Honhat lepesey
1Lhawuk tahuyej Moisés wet yok:
2–Fwenho Israel lhayis olhämetna, oyok, “Amel letiyäjihola honhat tä Canaán, wet häpe t'at honhat tä amel aka honhatla. Wet líneas tä lepeseyla häp tähesna:
3“Honhat lepes tä tumej tapinhiye tälhiyela ts'anis tä lhey Zin wet inuhikwela honhat tä Edom lepes. Wet tälhe lhip tä hichä, líneatso tälhiyela Lewomekitaj Nosoy lhip tä tumej tapinhiye. 4Wet tatayhiyela lhip tä fwala y'uy wet ifwahichela chenaj lhip tä lhey Chitsomw'et. Wet tälhe täja tiyäjihola ts'anis tä Zin wet taje hupuy tä Kadés-barnea lhip tä tumej tapinhiye. Tälhe täja inuhikwela Hasar-adar pajla'tha nichäte Asmón. 5Tälhe täja inuhikwela tewok lhäsaj tä tumejlä Egipto pajla'tha nichäte lewomekitaj Mediterráneo, wet lepes häp línea.
6“Wet honhat lepes tä tumej kaphä häpkhila lewomekitaj Mediterráneo.
7“Wet honhat lepes tä tumej tafwojnhiye is chik letälhte lewomekitaj Mediterráneo pajla'tha nichäte chenaj tä lhey Hor. 8Wet tälhiyela chenajtso pajla'tha nichäte chenhas kawayhi tä ihi Hamat. Tälhe täja línea tiyäjiyela Sedad, 9tälhe täja tiyäjiyela Zifrón wet lepesla Hasar-enán.
10“Wet honhat lepes tä hichä is chik letälhte Hasar-enán pajla'tha nichäte Sefam. 11Wet tälhe täja tiyäjiyela Ribla tä ihi hupuy tä N'opek lhip tä tumej hichä. Wet tälhe täja inuhikwela lewomekitaj tä lhey Kineret lhip tä tumej hichä, 12wet tiyäjiyela tewok Jordán pajla'tha nichäte Lewomekitaj Nosoy.
“Häp tähestso líneas tä aka honhat lepeseyla.”
13Wet Moisés tahuyej Israel lhayis wet yok:
–Häp täjtso honhat tä lew'enla amhomche chik lewohla sorteaya. Häp honhat tä Lhawuk ne'tek õhw'enhomche wichi tä tälhehen nueve letetsel lhäy'e Manasés kawichi lechowej. 14-15Tsi iyhäj wichi, wok oyok, wichi tä tälhe letes Rubén, lhäy'e iyhäj tä tälhe letes Gad, lhäy'e lechowej Manasés kawichi, pajche lhamel ikatej honhates tä lewuhuy, häp tewok Jordán lhip tä tumej hichä tä tatayhlä Jericó.
Lhawuk itshupyene iyhäj hin'ol yämthilek hiw'enhatejen honhates häp wichi
16Lhawuk tahuyej Moisés tä yok:
17–Häp hin'ol tä hiw'enhihomchela honhates häp Israel lhayis, häpe sacerdote Eleazar lhäy'e Josué, Nun lhäs. 18Wet is chik letshupyene elhpej tä iyhäj kaniyat tä iyejwethä lhamel tä tälhehen letetsel, häpkhilek lhamel hiw'enhomche honhat häp wichi. 19Häp tähesna lheyis:
“Judá kawichi kaniyat Caleb, Jefone lhäs.
20“Simeón kawichi kaniyat Samuel, Amihud lhäs.
21“Benjamín kawichi kaniyat Elidad, Quislón lhäs.
22“Dan kawichi kaniyat Buqui, Jogli lhäs.
23“José lhäs Manasés kawichi kaniyat Haniel, Efod lhäs, 24wet José lhäs Efraín kawichi kaniyat Kemuel, Siftán lhäs.
25“Zabulón kawichi kaniyat Elisafán, Parnac lhäs.
26“Isacar kawichi kaniyat Paltiel, Azán lhäs.
27“Aser kawichi kaniyat Ahihud, Selomi lhäs.
28“Neftalí kawichi kaniyat Pedahel, Amihud lhäs.”
29Häp hin'oltso tä Lhawuk ne'tek lhamel tä hiw'enhomche honhates häp Israel lhayis.
