Salmo|Sal 73

₁Matche tä Dios hip'altsen Israel,

häp lhamel tä lehusey isen.

₂Mat olham tatäy lhimphaj

wet okachu m'ak tä matche.

₃M'ak tä tamen n'oyej,

häp tä oy'äyteneje m'ak tä iyej

häp wichi tä ni'isahen wet äp lhaichäjwethä.

₄Lhamel yenhit'a tichunhayaja t'ilek,

tsi t'inhayaj ilänhihent'a häp lhamel.

₅Lhamel leteläythayaj ihiyejt'a,

tek häte iwoye wichi iyhäj.

Wet ihichet'a ifwalak õ'tasinwethä

che tet iwoye hin'ol iyhäj.

₆Wet häp tä tamenej tä lhaichäjwethä wet fwitses.

₇Tatelhoy inuyejchephä tä wuj tä yätajen,

wet lhäy'e lhip tä iwo huseya'pe

m'ayhay tä ni'isachehen.

₈Iläkwethä wichi iyhäj

wet iwoyeje lhämtes tä ni'isachehen.

Lhaichäjwethä wet iyetehen iyhäj.

₉Itayhtejlä lhämtes tä ni'isa

häp Dios tä ipuleye,

wet itiyej lhämtes tä ni'isachehen

häp wichi tä i'pe honhat.

₁₀Wet wichi ihumin lhamel wet yok:

“Ihichet'a m'ak che ni'isa che iyej lhamel.”

₁₁Wet wichi tä ni'isahentso yok:

“Dios ihanhiyejt'a m'ak tä y'awoye.

Häp lham tä wichi yäme tä N'owujtaj,

letäfwnhayaj ihihit'a.”

₁₂¡Lhek läte wichi tä ni'isa!

¡Lhamyaj t'at!

Lhamel letamsek ihi t'at,

wet lhäy'e lhip lakäywet tä ikalhi.

₁₃Matche tä lajit lahaya tä ofwetaj

n'am woye m'ak tä ni'isa

wet ot'amajej ohusek

wet olhay'ajiyet'a m'ayhay tä ni'isachehen.

₁₄Tsi nilhok lewhäy tä oteläythayaj in'oyej,

õ'tasinn'o nilhok ifwalas.

₁₅Che oten p'iya wichi tä ni'isahen lhämtes,

kalelhäj tä okanej t'at aka wichi.

₁₆Matche tä ot'uhläk ohanej täjtso,

mat wuj tä atha n'oho.

₁₇Mat tä ohochufwi Haw'et tä Amajchet,

nech'e häp tä ohanej m'ak tä lepesla lhamel.

₁₈Ow'en tä matche t'at tä letihi lew'et

yämthilek ichätyene lewit'äyhyaj.

₁₉M'ak tä lhamel nowaye itäyhthila,

wet nofwila'thahya.

₂₀Iwuk, che lenephä,

tet iwoye hin'o tä nephä tä imä,

wet lehämit lhamel,

tet iwoye n'ofwilhek, tatäy t'at.

₂₁Olham wujnaj tä ohusek laj lakäjyaja,

wet äytaj otichunhayaj.

₂₂Tsi ohäpenaj hin'o tä ch'isuk t'at

wet m'ak ohanhiyejt'a.

Otenaj at iwoye itshäwet

tä oihi tä letatache.

₂₃Matkat lepes ihichet'a tä oi'amej,

wet letsok otkwey tä ofwomkat.

₂₄Wet lechufwenpej n'oyej ämtes

yämthilek letachum n'ohlä

che oihi awujyaj ifwala che häpe.

₂₅Ihichet'a elh owuk tä ihi pule, ts'ilak am.

Che oi'amej, niwohit m'ak che otiyej okänyaj tä ihonhatena.

₂₆Ot'isan lhäy'e ow'atshancheyaj tatäy t'at,

mat Dios häpe okäywet tä nittäya

wet lham ilehiyejt'a tä itsok ohusek.

₂₇Ohanej tä wichi tä ile amej y'inhihena

wet letäyhthila iyhäj tä nit'ifwtiya amej.

₂₈Mat olham tä oiwhäye Dios, häp tä oisej.

Am, Iwuk Dios, ahäpe oletnhawet,

wet oyenla silätyaja

nilhokej m'ayhay tä lhenlhipej.