Honhates tä Lhawuk ne'tek õhw'enho Leví lhayis
1Lhawuk tahuyej Moisés tä ihi honhat tä Moab lhip tä w'awulhchä tä tumej tewok Jordán lhip tä tatayhlä Jericó. Wet Lhawuk yok:
2–Fwenho Israel lhayis, Honhat chik häpek lewuk lhamel, is chik hiw'enho wichi tä tälhe letes Leví häp hupuy tä ihi yämthilek lhamel yen lewuka. Häte is chik hiw'enho honhates tä ilunej häp hupuy yämthilek leläy t'ekhawtes. 3Wet Leví lhayis yenla lew'etesa hupuytso, wet lew'et iche yämthilek hit'ekyenwethä leläy. 4Wet honhates chik õhw'enhihola yämthilek leläy t'ekhawtes, is chik cuatrocientos cincuenta (450) metros tä tälhe n'olafwek tä hupuy lep'ot. 5Tä mälhyejtso, novecientos (900) metros tä pitaj, lhäy'e tä tsajo, häp lhip tä tumej hichä, lhäy'e tä tumej kaphä, lhäy'e tä tumej tafwojhiye, lhäy'e tä tumej tapinhiye. Wet hupuy ihi t'at lechowej.
6“Wet hupuy chik õhw'enhihola Leví lhayis, seis hupuy tä häpkhila n'oletnhawtes, häpkhilek elh chik häpek ilän elh ilethane. Häte is chik õhp'ajtej cuarenta y dos hupuy lhayis. 7Tä mälhyejtso, nilhok hupuy tä õhw'enhihola Leví lhayis, cuarenta y ocho, lhäy'e honhates tä ichewhäye yämthilek leläy t'ekhawtes. 8Wet chik Israel lhayis hiw'enho hupuy tä ihi lhamel laka honhat häp Leví lhayis, is chik wichi tä tälhehen letetsel tä ihi once hiw'enho lhip honhat tä õtajej tä õhw'enho. Wichi chik wujpe, is chik yäm nitäkw hupuy chik hiw'enho Leví lhayis. Wet wichi chik niwuja'pe, is chik nintäkwa hupuy chik hiw'enho Leví lhayis.”
Hupuy tä n'oletnhawtes
9Lhawuk tahuyej Moisés tä yok:
10–Fwenho Israel lhayis olhämetna, oyok, “Chik amel lhistho tewok Jordán wet letiyäjayho honhat tä Canaán, 11is chik lekalelhät hupuy tä lhen n'oletnhawtesa. Häpkhilek elh chik nhanahläk ilän elh ilethane, 12wet hin'o tä lepuhfwa häp elh tä y'il tek isakanej tä t'uhläk ilän tä kamaj õknitetshana letes. 13Lekalelhthila seis hupuy, 14is chik tres ihi tewok Jordán lhipna tä tumej hichä, wet iyhäj tres is chik i'ufwey tä ihi Canaán. 15Seis hupuyna häpkhihena n'oletnhawtes yämthilek elh chik nhanahläk ilän elh, ilethane t'at, häp elh tä Israel wok tej chik kahäpeya, wok elh chik takasit ayej amejen.
Hin'o tä n'olhikoy
16“Chik hin'o y'ajej chinaj elh wet y'il, n'olhikoy t'at, iwohiyet'ak õkniläna. 17Wet chik hin'o inhäpäjej tunte häp elh wet y'il, n'olhikoy t'at, iwohiyet'ak õkniläna. 18Wet chik hin'o y'ajej hal'ä elh wet y'il, n'olhikoy t'at, iwohiyet'ak õkniläna. 19Hin'o tä lepuhfwa elh tä õ'län, is chik lham t'at tä ilän lepuhfwa lhikoy chik hiw'en.
20“Wet elh chik n'äyiho elh wet tafwomej, wok ithatej m'ak chik häpe yämthilek lewit'äyhyaj ihi wet y'il, 21wok yen tayhfwaya elh wet inhäpäjlhi elh wet y'il, hin'otso iwohiyet'ak õkniläna tsi n'olhikoy t'at. Hin'o tä lepuhfwa elh tä õ'län, is chik lham t'at tä ilän lepuhfwa lhikoy chik hiw'en.
Hin'o tä nhanahläk ilän elh
22“Mat chik hin'o nhanahläk tafwomej elh, tsi yenhit'a tayhfwaya, wok tajej m'ak chik tafwomej, mat häpkhit'ak lenech'ethayaj, 23wok tafwomej tunte wet tajej elh wet y'il, mat häpkhit'ak lhaletayhfwas wet yenhit'a tichunhayaja yämthilek iwit'äyen elh, 24tä mälhyejtso, is chik wichi itetshan elh tä y'il lewit'äyhyaj. Häte is chik itetshan m'ak tä is chik iwoye lepuhfwa tä t'uhläk iwo lahaya elh tä õ'län, mälhyej tä n'olesaynhayna ne'tek wichi iwoye. 25Is chik wichi t'uye hin'o tä elh t'uhläk ilän, wet ifwenho tä is chik yäple hupuy tä n'oletnhawet tä pajche ilethane. Wet hin'otso is chik ihi t'at pajla'tha y'il Sacerdote tä Lhamya.
26“Mat chik yikch'oye hupuy tä n'oletnhawet, 27wet hin'o tä lepuhfwa elh tä y'il, chik hiw'en wet ilän, letes ihihit'a, tsi häp tä yikch'oye hupuy tä n'oletnhawet. 28Tä mälhyejtso, elh chik ilän elh iwohiyet'ak newahi hupuy tä n'oletnhawet, pajla'tha y'il Sacerdote tä Lhamya. Wet nech'e is tä yäple laka honhat.
29“Häp täjtso olhämet tä kalelhäj tä one'tek amel lewoyaye, honhat at chik häpek lheyayhi, pajla'tha nichäte ales tä lepes lheley.
30“Chik hin'o yen tayhfwaya elh wet ilän, iwohiyet'ak õkniläna n'olhikoytso. Mat tajlhama chik nitäkw iyhäj tä hiw'enej wet yäme tä kalelhäj tä ilän elh, häp tä t'uhawetej chik õ'län. Chik tefwajni hin'o tä yäme m'ak tä n'olhikoy iwoye, laha ihihit'a lhämet yämthilek õ'län häp n'olhikoy.
31“Häte isit'ak õtchumlä laka chinaj t'äj hin'o chik t'uhläk tiskanpe n'olhikoy yämthilek õ'täyhat letes. Tsi iwohiyet'ak õkniläna.
32“Isit'ak õtchumlä chinaj t'äj tä õtiskanejpe n'olhikoy tä ihi hupuy tä pajche ilethane, yämthilek inuphä wet yäple lew'et tä kamaj n'ila Sacerdote tä Lhamya.
33“Isit'ak honhat tä lheyayhihila kok'ayeje n'olänyajay. Tsi hin'o tä n'olänek lew'oyis tä tamenej honhat tä lakokhayaj ihi. Häp w'oyistso hich'oyhat honhat, wet tek isiyeja w'oyis tä nitsäype. Tajlhamat chik häpe t'at hin'o tä itsäyhchä w'oyis, lham lew'oyis häp tä honhat isej. 34Yej känchila honhat chik amel lhenla haw'eta. Häte olham oyenla ow'eta, tsi olham oihi t'at Israel lhayis wet Olewuk t'at lhamel.”
