Prov 22

₁Chik wichi yäm n'oye tä ois,

häp tä wuj tä laha ihi,

inu'pe okäywet tä wuj.

₂Hin'o tä hiw'en m'ayek,

Lhawuk t'at tä yenlhi,

hätet iwoye hin'o tä niw'ena m'ayek.

₃Elh tä hin'olhi ihanlä

lewit'äyhyaj wet lhaiskat.

Mat häp elh tä nihn'oyalhi

tujlhache t'at m'ak tä iwoye,

pajtha lewit'äyhyaj ihi.

₄Elh tä lhaknichäjalhi,

wet ihumin Lhawuk wet iwoye lhämtes,

lakaha häpe t'at lakäywet,

lhäy'e len'ohyaj, lhäy'e lew'atshancheyaj.

₅Hin'o tä ni'isa,

lewit'äyhyaj tälhe t'at m'ak tä iwoye.

Mat häp hin'o tä t'amaj lhamej

lhaitontehlä tähestso.

₆Chufwenej m'ak tä is

häp han'äfwaj yämthilek iwoye,

häpkhilek chik nichäte tä thaläkw, ilehiyejt'ala.

₇Wichi tä p'elitses,

hin'ol tä hiw'en m'ayek lakawos t'at.

Wet elh tä tacheyjänej elh kachinaj t'äj,

hin'o tä iwo lecheyjänhata lakawo t'at.

₈Elh tä yenlhi m'ak tä ni'isa

ikalhihila lewit'äyhyaj.

Õ'tasnhila wet tatäy.

₉Elh tä hip'altsen iyhäj,

Dios lakäpfwayaj ihiyeja,

tsi hiw'enho lhäk

iyhäj tä m'ak niw'ena.

₁₀Hin'o tä aläkwyhantsaj

is chik lechen wet yik,

häpkhilek noj n'olhäkleyhyaj,

wet nemla iche iyhäj tä iyet lhamehen,

wet ileyej tä lhailäkwethä.

₁₁Niyat ihumin hin'o tä lehusek ihi

lhäy'e tä lhämtes isen.

₁₂Lhawuk t'uye hin'ol tä lehusey ihi,

wet itäyhat akantses lhämtes tä iwoye.

₁₃Hin'o tä n'etäjlhi yok:

“¡Hay'äj tä ilunlhi!

¡Op'itsek ihihilat n'äyij!”

₁₄Atsinha tä lakain'oyaj ihi,

lak'aj hätet iwoye chowej tä pitoj.

Wet hin'ol tä Lhawuk itiyej lewäk,

lhamel nichäthiyela.

₁₅Mamses lakey tä tektshanwethä

tälho t'at lhamel letichunhayaj.

Mat is chik õ'tasin lhamel häpkhilek ileyej.

₁₆Hin'o tä t'uhläk hiw'en m'ayek,

wet ilänej lechumet elh tä p'elitsaj,

hiw'enhit'ala m'ayek.

Wet elh tä iwo t'awayhata

hin'o tä hiw'en m'ayek,

lhamtej p'elitsajila, m'ak hiw'enhit'ala.

₁₇Ch'ahuye lhämtes häp ahantses,

wet tihi ahusek m'ak tä ochufwen amej.

₁₈Wuj tä is chik let'amajeji ahusek

wet lhenpej ämeta.

₁₉Ohanhat amej ifwalana,

häpkhilek letiyej ekhahyaj häp Lhawuk.

₂₀Olesayen treinta olhämtes

tä n'ohanyaj ihi yämthilek aisej.

₂₁Wet otäfwnhat amej m'ak tä matche,

häpkhilek lehanej chik lechulho

elh chik tay'ätshan ame.

₂₂Yej t'etane m'ak tä lewuk

aelh tä p'elitsaj, tsi p'elitsaj t'at.

Wet yej häne n'okalelhthayajwos

häp elh tä newache m'ak chik isej.

₂₃Tsi Lhawuk tach'othiyela,

wet lhamlak itiyej lelhakli

häp iyhäj tä ilhaklit elh tä p'elitsaj.

₂₄Yej lhekche iyhäj tä fwitses wet awäkyhatses,

₂₅tsi elat leten lhamel lakeyis

wet letamen amej.

₂₆Chik elh iwo laka pi'äya,

yej alelhuhyenej.

₂₇Tsi chik kaw'ena laha chik letiskanpe,

õ'sohla amej amäwet.

₂₈Yej t'ayhattshi tuntey tä achätilis

pajche itihi p'ante línea

tä lepes laka honhat.

₂₉Elh tä yäm is lechumet tä iwoye,

niyatey yenla lakawoya,

wet häpkhit'a wichi tä

w'et m'ayhay t'at chik lakawo.