1Iche wichi tä tälhe letes tä lhey Galaad. Galaad lajcha p'ante lhey Maquir, wet Maquir lechäti lhey Manasés tä häpe t'at José lhäs p'ante. Wet wichitso lhamel laka niyatey ihoye Moisés lhäy'e Israel lhayis iyhäj kaniyatey. Tä nichäte, wet tahuyej lhamel tä yok:
2–Lhawuk ne'tek am Moisés lewo sorteaya honhates tä lew'enhomche Israel lhayis, häp honhat chik õtajejpej iyhäj chik häpe. Häte ne'tek lew'enho honhat tä lewuk olhamel opuhfwa Zelofehad häp leles tsinhay.3Mat chik lhamel tawhayeyhen wet iyejwethä hin'ol tä tälhe Israel lhayis tä tälhehen letetsel iyhäj, häp honhat tä lewuk lhamel nemla lewuhuy olhamel, mat nech'e lewukla t'at häp wichi tä lhamel iyej. Wet chik mälhyejtso, õ'so n'oyejen lhip honhat tä olewuhuy. 4Wet chik nichäthiyela nekchäm tä õyachaje wichi m'ak tä pajche lewuk lhamel, honhat tä lewuk atsinhay nech'e kalelhäj tä lewukla t'at häp wichi iyhäj, wet nemhit lewuk olhamel.
5Tä mälhyejtso, Moisés ifwenho Israel lhayis häp Lhawuk lhämetna tä yok:
–Häp José kawichi kaniyatey matche t'at lhämet. 6Lhawuk iwahnej t'at chik Zelofehad les tsinhay yen ch'efwasa hin'ol tä lhamel ihumin. Mat is chik häpe t'at lhamel tä lhaiyhäj tä iyej, tä häpe t'at lajcha puhfwas. 7Häp honhat tä lewuhuy Israel lhayis, isit'ak õy'ayhte iyhäj Israel lhayis tä letes w'enha lhamej. Nilhokej Israel lhayis is chik t'amajej laka honhat wet iyej t'at iyhäj tä iyej. 8Atsinha chik häpek iyej iyhäj wet laka honhat ihi, is chik yen ch'efwaya hin'o tä tälhe t'at lhamel letes, häpkhilek elhpej Israel nittäya laka honhat tä tälhe lajcha. 9Isit'ak elhpej y'ayhte iyhäj häp honhat tä lewuk. Wet Israel lhayis tä tälhehen letetsel, is chik lhamel t'amajej laka honhates tä õhw'enhomche wet iyej t'at iyhäj tä iyej.
10-12Tä mälhyejtso, Zelofehad les tsinhay tä lheyis Mahla, Tirsa, Hogla, Milca, lhäy'e Noa, lhamel iwoye Lhawuk lhämet tä ifwenho Moisés. Wet lhamel yen ch'efwasa hin'ol tä lewithohoy leles tä tälhe letes Manasés tä José lhäs. Wet tä mälhyejtso, laka honhat iyej t'at wichi tä tälhe letes tä lajcha tälhe.
13Häp tähestso Lhawuk lhämtes lhäy'e lechufwenyajay tä ifwenho Moisés yämthilek Israel lhayis iwoye, tä lhamel kamaj ihi p'ante honhat tä Moab lhip tä w'awulhchä tä tumej tewok Jordán lhip tä tatayhlä hupuy tä Jericó.
