Núm 10

₁Lhawuk tahuyej Moisés wet yok:

₂–Enlhi täkwfwas afwolis trompetas tä plata, häne n'okäjnhat tä lhenwethä, häpkhilek õyafwutche chik õt'äne wichi wok õne'tek yikhen. ₃Wet chik õyafwutche n'ofwolis, häp tä is chik nilhokej wichi lhaihut ame tä ihi tä tatache häp carpa tä owukwe. ₄Mat chik tefwajni tä õyafwutche, häp tä is chik ts'ilak hin'ol tä wichi kaniyatey tä lhaihut ame. ₅Wet chik õyafwutchehen täkwfwas n'ofwolis, lhäy'e n'ot'änyaj tä äytaji, häp tä is chik wichi yikhen. Ichun wichi tä tumej hichä, ₆wet chik äp õyachajo tä õyafwutchehen, nech'e häp wichi tä tumej tapinhiye tä is chik yikhen. Tä mälhyejtso, chik õyafwutchehen n'ofwolis lhäy'e n'ot'änyaj tä äytaji, häp tä yikhen wichi. ₇Wet chik ts'ilak n'ofwolis tä õyafwutchehen, häp tä is chik wichi lhaihutwekhen. ₈Wet iyhäj tä yafwutchehen n'ofwolis häpe t'at sacerdotes, tä häpehen Aarón leles. Yej leleyayej tä lhenay akeya tähestso, pajla'tha nichäte ales tä lepes lheley.

₉“Wet chik lhehi honhat tä alewukla, wet wichi inu amehen, wet lhistejlä lhamel, afwutchehena afwolis wet fwitseneja tä let'änhen. Häpkhilek olham tä ohäpe Awuk Dios ontichunhila hach'oyehen, wet ofwayhthila amejen atayhfwas. ₁₀Häte häp ifwalas tä lewo akäjyaja, wok häp tä iwel'a nech'ayek, chik lelänhen itshätäy tä lewunhomche tä lhen han'okhayaja n'oyej, lhäy'e tä lelänhen itshätäy iyhäj yämthilek ale'isyen n'oye, afwutchehena afwolis. Chik lewoye täjtso, ontichunhila hach'oyehen. Ohäpe Awuk Dios.”

₁₁Iwel'a dos, häp ifwala veinte, tä häpe nekchäm weihalha tälhe ifwala p'ante Israel lhayis yikch'oye Egipto, wet häp pule tä i'pe carpa tä Lhawuk lhämet ichufwi, yik. ₁₂Wet Israel lhayis iwo tesa lew'ekyaj tä yikch'oye ts'anis tä Sinaí. Wet pule tä ichunlä lhamel takasit tä ihi ts'anis tä lhey Parán.

₁₃Wet tä lhamel yikhen, mälhyej tä Lhawuk ifwenho Moisés yämthilek wichi iwoye, ₁₄ichun nifwotaj tä yikhen tä häpe wichi tä tälhe letes Judá, wet lhamel laka niyat Aminadab lhäs tä lhey Nahasón. ₁₅Wet elh tä lhayen lhetekayej nifwotaj tä häpe wichi tä tälhe letes Isacar, häpe Suar lhäs tä lhey Natanael. ₁₆Wet elh tä lhayen lhetekayej nifwotaj tä häpe wichi tä tälhe letes Zabulón, häpe Helón lhäs tä lhey Eliab.

₁₇Wet õ'nachu Lhawuk lewukwe, wet Leví lhayis tä tälhe letetsel tä lheyis Gersón lhäy'e Merari, häp tä lhamel tilhäj wet yikhen.

₁₈Wet nifwotaj tä häpe wichi tä tälhe letes Rubén, lhamel imälheche wichitso len'äyij, wet lhamel laka niyat Sedeúr lhäs tä lhey Elisur. ₁₉Wet elh tä lhayen lhetekayej nifwotaj tä häpe wichi tä tälhe letes Simeón, häpe Surisaday lhäs tä lhey Selumiel. ₂₀Wet elh tä lhayen lhetekayej nifwotaj tä häpe wichi tä tälhe letes Gad, häpe Reuel lhäs tä lhey Eliasaf.

₂₁Wet nech'e yikhen Leví lhayis tä tälhe letes Coat, lhamel tilhäj m'ayhay tä n'ot'amajchetes. Tä lhamel nichäthopej lhip tä takasthi, pajche wak'alh häp carpa tä Lhawuk lewukwe.

₂₂Wet nech'e äp yikhen nifwotaj tä häpe wichi tä tälhe letes Efraín, wet elh tä lhayen lhetekayej häpe Amihud lhäs tä lhey Elisama. ₂₃Wet elh tä lhayen lhetekayej nifwotaj tä häpe wichi tä tälhe letes Manasés, häpe Pedasur lhäs tä lhey Gamaliel. ₂₄Wet elh tä lhayen lhetekayej nifwotaj tä häpe wichi tä tälhe letes Benjamín, häpe Gedeoni lhäs tä lhey Abidán.

₂₅Wet iyhäj tä imälheche nifwotas len'äyij tä yikhen, häpe wichi tä tälhe letes Dan, wet elh tä lhayen lhetekayej häpe Amisaday lhäs tä lhey Ahiezer. ₂₆Wet elh tä lhayen lhetekayej nifwotaj tä häpe wichi tä tälhe letes Aser, häpe Ocrán lhäs tä lhey Pagiel. ₂₇Wet elh tä lhayen lhetekayej nifwotaj tä häpe wichi tä tälhe letes Neftalí, häpe Enán lhäs tä lhey Ahira.

₂₈Häp täjtso m'ak tä iwoye Israel lhayis lhäy'e laka nifwotas wet yikhen.

₂₉Moisés tahuyej lhachifwa Hobab tä lajcha Moisés kachäti Reuel tä lew'et Madián. Wet yok:

–Olhamel oyikhen tä ohoye honhat tä olhamel Owuk Dios ifwel n'ohohen tä yok, “Ow'enla amhohen.” Athana ot'uhläk lenekche olhamel, ot'amajila amej, tsi Owuk ifwel tä t'amajiyeja Israel lhayis.

₃₀Mat Hobab nichulho wet yok:

–Kha, oyikhit'a amchehen. Oyäpnhiyelat oka honhat, wet oyäple opuhfwas.

₃₁Mat Moisés lhaip'altsene wet yok:

–Yej lhekch'oye olhamel. Am wuj tä letäfwelej lhipey tä is tä ihi ts'anisna yämthilek olhamel owo kasthawetahi. Olhamel oisila amej chik lepäyen n'oyehen n'äyij, atehlat iwoyek olhamel ottelho. ₃₂Chik lenek n'okwehen, ow'enla amho lhip m'ayhay tä isen chik Lhawuk hiw'en n'ohohen.

₃₃Wet Israel lhayis yikch'oye Lhawuk laka chenaj Sinaí, wet tres ifwalas tä lhamel iwo lew'ekyaja. Wet Arca tä N'ot'amajchet tä Lhawuk lhämtes ihi, häp tä ichunlä lhamel tä t'ukwe lhip tä is yämthilek iwo lakasthawetahi. ₃₄Wet Lhawuk kapule i'pe lhamel ifwalapej, tälhepej tä lhamel yikch'oye lakasthawet. ₃₅Wet chik yikhenpej iyhäj tä tilhäj Arca, Moisés yopejkwe:

₃₆Wet chik takasthenpej lhamel tä tilhäj Arca, wet Moisés yopejkwe: