Salmo|Sal 48

₁Lewujyaj ihi Lhawuk Dios,

wet t'uhawetej tä wichi iwunit

tä ihi lham laka hupuy

lhäy'e lew'et tä häpe chenaj tä t'amajchet.

₂Matche tä isilataj wet atojphä

häp chenajtso tä Sión tä tumej tafwojhiye.

Imälhewek wichi tä ihi honhat tä lhamel akäjejlhi,

wet häpe hupuy tä Lewuk Niyat tä Lhamya.

₃Dios ihi t'at hupuy tä takhajayhen tä ihi Jerusalén,

wet lhayen häpeya n'oletnhawet tä takhajay.

₄Tsi tä lhaihutwek niyatey

tä fwetaj inuye hupuyna,

₅mat tä lhamel hiw'en,

lhäy'e lhip tä iseltejen,

wet yikhen tä nowayhen.

₆Lenowayhyaj ilänhen,

wet lhaits'ulhkatejchehen t'isan tä äytaj,

hätet iwoye atsinha tä takapuhtshan,

₇wet hätet iwoye barcos tä wus

tä yafwthitaj tä tälhche tä ifwala tälhche iwasthiche.

₈Häp m'ak tä pajche y'aläte, nech'e y'aw'en t'at

tä ihi lhaka Dios tä najit letumfwaya laka hupuy.

Lham ikhajyenla yämthilek tiyäj'attsiy

häp hupuyna tä lham t'at tä Lewuk.

₉Dios, tä olhamel oihi Haw'et tä Amajchet,

oyen tichunhayaja ahumnhayaj tä nittäya.

₁₀Dios, nilhokpe honhat tä wichi aiwunit,

mälhyej tä t'uhawet amej.

Lewoyepej m'ak tä is alhoho,

häp tä isej akhajyhayaj.

₁₁¡Is che iwo lakäjyaja chenaj tä Sión,

wet is che Judá laka wichi tiyäjejchephä lakäjyaj,

tsi is alhoho akalelhthayaj!

_12-13Lunayejlhi häp Sión,

yahin hupuy tä takhajayhen tä ihi.

Tetshan n'olafwek tä tuntey,

wet wo t'ufwahtesa lhipey

tä atoschephä tä takhajayhen.

En atichunhayaja nilhokej tähestso,

yämthilek lefwenhomche ales tä tatäy alhoho

₁₄tä mälhyej'attso lhaka Dios n'ilataj.

Lham häpe lhan'äyijwo

yämthilek tiyäj'attsiy.