Israel lhayis tatayhlä Lhawuk wet t'uhläk yäple Egipto
1Tä wichi iläte m'ak tä hin'oltso yäme, nilhokej lhamel t'änhen, wet tafwchehchä imälhewek honatsi. 2Wet lhamel itiyej lhämtes tä ni'isachehen häp Moisés lhäy'e Aarón. Wet lhamel yok:
–¡Isn'aj chik op'itseyhay ihi t'at Egipto wok oihi t'at ts'anisna! 3¿Chipte tä Lhawuk ihän n'oyehen honhatna? ¿Hä t'uhläk ilän n'oyejen n'oka'tshayaj, yämthilek otayhfwas ichäj olhamel oles lhäy'e och'efwas? ¡Is chik oyäple Egipto!
4Wet yämwethä lhamhomche wet yok:
–¡N'awo lhaka niyata wet n'äple Egipto!
5Tä Moisés iläte, lhäy'e Aarón, lhamel t'upechehchä pajtha letachol taji honhat tä lhamel ihi tä wichi tatache. 6Wet Josué lhäy'e Caleb tä lhäy'es naji iyhäj tä lhamel iyahinpe honhat, hich'esajche lew'uy tä yen tetneka tä wuj tä äytaj letichunhayaj. 7Wet tahuyej Israel lhayis wet yok:
–¡Mathichet'a! ¡Honhat tä olhamel oyahinnajpe wuj tä isilataj! 8Chik y'akänitlhi Lhawuk, lham tach'otla n'amehen wet y'atiyäjihola, wet hiw'enla n'amhohen honhattso. Häpe t'at honhat tä t'os lhäy'e akäyek tet iwoye inät, iläfwelchehen tä ihi. 9Mat yej tatayhlä Lhawuk, wet yej nowaye wichi tä ihi honhattso, tsi lhamel hätehlat iwoye pan chik y'atufw. Ihichet'a laka dios chik t'uyehen, mat häp n'amel iche Lhawuk tä t'u n'amehen. ¡Yej nowayhen!
10Mat tä wichi iläte, t'uhläk ithatejwethä tuntey.
Lhawuk iwo lewäka mat Moisés lhaip'altsene yämthilek ileyej
Mat Lhawuk lewujyaj lhain'älit tä ihi carpa, wet nilhokej Israel lhayis hiw'en. 11Wet Lhawuk tahuyej Moisés wet yok:
–¿Atsihila ifwalak wichina ileche tä yenn'o w'et m'ayeka? ¿Wet atsihila ifwalak lhamel ileyej lakachuhanyaj tä iti n'oyej, tej tä owoyeje m'ayhay tä t'iseltejen? 12Olänhiyejena t'inhayaj wet otäyhthila lhamel. Mat am oyämla wujpey wichi chik tälh ame wet takhajayhen, inuhla'pe lhamelna.
13Mat Moisés nichulho Lhawuk wet yok:
–Wichina isejnaj akhajyhayaj tä wuj tä letonphä lhamel tä ihi Egipto. Chik lelänhihena lhamel, wichi tä ihi Egipto ihanlach'oye m'ak chik lewoyeje lhamel, 14wet ifwenhihola wichi tä ihi Canaán. Lhamel Canaán lheley itoyne t'at tä am lhe n'oyejen, wet olhamel oaiw'en tä lhehi pule tä lhe'pe olhamel. Tä ifwala lechunlä olhamel wet tä honatsi puletso hätet iwoye itäj tä y'uho tä hin'älitpe olhamel. 15Wet chik lelänhen wet letäyhthen aka wichina, nilhokej wichi tä i'pe honhat tä atoyaj y'aje lhamel, yohlak, 16“Israel lhayis laka Dios fwetaj ihäne laka wichi häp honhat tä ifwenho p'ante lhamel tä yok, Ow'enla amhohen. Mat ikalhihit'a, häp tä tamenej tä ilänhen tä ihi ts'anis.”
17“Olhaip'altsen ame athana, n'älit akhajyhayaj tä wuj, mälhyej tä lhämenaj 18tä lhok, Ohäpe Dios tä nakenhiyejt'a lewäk. Oteläytej t'at, wet wuj ohumnhayaj, otäyhtejen wichi lech'isukyajay tä iwoye lhäy'e tä tatay n'ohlä. Mat ihichet'a elh chik häpe chik otasnhayaj newayej tä letes ihi. Otasin lhamel tä iwoye m'ak tä ni'isa, lhäy'e leles, lhäy'e lechetsos.
19“Tä mälhyejtso tä wuj ahumnhayaj, täyhat t'at m'ak tä ni'isa tä wichina iwoye. Tsi tälhe tä lhamel yikch'oye Egipto, leteläytej m'ak tä lhamel iwoye pajtha näm kana.”
Lhawuk itasin Israel lhayis
20Lhawuk nichulho Moisés wet yok:
–Is t'at, otäyhat lhamel letes, mälhyej tä let'alhej n'oye. 21Mat tä ohäpe Elh tä n'ilataj wet owujyaj tapoyej honhat, oyok, 22-23Ihichet'ala elh chik häpe lhamel chik nichätho honhat tä ofwenho p'ante letetsel. Lhamel pajche hiw'en owujyaj, lhäy'e m'ayhay tä wichi t'iseltejen tä owoye tä oihi Egipto, lhäy'e tä owoye tä oihi ts'anis. Mat lhamel yelhatpej n'oye wet tach'ahuhiyet'a olhämtes. Tä mälhyej'attso, oyok, ihichet'ala elh chik häpek tatey hiw'enla honhattso, häp tä lhamel yenn'o w'et m'ayeka. 24Ts'ilak okawo Caleb tä lehusek w'enha lhamej, tek häte iwoye iyhäj wet ilehit'a n'oyej. Lham häpkhilek otiyäjaynho honhat tä pajche iyahinpe, lhäy'e leles yämthilek lhamel yen laka honhata. 25Athana Amalek lhayis lhäy'e Canaán lhayis lhamel ihi lhipey tä w'awulhchä. Chik fwala äpilche han'äyij tä letälhche, wet nukwe ts'anis tä letiyäje Lewomekchät.
26Wet äp Lhawuk tahuyej Moisés lhäy'e Aarón wet yok:
27–¿Atsihila ifwalak lepes tä oteläytej häp wichi tä ni'isa tä häpe Israel lhayis? Oläte t'at lhämtes tä ni'isachehen tä itipej n'oyej. 28Mäh hoye lhamel wet fwenho olhämetna: Olham tä ohäpe Lewuk Dios tä n'ilataj ot'unhatche olhämet tä owoyeje lhamel. Owohiyejela m'ak tä lhamel yämetso tä ni'isa. 29Nilhokej wichinaj õ'lesayen lheyis tä õ'wo t'ufwahtesa, tälhe lhamel tä hiw'en veinte nekchämis, y'inhihena. Lep'itseyhay ihlatpe ts'anisna, häp tä lhamel iti n'oyej lhämtes tä ni'isachehen. 30Ihichet'ala elh tefwajnik tiyäjihola honhatnaj otiyejphä otkwey tä oyok, “Ow'enla amhohen wet lhenla haw'eta.” Ts'ilak Caleb lhäy'e Josué tä nichäthihola.
31“Mat häp leles tä yäme tä letayhfwas ichäjla, häpkhilek ohänho, wet hiw'enla häp honhat tä lajchalis y'ulhan wet yen w'et m'ayeka, wet lhamenlak isej. 32Lajchalis lep'itseyhay ihlatpe ts'anisna, 33wet leles ilunlatpe ts'anisna cuarenta nekchämis tä lhamel iteläytej laha lajchalis lakachuhanyaj, pajla'tha lajchalis nofwej chik y'inhen tä ihi ts'anisna. 34Wet tä cuarenta ifwalas tä iyahinpe honhat, tä mälhyejtso häte cuarentahila nekchämis tä otasnhayaj. Ifwala tefwajni laha nekchäm tefwajni, häpkhilek wichi hiw'en n'o'pe tä tatay n'ohlä. 35Olham tä ohäpe Lewuk Dios, häp täjtso olhämet. Owoynhiyejelatso m'ak tä owoyeje wichi tä akachuhantses wet lhaip'ajtitwek tä tatay n'ohlä. Lepes t'at lhamel lew'atshancheyaj tä ihi ts'anisna. Ihihila täja tä y'inhen.”
Diez hin'ol tä pajche iyahinpe honhat y'inhen
36-37Häp hin'ol tä Moisés ichen yämthilek lhamel iyahinpe honhat, lhamel yäme tä ni'isa häp honhat, wet tamenej tä wichi iwoye lhämtes tä ni'isachehen. Wet häp tä Lhawuk ichätyenpe t'inhayaj tä matche tä ni'isa häp lhamel, wet y'inhen. 38Ts'ilak Josué lhäy'e Caleb tä n'ilahen.
Letayhfwas ikalhi Israel lhayis tä ihi lhip tä lhey N'otäyhyaj
39Tä Moisés ifwenho Israel lhayis häp Lhawuk lhämet, nilhokej wichi wuj tä lefwitajayaj ihi. 40Wet tä ifwala elh tä nech'e fwala, lhamel nechephä wet iho'pe lhip tä chenhas tä atojphä. Wet lhamel yok:
–Matche tä lhawetahayaj ihi wet y'awoye t'at m'ak tä ni'isa. Mat athana y'awak'alh t'at. ¡Mäh n'ahoye honhat tä Lhawuk ifwel n'amhohen!
41Mat Moisés tahuyej lhamel wet yok:
–¿Chipte tä lekachu Lhawuk lhämtes? ¡Lekalhihit'ala m'ak tä lefwetajay lewoye! 42¡Yej lhekhen, tsi Lhawuk ihit'a amejen! ¡Atayhfwas ikalhla amhihen! 43Amalek lhayis lhäy'e Canaán lhayis iniwhi ahilähen yämthilek iwo ka'tshayaja amejen wet ailänhen. Häp tä amel leleyayej Lhawuk, wet lham nemhit i'amejen.
44Matkat lhamel yikhen t'at, tiyäjpe lhip tä chenhas tä atojphä. Mat Arca tä N'ot'amajchet tä Lhawuk lhämtes lehi, ihi t'at wichi lew'et. Wet Moisés häte yikhichet'a wichi. 45Wet häp Amalek lhayis lhäy'e Canaán lhayis tä ihi lhiptso, takähännhej Israel lhayis pajtha nichäte lhip tä lhey N'otäyhyaj, wet ilänhen.
