Salmo|Sal 49

₁Lhokayej amel ch'ahuyaye täja,

nilhokej amel tä lheyayhi honhat,

₂hin'ol tä hiw'en m'ayek

lhäy'e iyhäj tä p'elitses,

häp wichi tä len'ohyajay ihiche

lhäy'e iyhäj tä laj len'ohyaja.

₃Oyämhiyela n'otäfwnhayaj tä matche

wet oy'ithatthila m'ak tä ihi ohusek.

₄Otch'ahuhiyela n'olhämet tä õyäme tä laha ihi,

wet oy'ajihila arpa

häpkhilek lepak yämhiyela m'ak tä häpe.

₅Tek onowayhla che näm ifwalas tä ni'isa,

che ilun n'oyej m'ak tä ni'isachehen

tä otayhfwas iwoyej n'oye.

₆Lhamel ichaye tä wuj lakäywet

wet lhaichäjejwethä m'ak tä hiw'en.

₇Mat ihichet'a elh che ihanej lhaiwoyneje

yämthilek lhaifwayhat,

wok tiskanejpe laka chinaj t'äj häp lew'atshancheyaj

yämthilek Dios ifwayhat.

₈Ihichet'a chinaj t'äj

yämthilek õ'chäjej hin'o lew'atshancheyaj

₉wet tafwayej n'ot'ilek wet nemla y'il.

₁₀Tsi y'aw'en tä nilhokej wichi y'inhen t'at,

lhamel tä nhana m'akejen

lhäy'e iyhäj tä ahantses,

wet nilhok lakäywet imälheyej iyhäj.

₁₁Tej tä lheyis iyej t'at laka honhates,

mat nemhit lewuk,

wet lew'et tä nittäyayej häpe t'at lep'itsekhi,

wet ihi yämthilek tiyäj'attsiy.

₁₂Hin'o, tej che hiw'en m'ayek, mat t'unhit'a,

y'il, hätet iwoye itshätäy tä y'inhen.

₁₃Häp täjtso lepes lhamel tä yok:

“Niwohit m'ak che tatäy n'oyej.”

Häp täjtso lepes lhamel tä lhaiwujyenhen.

₁₄Hätet iwoye tson'atas

tä õ'häne lew'et tä õ'länhen,

häp wichitso, t'ilek t'at tä lhayen lewoyayej

wet ihäne lep'itseyhayw'etes.

Wet che nichäte lewhäy,

wichi tä isen ikalhihila lhamel,

tsi nemla lakhajyhayaj ihi

wet lep'itseyhay lehis häpkhila lhamel lew'et.

₁₅Mat olham, Dios ifwayhthila n'oyej

häp n'ot'ilek lakhajyhayaj,

tsi lhamlak ichäjn'o.

₁₆Yej lhen alhakliya

tä akniteya iwoye elh tä hiw'en m'ayek

wet lhäy'epej lhip tä wuj lakäywet.

₁₇Tsi che y'il, ihanhiyejt'ala iwoyneje

yämthilek ichäj lhamche m'ak tä iyej.

Lakäywet yikhichet'ala

che lham ihoye lep'itsekw'et.

₁₈Tej che häpe elh tä lakäjyaj ihi tä kamaj iläy,

wet wichi iwujyen tä häpe elh tä hiw'en m'ayek,

₁₉mat nichäthiyela ifwala tä ileyej honhat,

wet hap'akhiyeja letetsel p'ante y'inhen,

wet nemla hiw'en isi.

₂₀Hin'o, tej che hiw'en m'ayek, mat t'unhit'a,

y'il, hätet iwoye itshätäy tä y'inhen.