Israel lhayis itäyhthen Madián lhayis
1Lhawuk tahuyej Moisés wet yok:
2–Is chik Israel lhayis iwo laka'tshayajayej Madián lhayis, häpkhilek laha ihihlä m'ak tä Madián lhayis iwoyeje. Wet chik tajyäme n'oka'tshayaj, am let'inla, lehohiyela achätilis.
3Tä mälhyejtso, Moisés ifwenho wichi wet yok:
–Is chik iyhäj amel lhaiwaklhat yämthilek iwo laka'tshayaja wet inuye Madián lhayis, häpkhilek Lhawuk itiyej letasnhayaj wet aha ihihlä lhamel. 4Is chik nilhokej wichi tä tälhehen doce letetsel, iyhäjpej ichen mil laka nifwotaj yämthilek ihoye n'oka'tshayaj.
5Wet lhamel iwoye t'at täjtso, wet iche doce mil (12.000) hin'ol tä nilhokej wet lhaiwaklhathen yämthilek iwo laka'tshayaja. 6Wet Moisés ichen lhamel, wet sacerdote Eleazar lhäs tä lhey Finees häp tä yikche nifwotaj. Wet ichäj m'ayhay tä n'ot'amajchetes tä ihi Dios lew'et, lhäy'e trompetas yämthilek yafwutche chik nichäte lewhäy wet ne'tek nifwotaj inuye letayhfwas.
7Wet lhamel iwo laka'tshayaja wet tatayhlä Madián lhayis, mälhyej tä Lhawuk ne'tek Moisés iwoye, wet ilänhen nilhokej hin'ol. 8Lhamel ilänhen cinco Madián lhayis laka reyes tä lheyis Eví, Rekem, Zur, Hur, lhäy'e Reba. Häte ilän profeta Balaam, Beor lhäs. 9-11Wet iwunhomche nilhokej laka hupuy lhäy'e lew'etes, wet ichäj atsinhay wet yen kwenkaya, lhäy'e leles, wet tachuma nilhokej leläy w'asetas lhäy'e tson'atas, lhäy'e nilhokej lakhäy. 12Wet ihäne Moisés lhäy'e Eleazar lhäy'e nilhokej Israel lhayis tä ihi lew'et tä ihi honhat tä Moab lhip tä w'awulhchä tä tumej tewok Jordán lhip tä tatayhlä hupuy tä Jericó.
Moisés ne'tek õ'länhen Madián lhayis ka'tsinhay wet õ'lej m'ayhay tä õ'soyej
13Wet Moisés lhäy'e Eleazar lhäy'e nilhokej wichi kaniyatey, lhamel tälho lew'et wet yikhen tä ihohlä nifwotaj tä yäpil. 14Wet tä Moisés nichutej, wuj tä fwitsaje häp nifwotaj kaniyatey tä tälhe n'oka'tshayaj. 15Wet Moisés yok:
–¿Chipte tä kalänahen atsinhay? 16Tsi lhamel tä iwoye naji Balaam lhämet, wet yen ch'efwasa Israel lhayis, wet tamenej tä Israel lhayis ileyej Lhawuk wet n'okwiyej dios tä kamatache tä lhey Ba'al-peor. Wet häp tä Lhawuk ilänejen t'inhayaj häp laka wichi Israel. 17¡Mäh länhen athana nilhokej nä'tshas tä hin'ol lhäy'e nilhokej atsinhay tä pajche n'och'efwas! 18Iyhäj tä kamaj kan'och'efwasa yej länhen, wet a'en lewuka lhamel.
19“Wet elh chik häpe amel tä ilänhen wichi, wok elh chik itsok n'op'itsek, isit'ak tiyäjo wichi lew'et pajla'tha siete ifwalas tä i'alhoye. Wet amel lhäy'e atsinhay tä letsokwethä, is chik alelejen chik tres ifwalas, wet chik lechäte ifwala tä lepes siete ifwalas, achajo tä alelejen, 20lhäy'e haw'uyis, lhäy'e nilhokej m'ayhay tä tsänt'ähes, lhäy'e n'oyhiy tä kayla w'ole, lhäy'e m'ak at chik häpek hal'ä.”
21Wet sacerdote Eleazar tahuyej nilhokej sip'äl tä tälhe n'oka'tshayaj, wet yok:
–Ch'ahuyaye Lhawuk lhämet tä ifwenho Moisés tä yok, 22“M'ayhay tä oro, plata, bronce, chinaj, estaño, wok chinaj mok, 23nilhokej m'ak chik t'un wet itäj nikalha, is chik õ'thatho itäj yämthilek noj lech'ohle, wet õ'lejej inät tä lecha. Wet m'ayhay tä nit'una wet itäj ihanej chik itäyhat, is chik tajlhamat inät tä õ'lejej. 24Wet chik lechäte lepes ifwalas tä siete, is chik amel lelejen haw'uyis, häpkhilek noj akokhayaj. Wet nech'ehilak lhäpnho wichi lew'et.”
Israel lhayis hiw'en lhamhomche n'okäywet tä lewuk letayhfwas
25Lhawuk tahuyej Moisés wet yok:
26–Is chik am lhäy'e sacerdote Eleazar, lhäy'e hin'ol tä iyhäj kaniyatey, ikalelhätchä wichi lhäy'e itshätäy, lhäy'e nilhokej m'ayhay tä lesoyej Madián lhayis. 27Wet ch'esajche lechowej, wet lhip häp tä lew'enhihola häp hin'ol tä iwo laka'tshayaja, wet lhip achajela wichi. 28Wet m'ak tä lew'enho sip'äl, chumela lhip tä lew'enhat n'oyej, atsinha lhutshay, weyis lhayis, asnolis, tson'atas, kayla lhayis. Wet quinientospej chuma weihalha tä tälho tä lhen otw'ayhata, 29wet w'enhola sacerdote Eleazar. 30Wet atsinha lhutshay tä lew'enhatej wichi, chumela iyhäj lhamel, lhäy'e weyis lhayis, asnolis, tson'atas, lhäy'e kayla lhayis, wok oyok, nilhokej itshätäy. Wet cincuentapej chuma weihalha tä tälho wet w'enhola Leví lhayis, häp lhamel tä tachumwethä tä ihi ow'et.
31Wet Moisés lhäy'e Eleazar iwoye mälhyej tä Lhawuk ne'tek Moisés iwoye. 32Tä nilhok m'ak tä Israel lhayis isoyej letayhfwas, iche seiscientos setenta y cinco mil (675.000) tson'atas lhäy'e kayla lhayis, w'enha lhamej m'ak tä sip'äl pajche tachuma, 33lhäy'e setenta y dos mil (72.000) weyis lhayis, 34lhäy'e sesenta y un mil (61.000) asnolis, 35lhäy'e treinta y dos mil (32.000) atsinha lhutshay.
36-40Wet lechowej tä õhw'enho sip'äl häpe trescientos treinta y siete mil quinientos (337.500) tson'atas lhäy'e kayla lhayis, lhäy'e treinta y seis mil (36.000) weyis lhayis, lhäy'e treinta mil quinientos (30.500) asnolis, lhäy'e dieciséis mil (16.000) atsinha lhutshay. Wet õhw'enhatej Lhawuk seiscientos setenta y cinco (675) tson'atas, lhäy'e setenta y dos weyis lhayis, lhäy'e sesenta y un asnolis, lhäy'e treinta y dos atsinha lhutshay. 41Wet Moisés yachaje sacerdote Eleazar häp lhip tä õhw'enhatej Lhawuk, mälhyej tä Lhawuk ne'tek iwoye.
42Wet häp n'okäywet lechowej tä lewuk Israel lhayis, w'enha lhamej m'ak tä lewuk sip'äl. 43Wet õhw'enho lhamel trescientos treinta y siete mil quinientos (337.500) tson'atas lhäy'e kayla lhayis, 44lhäy'e treinta y seis mil (36.000) weyis lhayis, 45lhäy'e treinta mil quinientos (30.500) asnolis, 46lhäy'e dieciséis mil (16.000) atsinha lhutshay. 47Wet cincuentapej atsinha lhutshay Moisés tachuma weihalha tä tälho, wet äp cincuentapej itshätäy äp tachuma weihalha tä tälho. Wet hiw'enho Leví lhayis, häp lhamel tä tachumwethä tä ihi Lhawuk lew'et. Häp täjtso m'ak tä Lhawuk ne'tek Moisés iwoye.
Sip'äl iwo t'awayhata Lhawuk
48Wet sip'äl kaniyatey tä laka sip'äl milpej, lhäy'e iyhäj tä laka sip'äl cienpej, lhamel ihoye Moisés 49wet yok:
–Olhamel tä akawos n'ohen owo t'ufwahtesa oka sip'äl, wet niwohit elh chik tatäy. 50Wet ochäj kana m'ayhay tä oro tä elhpej olhamel ohutwek tä häpe n'otkwet'äfwates, n'ofwushis, n'och'ote lheley, lhäy'e iyhäj m'ayhay tä isis. Wet oyachaje Lhawuk tä otiskanej letapehen.
51-52Wet Moisés lhäy'e Eleazar tachuma m'ayhay tä oro tä sip'äl kaniyatey yachaje Lhawuk. Tä nilhok, inu'pe ciento ochenta y cuatro (184) kilos, 53tsi elhpej sip'ä ichäje lhip Moisés häp m'ak tä isoyej letayhfwas. 54Tä mälhyejtso, Moisés lhäy'e Eleazar lhamel tachumlä oro tä sip'äl kaniyatey ichäje, wet lhamel ihäne carpa tä Lhawuk lewukwe, yämthilek Lhawuk yenpej tichunhayaja häp Israel lhayis.
