Salmo|Sal 105

₁W'enho gracias häp Lhawuk wet änch'oye.

Fwenho wichi tä i'pe honhat

häp m'ak tä lham iwoye.

₂Ten atenkay tä lewujyenej.

Enpej ämeta m'ayhay tä ischehen tä iwoye.

₃Awujyenejen häp lhey tä t'amajchet.

Käsyenwethä ahusey,

amel tä let'ukwe Lhawuk.

₄Hoye Lhawuk tä lakhajyhayaj ihi,

ukwepej nilhokej ifwalas.

₅Tichunche m'ayhay tä isen

tä lham yenlhi p'ante,

lhäy'e lhämtes tä iwoyeje wichi.

₆Amel ahäpehen lakawo Abraham leles tä lepes lheley,

wet ahäpehen Jacob leles tä lham tatshupiye.

₇Lham häpe Lhawuk Dios,

wet niyatej imälhewek honhat.

₈Wet tek hip'ethathilahlä

lhämet tä iwoye p'ante,

pajla'tha nichäte lepes lheley.

₉Häpe t'at lhämet tä iwoyeje p'ante Abraham

lhäy'e tä hit'untejche p'ante Isaac,

₁₀wet äp hit'unhatche tä ifwenho p'ante Jacob

häp lhämet tä lhamya,

häp lhämet tä nittäya

tä ifwenho Israel tä yok:

₁₁“Ow'enla amhohen honhat tä Canaán

yämthilek lewuk amel.”

₁₂Tej tä niwuja'pe lhamel,

lhimphaj tä ihi honhat tä kalew'eta,

₁₃wet ihoyehen wichi iyhäj laka honhates

wet iyejpej niyat tä w'enha lhamej,

₁₄Dios t'uyehen wet nehit katsik iwo lewit'äyhyaja.

Wet ifwenho niyatey tä yok:

₁₅“Yej wo m'akayej oka wichi tä ottshupiye,

wet amajej oka profetas.”

₁₆Lhawuk ichene nehläs

häp lhamel laka honhat,

itäyhat nilhokej m'ak tä n'olhäk.

₁₇Mat ichunkatlä lhamel häp José,

häp hin'o tä õ'wom hätet iwoyek n'okwenek.

₁₈Õyäytejlhi chinhas wet õ'thatho n'op'onthi,

wet takäläy hiy'esen tä õyäytej cadenas,

₁₉pajtha nichäte ifwala tä lhayäm matche

m'ak p'ante José yäme,

wet m'ak p'ante Lhawuk yäme

wak'alhej t'at häp José.

₂₀Wet häp tä rey tä niyatej wujpe wichi,

ne'tek õ'leyej tä õhp'ohi.

₂₁Wet yen niyatayej lham lew'et

lhäy'e nilhok lakäywet,

₂₂wet ichufwenejen hin'ol tä len'ohyajay ihi,

lhäy'e hin'ol tä thänhäy,

yämthilek häpehen hin'ol tä ihanche m'akejen.

₂₃Tä paj p'ante, näm Israel tä häpe Jacob

wet yen lew'eta Egipto,

häp honhat tä kalew'eta.

₂₄Wet Dios yäm wujpey lhamel wet äp takhajayhen,

inu'pe wichi tä lew'et Egipto.

₂₅Mat Dios ne'tek Egipto lheley

n'äyiho häp lham laka wichina

wet itiyej t'akanyaj häp Dios lakawos.

₂₆Wet Dios ichen lakawo Moisés,

lhäy'e Aarón tä lham tatshupiye.

₂₇Wet lhamel yenlhi Dios letetnhay

lhäy'e m'ayhay tä wichi iseltejen tä ihi Egipto.

₂₈Dios ichen honataj

tä hip'o'pe Egipto tä lhamya,

mat Egipto lheley iwohiyet'a

Dios lhämet tä ifwenho.

₂₉Dios iwelanhat w'oyisa häp tewok lhayis,

wet y'inhen w'ahat lhayis tä ihiche.

₃₀Wet ichene päy'i lhayis tä tapoyej honhat,

wet y'aje rey lewukwe tä tiyäjchufwi.

₃₁Wet Dios yok:

“Is chik iche wujpe lakas lhayis

lhäy'e yaphin'a tä wuj,

wet tapoyejej honhat tä Egipto.”

₃₂Wet tä iwomchä, tajlhamat kalatu

lhäy'e lep lhayis tä hätet iwoye itäj tä taji honhat.

₃₃Wet iwasthiche uvas tä ihiche n'olafwey, lhäy'e higos,

wet hal'äy tä ihi Egipto wasiche.

₃₄Wet Dios yok:

“Is chik näm chol tä wuj.”

Wet näm t'at chol tä lhäy'e lhip tä wuj,

₃₅wet itäyhat hal'äy tä i'pe honhat,

lhäy'e yachuyaj.

₃₆Häte Dios ne'tek ángel ilänhen

Egipto lheley leles tä lechunkatshay.

₃₇Wet itonphä laka wichi,

wet ichäj wuj oro lhäy'e plata,

wet ihichet'a elh chik häpek t'inhayaj ilän.

₃₈Wet Egipto lheley akäjejlhi tä hiw'en tä yikhen,

tsi wuj tä lenowayhyaj ihi lhamel.

₃₉Wet Dios iwo puleya wet i'pe lhamel,

wet tä honatsi iche itäj tä y'uho

wet hin'älitpe lhamel.

₄₀Lhamel t'alhch'oye lhäk,

wet Dios ichene afwenchey tä lhey codornices.

Wet lhamel yipsejen n'olhäk tä tälh puleye.

₄₁Hich'esaj chenaj wet inät tälho,

hätet iwoye tewok tä inukwe honhat tä ts'anis.

₄₂Tsi Dios nitichunche lhämet tä t'amajchet

tä ifwenho p'ante lakawo Abraham.

₄₃Mälhyejtso tä Dios itonphä p'ante

laka wichi tä lham tatshupiye,

wet lhamel t'änhen tä lakäjyaj ihi.

₄₄Wet hiw'enhomche honhates

tä pajche lewuhuy wichi tä w'enha lhamej,

lhäy'e yachuyaj lhay tä ihiche lew'etes.

₄₅Wet ne'tek laka wichi t'amajej lhämtes

wet iwoye nilhokej m'ak tä ichufwenejen.

¡Lewujyaj ihi Lhawuk!