Fil 1

₁Amtena ipuhfwas tä lheyayhi hupuy tä Filipos, häp amel tä ahäpehen Dios leles tä lep'akayej Cristo Jesús. Olham Pablo lhäy'e Timoteo, Jesucristo lakawos n'ohen, ochene olhämetna nilhokej amel, lhäy'e aka líderes, lhäy'e lech'otfwas. ₂Is chik Dios Lhajcha lhäy'e Lhawuk Jesucristo iti amejen lep'altsenyaj lhäy'e atamsek.

₃Tä otichunpej amchehen, owo graciasayej oka Dios, ₄wet tä owopej ot'alhyaja'pe nilhokej amel, wuj tä okäjyaj ihi. ₅Tsi y'alhaip'ajtejwek Dios Silätyaj tä Is, tälhe ifwalahte nech'e oi'amejen yäk nämena. ₆Wet ohanej tä kalelhäj tä Dios, häp lham tä iwo tesa lechumet tä is tä i'amejen, tujlhahichela pajla'tha wak'alh, chik nichäte ifwala chik Cristo Jesús tapil alhoho.

₇Is alhoho otichunhayajay tä mälhyejentso, tsi wuj tä ohumin nilhokej amel. Tä oihi n'op'onthi, wok ifwalas tä olhaikhajyenpe Dios Silätyaj tä Is tä oyäme tä matche t'at, amel alep'ajtitay n'oyej tä Dios iti n'amejen lep'altsenyaj. ₈Wet Dios ihanej tä lhäy'e lhip tä otipej amejen ohumnhayaj tä tälho Cristo Jesús lehumnhayaj.

₉Oy'alhyen amehen Dios yämthilek lhäy'epej lhip lhäy'epej lhip ahumnhayaj, häpkhilek matche tä lehanej tä lhäm kalelhäj m'ak at chik häpe, ₁₀wet letshupyenepej m'ak tä is. Wet chik mälhhiyejatso m'ak chik lewoyaye, häpkhilek ts'ilak ahusey wet tek ihichela m'ak chik Cristo ayen tesayej chik tapil alhoho. ₁₁Mat Jesucristo tach'otla amehen yämthilek lewoyaye m'ayhay tä wuj tä isen, häpkhilek õ'wujyen wet õ'wunit häp Dios.

₁₂Ipuhfwas, ot'uhläk lehanayej, tej tä owit'äyhyaj in'oyej, mat is t'at, tsi lhäy'e lhip tä iwo n'äyija Dios Silätyaj tä Is. ₁₃Tsi nilhokej sip'äl tä t'uye niyat lew'et, lhäy'e nilhokej wichi iyhäj, ihanej tä ohänlhi Cristo, häp tä tamen n'oyej tä õhp'o n'ohi. ₁₄Wet wujpey lhapuhfwas, tä lhamel ihanej tä oihi n'op'onthi, lhamel lhaikhajyenej Lhawuk wet nemhit nowayhen, mat lhäy'e lhip tä t'otle t'unhen tä yen silätyaja Dios Silätyaj tä Is.

₁₅Iche iyhäj tä fwetaj yen lhämeta Cristo, mat t'äytenyaj t'at lhäy'e tä tatay n'ohlä. Mat häte iche iyhäj tä is alhoho letichunhayaj tä yen lhämeta Cristo. ₁₆Lhamelna iwoye tsi häp tä lehumnhayaj ihi wet ihanej tä oikana häpkhilek nittäya Dios Silätyaj tä Is. ₁₇Mat häp iyhäj tä oyämetso tä fwetaj iwoye lechumetna, lhamel t'uhläk õyen häpeya hin'ol tä isenpa. Mat iche m'ayhay tä tumchä tä ihiche lehusey, tsi lhamel iwatläk y'ayhattshi oteläythayaj tä oihi n'op'onthina. ₁₈Mat ¡ch'ääj, is t'at! Tsi chik is alhoho letichunhayaj wok ni'isa alhoho, mat tä lhamel yen lhämeta Cristo, häp tä okäjejlhi.

Wet äp okäjyaj ihlat n'oyej, ₁₉tsi ohanej tä häpkhilek otfway, häp tä oisej amel alhyajay lhäy'e lech'otyaj tä tälhe Jesucristo laka Espíritu. ₂₀Wet oläte otichunhayaj tä oniwhayaj ihi tä ihichet'ala m'ak at chik häpe chik oyen n'äfwlhiya lhamej. Mat owatläk lhiphiyet'a tä olhaikhajyen, yämthilek ifwalana lhäy'e nilhokej ifwalas on'älit Cristo lewujyaj, tej chik oläy wok oy'il. ₂₁Tsi olham ow'atshancheyaj häpe t'at Cristo, wet chik oy'il, häp tä lhäy'e lhip tä oisej. ₂₂Mat chik kamaj ot'isan iläy, otujlhahichela t'at tä otch'ote Lhawuk lechumet yämthilek wichi isej.

Tä mälhyejtso, ¿atsi m'ak tä owoye? Ohanhiyejt'a. ₂₃Tsi täkwfwas m'ayhayna oihi lechowej, wet hätet iwoyek itonlhin'o. Tsi ot'uhläk oleyej honhat wet oiyej Cristo, täjtso lhäy'e lhip tä is. ₂₄Mat oyok, Nem koyhyaj tä laha ihi chik kamaj oi'ayej honhatena, yämthilek amel aisej.

₂₅Wet mälhhiyejattso, kalelhäj t'at otichunhayaj, ohanej tä kamaj olehiyejt'ala honhat, mat oihla amejen nilhokej amel yämthilek lhäy'e lhip akäjyaj tä ekhahyaj yiklhaphä. ₂₆Wet chik mälhhiyejatso, chik yachajo tä oho amehen, nemlat koyhyaj chik akäswethä n'oyej tä y'ap'akej Cristo Jesús.

₂₇Iche m'ak tä onityen amejen, oyok, Häp m'akpej tä lewoyaye, is chik yiwetej m'ak tä Cristo lhämet ne'tek lewoyaye. Chik mälhyejtso, chik oho amehen wet ow'en atapehen, wok n'am ho amehen p'iya, mat otoynhila amehen tä letujlhache wet alew'awlhatejchä ahusey, wet letach'ot amehen tä alep'ajtejwek tä lewoyay aka'tshayaja'pe lhat'ekhahyaj tä tälhe Dios Silätyaj tä Is, ₂₈wet letihiyejt'a anowayhyaj m'ak at chik häpe tä tälhe atayhfwas. Chik lewoye täjtso, ikalelhtej tä lhamel nofwila wet amel letafwayhenla, häp tä aisej Dios lechumet tä iwoyej amehen. ₂₉Tsi tajlhamhiyet'a tä Dios iwahin amejen tä let'ekhayaye Cristo, mat häte iwahin amejen tä lewoyay ateläythayaja'pe häp Cristo. ₃₀Tsi w'enhahit'a lhamej lhaka'tshayaj tä y'awoye, häp oka'tshayaj tä lew'enay tä ihte n'oyej, wet letoynej n'oye tä kamaj tatäyhit'a n'oyej.