Hin'o yen letichunhayaja m'ayhay tä äyteschehen tä Dios iwoye p'ante
1Oyäm äytaji ochos tä ot'änch'oye Dios
yämthilek ilät n'oye.
2Ifwala tä ofwitajayaj in'oyej
ot'ukwe t'at häp Lhawuk,
wet tä honatsipej olehiyejt'a
tä otiyejphä otkweyey tä owo ot'alhyaja,
wet ohusek lakäjyaj ihihit'a.
3Tä ontichunch'oye Dios, otafwlhi t'at,
wuj otichunhayaj, wet olät lhame tä nemhit otkhajay.
4Dios, nahati ilänhit'an'o.
Wuj tä olhakli ihi
wet okalhihit'ak oyämlhi.
5Oyen tichunhayaja ifwalas
lhäy'e nekchämis tä tajyäme.
6Ontichunch'oye tä otenpej otenkay tä honatsipej.
Tä oti lhamhi täjtso
tä oyen tichunhayaja, wet oyok:
7“¿Elat lajit lepesa p'iya tä Lhawuk n'aiwom?
¿Elat nemhit n'ahip'altsenla?
8¿Elat noj p'iya lehumnhayaj?
¿Elat tatäy lhämtes tä pajche iwoyeje wichi?
9¿Elat hip'ethatlä lep'altsenyaj tä iwoyepej?
¿Elat matche tä lewäk ihi
wet nemhit iwo lep'altsenyaja?”
10M'ak tä äytaj tä oyen tichunhayaja
häpe t'at tä Dios tä N'owujtaj
nemhit tach'ot n'amehen,
tek häte iwoye ifwalas tä pajche.
11Ontichunhilach'oye m'ayhay
tä Lhawuk iselkatejente wichi
häp ifwalas tä pajchehen.
12Oyenla otichunhayaja nilhokej lechumtes
lhäy'e m'ayhay tä äyteschehen tä iwoye p'ante.
13Dios, achumtes tä lewoye
ahäpe t'at N'ot'amajchet.
Ihichet'a dios che w'awulh amhi.
14Ahäpe Dios tä yenlhi m'ayhay
tä leselkatejen wichi,
wet letäfwnhatej akhajyhayaj
häp lhamel tä i'pe honhat.
15Lefwayhat p'ante aka wichi Israel,
häp Jacob lhäy'e José lhamel leles tä lepes lheley,
häp tä isej akhajyhayaj tä wuj.
16Dios, tä lewomekitaj aiw'en p'ante,
noway ame wet tachettihi pajtha taj lech'oye.
17Wet pule lhayis itsäy honhate inät,
wet y'ip pelhay tä tumho pule,
wet lep lhayis n'älehi nilhok lhipey.
18Pelhay t'ajanlhi
tä tumho yafwthitaj tä äytaji,
wet lehutunejpe honhat häp aka lep lhayis,
wet honhat w'ahu, isichäthi honhat.
19Wet lewo p'ante len'äyija
wichi tä inukwe lewomekitaj,
wet lenukwe inät tä wuj
mat nehit katsik hiw'en han'äyhäy.
20Aka wichi p'ante tet iwoye tson'atas tä lhekchufwi,
häp tä isej Moisés lhäy'e Aarón.
