N'okäjyaj tä Pascua
1Tälhe ifwala p'ante Israel lhayis yikch'oye Egipto, nech'e nekchäm weihalha wet iwel'a tä ichun, Lhawuk tahuyej Moisés tä ihi ts'anis tä Sinaí. Wet yok:
2–Is chik Israel lhayis iwo lakäjyaja tä Pascua häp ifwala tä lewhäy, 3wok oyok, iwel'ana, häp ifwala tä catorce chik honaj. Is chik iwoye nilhokej m'ak tä one'tek iwoye, mälhyej tä olesayen yämthilek õ'woye tä ihi n'okäjyajna.
4Tä mälhyejtso, Moisés ne'tek Israel lhayis iwo lakäjyaja chik nichäte häp ifwala tä Pascua. 5Wet ifwala tä catorce, häp iwel'atso, lhamel iwoye t'at tä honaj tä lhamel ihi ts'anis tä Sinaí. Iwoye nilhokej m'ak tä Lhawuk ifwenho Moisés yämthilek lhamel iwoye.
6Mat iche iyhäj hin'ol tä lakokhayaj ihi wet kan'ot'amajchetesa tä lhamel itsok n'op'itsek. Wet häp tä lhamel ihanhiyejt'a chik iwoye lakäjyaj tä Pascua häp ifwalatso. Wet lhamel ihoye Moisés lhäy'e Aarón, 7wet tahuyej tä yok:
–Olhamel otsoknaj n'op'itsek, tä mälhyejtso, ohäpehen iyhäj tä lakokhayaj ihi. ¿Chiwoye, hä tek õ'wahin n'oyejen chik olhamel owo t'awayhata Lhawuk häp ifwala tä lewhäy, yämthilek op'akej iyhäj Israel lhayis?
8Moisés nichulho lhamel wet yok:
–Taye ayej, chik Lhawuk ifwel n'oho m'ak chik amel lewohiyela.
9Wet Lhawuk tahuyej Moisés wet yok:
–Fwenho olhämetna häp Israel lhayis. 10Nilhokej amel, lhäy'e tä lepes lheley, is chik iwoyepej Pascua yämthilek iwunit Lhawuk. Häp lhamel tä lakokhayaj ihi tä itsok n'op'itsek, wok häp iyhäj tä iche len'äyij tä atojche tä iwo lew'ekyaja, 11is chik lhamel iwo lakäjyaja iwel'a elh tä tatay alhoho, chik ifwala tä catorce tä honaj. Is chik lhamel tufw tson'ataj, lhäy'e pan tä levadura newayej, lhäy'e hal'ä w'oley tä tapay. 12Mat isit'ak t'amajej lhip yämthilek tufw tä ifwala elh. Häte isit'ak inäk'äs itshäwet lhile chik häpe. Is chik iwoye nilhokej Lhawuk lhämtes tä ne'tek iwoye chik iwo lakäjyaja chik Pascua. 13Mat elh chik niwoya lakäjyaja häp ifwala tä Pascua, wet niwohit m'ak chik tamenej tä niwoya lakäjyaja, wok häp tä lakokhayaj ihi, wok häp tä iche len'äyij, hin'otso õ'sohiyeja tä iyej Israel lhayis. Tä niwoya t'awayhata Lhawuk häp ifwala tä lewhäy, wet elhtso lham t'at tä tilhäj lech'isukyaj.
14“Wet häp wichi tä kahäpeya Israel lhayis tä i'amejen, häte is chik lhamel iwo lakäjyaja häp ifwala tä Pascua yämthilek iwunit Lhawuk, wet iwoye nilhokej lhämtes tä ne'tek wichi iwoye tä Pascua. Wet lhämtestso y'aje amel tä ahäpe Israel lhayis lhäy'e iyhäj tä kahäpeya tä i'amejen.”
Pule i'pe Dios Lew'et
15Häp ifwala tä õ'neyhatphä häp Lhawuk lewukwe, wok oyok, carpa tä Lhawuk lhämet ichufwi, wet pule hip'o'pe. Wet tälhe tä nech'e honatsi nichätpe honhat, iche m'ak tä y'uho tä hätet iwoye itäj tä i'pe Lhawuk lewukwe, imälhewek honatsi pajtha nech'e fwala. 16Wet mälhyejpejtso, tä ifwala pule hip'o'pe carpa, tä honatsi hätet iwoye itäj tä y'uho. 17Wet chik puletso yikch'oye carpa, Israel lhayis yikhen tä iwo lew'ekyaja. Wet lhip chik ihi tä takasit puletso, häp tä wichi iwo lakasthaweta. 18Wet chik Lhawuk ne'tek yikhen Israel lhayis, yikhen t'at. Wok ne'tek lhamel iwo lakasthawetahi lhip chik häpe, lhamel ihi t'at tä pule nekach'oye Lhawuk lewukwe. 19Wet chik pitaj ifwalas tä puletso nekach'oye Lhawuk lewukwe tä i'pe, Israel lhayis yikhihent'a, iwoye t'at m'ak tä Lhawuk ne'tek lhamel iwoye. 20Wet chik nintäkwa ifwalas tä pule i'pe Lhawuk lewukwe, wichi ihi t'at lakasthawet, pajtha Lhawuk yok, “Mähen”, wet yikhen t'at. 21Chejphäpej pule takasit honatsi hätefwajni, wet tä nech'e fwala yik t'at wet Israel lhayis tujlhache t'at lew'ekyaj. Häte chik honatsi tä puletso yik, Israel lhayis yikhen t'at tä tujlhache lew'ekyaj. 22Wet chik puletso takasitpe Lhawuk lewukwe täkwfwas ifwalas, wok iwel'a tefwajni, wok nekchäm tefwajni, Israel lhayis iwo lakasthaweta, tek yikhen. Mat chik puletso yik, nech'e lhamel tujlhache len'äyij. 23Chik Lhawuk yok, “Wo akasthaweta”, iwoye t'at. Wet chik yok, “Mähen”, lhamel yikhen t'at. Lhamel iwoye t'at Lhawuk lhämet tä ifwenho Moisés tä ne'tek lhamel iwoye.
