule lhäy'e nilhokej katetsel,
wet lhenlhi honhat lhäy'e nilhokej m'ayhay tä ihi,
häp lewomekitas lhäy'e nilhokej m'ayhay tä ihi.
Am lewo lew'atshancheyaja nilhokej,
wet nilhokej katetsel tä ihi pule n'okwi amej.
7“Iwuk, am tä letatshupiye p'ante Abram,
wet letonphä tä ihi Ur
tä ihi Caldeo lhayis kahonhat,
wet nech'e lhen lheya Abraham.
8Lew'en tä häpe hin'o tä t'ekha ame,
wet häp tä let'untejche ämet tä lewoyeje tä lhok,
Ow'enhihola ales häp honhat tä lewuk Canaán lhayis,
Het lhayis, Amorreo lhayis,
Ferez lhayis, Jebús lhayis,
lhäy'e Gerges lhayis.
Wet pajche lematitche t'at ämet,
tsi ahäpe Dios tä matche.
9“Wet lew'en p'ante olhamel ochätilis
leteläythayajay tä ihi Egipto,
wet tä paj p'ante leläte lhamel t'änyajay
tä lhamel iwhäye p'ante Lewomekchät.
10Lew'en tä Egipto lheley lhaichäjwethä
wet itiyej leläkwyhanyaj häp ochätilis.
Wet häp tä lhenlhi p'ante n'otetnhay,
lhäy'e m'ayhay tä wichi iseltejen
tä letayhtejlä Egipto kaniyat,
lhäy'e leniyatfwas,
lhäy'e nilhokej wichi tä ihi laka honhat.
Wet aka wichi yämepej
m'ayhay tä lewoye p'ante yäk nämena.
11Wet lepäyne p'ante ochätilis
tä lech'esajche lechowej inät tä lewomekitaj,
wet lhamel inukwe lechowej tä tamchäy.
Mat häp wichi tä fwetaj ihän lhamel,
häp tä hich'ahen wet nichät lech'oye inät,
hätet iwoye tunte tä nichäte inät tä pitoj.
12Wet tä ifwala lechunkatlä aka wichi
pule tä hätet iwoye tutsaj tä inukwe len'äyij.
Wet tä honatsi y'uho t'at häp puletso
tä hin'älitche len'äyij tä lhamel inukwe.
13“Wet lenuhchä p'ante tä lhe'pe chenaj Sinaí,
wet letahuye lhamel tä lhe puleye.
Wet lew'enho ämtes tä isen
lhäy'e achufwenyajay tä matchehen.
14Lechufwenej lhamel tä is chik
yen t'amajcheta amej ifwala tä n'ot'elakw'et,
wet lew'enho lhamel häp aka leyes
tä akawo Moisés ichufwenejen.
15Häte lew'enho p'ante lhamel
häp lhäk tä tälh puleye
yämthilek nehläs nilänahen,
lhäy'e inät tä tälho chenaj
yämthilek neheläp nilänahen.
Wet lene'tek lhamel tiyäjo honhat
tä pajche lefwenho p'ante lhamel.
16“Matkat olhamel ochätilis lhaichäjwethä,
wet lhait'unthen wet iwohiyet'a ämtes.
17Tä lhamel nit'uyahläk tach'ahuye,
wet nitichunhichet'a m'ayhay tä äyteschehen
tä lech'otyeneje lhamel.
Wet tä lhait'unthen,
lhamel t'uhläk iwo laka niyata
yämthilek lhamel yäple Egipto,
häp honhat tä yen kwenkaya.
Mat ahäpe Dios tä itäyhtej hin'o letes,
Dios tä is wet hap'altsentsaj.
Lekenhiyejt'a awäk, leteläytej t'at,
wuj ahumnhayaj, wet lelehiyejt'a lhamel.
18Wet lhamel yenlhi p'ante lhamhohen w'asetaj tä oro,
wet tahuy lhamejen tä yok,
¡Häp täja lhaka dios
tä itonphänaj n'amel tä y'ehi Egipto!
Wet wuj lhämtes tä ni'isachehen
tä lhamel iwoye p'ante.
19Mat wuj hap'altsenyaj
wet lelehiyejt'a lhamel
tä ihi honhat tä ts'anis.
Tä ifwala pule tä ichunlä lhamel
tä ipäyne len'äyij,
yikhit'ach'oye lhamel.
Wet tä honatsi ihutunpe lhamel,
hätet iwoye itäj tä y'uho,
wet n'älche t'at honhat tä inukwe.
20Wet tä ha'isyaj ihi, lechufwenhen olhamel.
Häte lhamel lhäk iche t'at
tä lechene maná yämthilek tufw,
wet lew'enho inät yämthilek neheläp nilänahen.
21Wet cuarenta nekchämis tä lew'enho
m'ak tä iwatlä tä lhamel ihi ts'anis,
wet niwohit m'ak chik tatäyej.
Häte lew'uyis tek wasiche,
wet tek lepach'ol t'ukwahen.
22“Lhachaje lhamel n'oniyatyajay
lhäy'e wichi tä ihiche,
wet lew'enhatejen lhipey honhates
wet yen laka honhatesa.
Lhayen lewuhuya häp niyat Sehón kahonhat tä lhey Hesbón,
lhäy'e niyat Og kahonhat tä lhey Basán.
23Wet lew'enho leles tä wujpey,
hätet iwoye katetsel tä ihi pule.
Wet lelestso lehäne honhat
tä pajche lefwenho p'ante letetsel,
yämthilek lhamel lhayen lewuhuya.
24Wet matche,
lhamel tiyäjo honhat tä Canaán
wet lhayen lewuhuya.
Wet lekalhi wichi tä lew'et
wet lhachaje lhamel lhäy'e laka niyatey häp aka wichi,
yämthilek iwoyeje m'ak tä ihuminche.
25Wet lhamel ikalhi t'at hupuy
tä õyen lep'otesa n'olafwey tä tach'opwayhen,
lhäy'e yachuyajw'etes,
lhäy'e hupuy tä n'okäywetes tapokwe,
lhäy'e n'opek lhayis tä inät ihiche,
lhäy'e n'olafwey tä uvas ihiche,
lhäy'e olivos lhäy'e iyhäj hal'äy
tä wujpey tä n'olhäk lhay.
Wet Israel lhayis tufw wet yipsejen wet yätajen,
wet yen lakäjyaja hap'altsenyaj tä wuj.
26“Mat lhamel häpehen wichi tä iwohiyet'a ämtes,
wet tatay ahilä wet yen w'et m'ayeka aka Ley.
Wet ilänhen aka profetas
tä ifwenho tä letes ihi lhamel
wet ne'tek lhamel iwo lehusey iyhäja.
Mat iwohiyet'a, iwoyej ame lhämtes
tä lhäy'e lhip tä ni'isachehen.
27Häp tä tamenej tä lhachaje letayhfwas
yämthilek lhayen niyatayej lhamel.
Tä paj tä lhamel lelhakli ihi, t'än hach'oye.
Wet tä wuj hap'altsenyaj,
letach'ahuye t'at tä lhe puleye,
wet lewo laka niyateya
yämthilek ifwayhtej letayhfwas.
28Mat tä lhamel hiw'enpej tä letamsekis ihi,
yachajopej tä iwoye m'ak tä ni'isa.
Wet häp tä letach'anlhaye t'at
yämthilek letayhfwas yachajo tä ikalhi
wet lhayen niyatayej lhamel.
Mat äp lhamel yachajo tä t'änpej hach'oye,
wet tä hap'altsenyaj ihi,
letach'ahuye t'at tä lhe puleye,
wet wujpey tä lefwayhtejpej lewit'äyhyaj lhamel.
29“Wet lene'tek lhamel iwoye ämtes,
mat lhamel fwetaj niwohit m'ak chik iwatlä.
Wet tach'ahuhiyet'a,
inäk'äs ämtes tä pajche wak'alhen
tä iwo lew'atshancheyaja wichi chik iwoye.
Mat lhamel lhait'unthen wet niwoyaye,
wet tatayhlä.
30Wet wujpe nekchämis tä leteläytej t'at lhamel,
wet lefwenhopej ämtes, häp tä isej aka Espíritu
tä yämyenwethä aka profetas.
Mat lhamel tek tach'ahuye,
wet häp tä tamenej tä lhachaje
wichi tä i'pe honhat.
31Mat tä ahäpe Dios tä wuj tä hap'altsentsaj,
wet letiyej lhamel hap'altsenyaj,
wet tek lehämtej lhamel wet lewomhit'a.
32“Dios tä olhamel oka Dios,
Dios tä lewujyaj ihi lhäy'e tä takhajay,
tek letäyhat ämet tä let'untejche olhamel,
lhäy'e ahumnhayaj tä wuj.
Tichunche t'at tä wuj olhamel owit'äyhyaj,
olhamel oka reyes, lhäy'e oka niyatey,
lhäy'e sacerdotes, lhäy'e profetas,
lhäy'e olhamel ochätilis p'ante,
lhäy'e nilhokej wichi,
tälhe t'at lewhäy tä Asiria laka reyes
iwoyej n'oyehen yäk häp athana.
33Mat amhit'ak letamen n'oyejen
tä owit'äyhyaj mälhyejtso.
Tsi is at alhoho m'ak tä lewoye
tä olhamel owoye t'at m'ak tä ni'isa.
34Olhamel oka reyes, lhäy'e oka niyatey,
lhäy'e sacerdotes, lhäy'e olhamel ochätilis,
nilhokej iwohiyet'a ämtes,
tej tä lewo silätayej m'ayhay tä ihiyeja lhamel.
35Wet tä lhamel leniyatyaj ihi, lhäy'e lakäywet,
lhäy'e yachuyaj tä wuj
tä ihi honhat tä lew'enho lhamel,
lhamel ayenhit'a Lewuka
wet ilehiyejt'a m'ayhay tä ni'isachehen tä iwoye.
36“Lhek yahin olhamel ifwalana,
wichi lakawos n'ohen
tä oihi honhat p'ante lew'enho olhamel ochätilis
yämthilek lhamel tufw lhay tä iche
wet akäsejwethä m'ayhay tä isen.
Matche, wichi lakawos olhamel.
37Häp m'ak tä wuj tä tälho honhatna
lewuk t'at reyes tä lhen oka niyateya
tä lhen tesa n'oyejen och'isukyajay.
Wet lhamel iwoyej at n'oyehen
m'ak chik t'uhläk iwoyej n'oyehen, lhäy'e oläy,
wet wuj tä olhamel olhakli ihi.”
Wichi hit'unhatche lhämet tä iwoyeje Lhawuk
38“Nilhokej täjtso tamenej tä olhamel ot'unhatche olhämet tä owoyej ame wet olesayen, wet olhamel oka niyatey, lhäy'e Leví lhayis, lhäy'e sacerdotes, iwo firmaya.
