Salmo|Sal 78

₁Ahäpe oka wichi, ch'ahuyaye ochufwenyaj,

tetshan m'ak tä ofwel amho.

₂Otech'aynhiyeja m'ak chik häpe olhämtes.

Oyämhiyela m'ak tä nin'äla

tälhe lewhäy tä pajche.

₃M'ak tä y'aläte y'ahanej t'at,

wet lhajchalis ichufwente n'amejen.

₄Häte n'afwenhola lhales

lhäy'e iyhäj tä lepes lheley,

wet n'awunita häp Dios

wet n'ämejlhila lakhajyhayaj tä wuj,

lhäy'e m'ak tä yenlhipej tä wichi t'iseltejen.

₅Dios yenlhi p'ante lhämtes

wet hiw'enho Israel lhayis,

häp wichi tä tälhe letes p'ante Jacob,

yämthilek lhaichufwenejen wet yen lechumyaja.

Wet Dios ifwenho p'ante lhachätilis wet yok:

“Chufwenejena ales yämthilek

lhamel tä nekche len'äyij,

₆lhäy'e leles chik nech'e ihichehena, nitäfwelej,

wet häte lhamel ichufwenhiyejena leles.

₇Chik mälhhiyejatso, lhamel t'ekhahla n'oye,

wet tek hip'ethathilahlä m'ak tä oyenlhihte,

wet iwohiyela olhämtes.

₈Häpkhilek nihäteya iwoye

lechätilis p'ante kachuhantses

wet lehusey t'unhen,

wet häpehen p'ante wichi tä ilepej n'oyej.”

₉Häp Efraín lhayis

tä lelutses hal'äy ihi lhäy'e lech'ähal,

ifwala tä n'oka'tshayaj iche lhamel yikhen,

iwohit'a laka'tshayaja.

₁₀Lhamel tek imatitche lhämet

tä pajche hit'untejche Dios,

wet iwohiyet'a Dios lechufwenyajay.

₁₁Lhamel yenhit'a tichunhayaja

m'ayhay tä t'iseltejen tä Dios iwoye p'ante.

₁₂Häp lhamel lajchalis p'ante

Dios ipäyne p'ante m'ayhay tä t'iseltejen

tä ihi honhat tä Soan tä ihi Egipto.

₁₃Hich'esajche inät yämthilek

lhamel inukwe lech'o tä tamchäy,

wet inät hätet iwoye chenhas

chik õ'nukwe lechowej tä tataywek.

₁₄Wet tä ifwala pule tä ipelaj ichunlä lhamel,

wet tä honatsi puletso

nech'e hätet iwoye itäj tä y'uho.

₁₅Wet tä lhamel ihi ts'anis,

Dios hich'esaj chenaj

yämthilek wichi iyäyej

inät tä wuj tä tälho.

₁₆Wet inät tä Dios itälhtho chenaj iläfwelchehen,

hätet iwoye tewok lhayis.

₁₇Matkat lhamel kamaj iwoye t'at lech'isukyajay

wet tatayhlä p'ante Dios tä N'owujtaj

tä lhamel ihi ts'anis.

₁₈Wet lhamel yelhte Dios

wet itihiche lehusey tä yok:

“Chik matche chik Dios in'amejen,

is chik hiw'en n'amhohen m'ak chik y'atufw.”

₁₉Lhamel itayhtejlä lhämtes tä yok:

“¿Hä Dios ihanej iwoyneje

chik hiw'en n'amhohen lhalhäk

tä y'ehi honhat tä wichi newahina?

₂₀N'amel y'aw'en t'at tä Dios hich'esaj chenaj

wet inät tälho wet t'ulhpe honhat,

hätet iwoye tewok.

¿Mat hä ihanej iwoyneje

yämthilek hiw'en n'amhohen pan?

¿Hä ihanej iwoyneje

chik hiw'enhihola laka wichi

häp m'ak chik tufw?”

₂₁Tä Lhawuk iläte täjtso,

wuj tä lewäk ihi,

lefwitseyaj hätet iwoye itäj tä y'uho

wet tatäyhla Israel,

₂₂häp tä lhamel tek lechayaj iyeji Dios,

wet tek imatitche tä Dios tach'othiyela lhamel.

₂₃Matkat Dios tahuyej pule lhayis,

ne'tek ifwoyenche lepelis,

₂₄wet itsäype laka wichi häp maná,

häp n'olhäk tä tälh puleye

yämthilek lhamel tufw.

₂₅Wichi tufw t'at n'olhäk

tä häpe Dios lakawos tä pule lheley lhäk.

Wuj lhäk tä Dios hiw'enho lhamel.

₂₆Näm yafwthitaj,

Dios lakhajyhayaj ichäj alhoho

tä tälhche tä ifwala tälhche

lhäy'e tä tapinhiye.

_27-28Dios itsäype laka wichi

häp afwenchey tä lhäy'e lhip tä wujpey,

hätet iwoye holo tä iwhäye tewok.

Nitsäype lhip tä wichi ihi

yämthilek lhamel tufw.

₂₉Wet mälhyejtso tä Dios hiw'enho m'ak tä nichuyuhlä,

wet lhamel tufw yäk yipsejen.

₃₀Mat tej tä lhäk ihi t'at lak'aj,

kamaj iwatlä lhip.

₃₁Wet Dios lewäk nichätpe lhamel

wet ilänhen Israel kamamses tä takhajayhen.

₃₂Matkat tej tä Dios itiyej p'ante lewit'äyhyajtso,

mat yachajo tä lhamel iwoye m'ak tä ni'isa,

fwetaj tek matchehen m'ayhay tä Dios iselkatejen.

₃₃Häp tä tamenej tä Dios

itäyhat lew'atshancheyaj tä m'ak nitälhaye,

wet ichätyenpe lenowayhyaj wet y'inhen.

₃₄Wet tä Dios ilänhen iyhäj lhamel,

nech'e häp tä lhamel t'ukwe häp lham.

₃₅Lhamel yachajo tä nitichunch'oye Dios tä N'owujtaj

tä t'uyehen lhamel wet ifwayhthen.

₃₆Matkat lhamel iwoyeje lhämtes

tä akäschehen mat tek matchehen,

₃₇tsi isit'a lhamel lehusey

wet yen w'et m'ayeka Dios lhämet

tä pajche hit'untejche lhamel.

₃₈Mat Dios hap'altsentsaj,

itäyhtej m'ak tä ni'isa tä lhamel iwoye,

wet tek itäyhthen lhamel.

Wujpe lewhäy tä Dios itiyejpej kanhi lewäk

wet iwo lepesa.

₃₉Tsi yen tichunhayaja lhamel tä hin'ol t'at,

hätet iwoye yafwthi tä näm wet äp tatäy t'at.

₄₀Wujpe lewhäy tä lhamel ileyejpej Dios,

wet tä lhamel inukwe ts'anis ilhaklitlhi häp lham.

₄₁Yachajopej tä lhamel yelhte

häp Dios tä Israel T'amajchet,

wet iwatläk ihanej chik matche

chik iyej lhamel wet tach'ote.

Wet Dios lefwitajayaj iyeji täjtso.

₄₂Lhamel yenhit'a tichunhayaja lham lakhajyhayaj,

wet nemhit nitichunch'oye ifwala p'ante ifwayhtej letayhfwas

₄₃lhäy'e tä iwoye m'ak tä wus tä wichi t'iseltejen

tä ihi honhat tä Soan tä ihi Egipto.

₄₄Iwelanhat w'oyisa häp tewok lhayis

wet Egipto lheley ihanhiyejt'a chik iyäyej häp inät.

₄₅Wet äp ichätyenpe lhamel

häp lakas tä fwitses wet itshänhen wichi,

wet häte iche päy'i lhayis tä ikänchi m'ayhay.

₄₆Wet ichene chol häp yachuyaj lhayis

yämthilek tufw.

₄₇Häte iche kalatu lhäy'e fwiy'et

tä ikänchi higos

lhäy'e uvas tä ihi n'olafwey.

₄₈Wet leläy w'asetas lhäy'e tson'atas y'inhen

tä kalatu ilänhen lhäy'e tä pelhay t'ajanej.

₄₉Dios yen tesayej m'ak tä ni'isa

wet häp tä tamenej tä ichätyenpe lewäk.

Wet wuj tä lhamel lefwitajayaj ihi,

wet tähestso häpe t'at tä nichäte wet ilänhen lhamel.

₅₀Dios tach'anlhaye t'at lewäk

wet ilänejen t'inhayaj tä äytaj lhamel,

₅₁wet y'inhen nilhokej leles tä lechunkatshay.

₅₂Wet Dios itonphä laka wichi Israel,

hätet iwoye tson'atas tä lewuk yikchufwi,

wet ihänche honhat tä ts'anis.

₅₃Wet t'uye t'at yämthilek

lenowayhyaj newayej lhamel,

mat häp letayhfwas nofwej

tä lewomekitaj hip'o'pe lhamel.

₅₄Wet Dios ichätyene laka wichi

häp honhat tä t'amajchet,

wet ihäne chenhas tä pajche lham ikalhi.

₅₅Wet yokweschephä p'ante wichil iyhäj

tä ihi honhat tä Israel lhayis nekche,

wet laka honhates hiw'enhomche Israel lhayis,

häp lhamel tä tälhehen doce letetsel,

wet yen lhamel lew'etesa.

₅₆Matkat äp yachajo tä lhamel

iwäkwyhayen p'ante Dios tä N'owujtaj wet yelhte,

wet lhamel iwohiyet'a Dios lhämtes

tä ne'tek lhamel iwoye.

₅₇Tsi lhamel hätet iwoye lajchalis p'ante,

lhamel ileyejpej Dios

wet isit'a alhoho m'ak tä lhamel iwoye,

hätet iwoye lutsej hal'ä tä ni'isa.

₅₈Lhamel iwäkwyhayen Dios

tä lhamel yenlhi len'okhayajw'etes tä iti'pe chenhas.

Wet tä lhamel n'okwiyej lecheyälis,

wet matche tä iwäkwyhayen Dios

tä lhäy'e lhip tä nhumina

chik õhp'ajtejlhi m'ak chik häpe.

₅₉Tä Dios hiw'en m'ak tä laka wichi iwoynejetso,

wuj tä lewäk ihi wet iwom lhamel.

₆₀Wet lham yikch'oye p'ante

lew'et tä t'amajchet tä ihi Silo,

häp lew'et tä lham ihi tä iyej wichi.

₆₁Tach'anlhaye letayhfwas chik iti lhamej

häp Arca tä T'amajchet tä lhämtes ihi

tä yen tetnekayej lewujyaj lhäy'e lakhajyhayaj.

₆₂Matche tä wuj lewäk tä itiyej laka wichi,

wet yachaje letayhfwas yämthilek ilänhen.

₆₃Õhp'ohen mamses,

wet atsinha lhutshay tä t'uhläk yen lech'efwasa

wuj tä lefwitajayaj ihi.

₆₄Õ'länejen n'ofwajnhates häp sacerdotes,

wet atsinhay tä lech'efwas

õ'wahnhiyejt'ak tafwchehchä.

₆₅Mat Lhawuk nephä,

hätet iwoye hin'o tä n'om tä imä,

wok hätet iwoye nifwotaj elh

tä iwo laka'tshayaja tä w'oknaj tä iyä,

mat tä lew'ok nojphä lhaikhajyen,

₆₆wet ikalhi letayhfwas wet yokwes,

wet hin'äfwlhat pajtha tiyäj'attsiy.

₆₇Tälhe ifwalastso Lhawuk nemhit iwo yiya

wichi tä tälhe letes Efraín,

häp lhamel tä José leles tä lepes lheley.

₆₈Mat tatshupiye wichi tä tälhe letes Judá,

lhäy'e chenaj Sión, wet lhayen Lewuka.

₆₉Wet yenlhi Lew'et tä T'amajchet tä atojphä,

hätet iwoye pule,

wet yäm t'unhi yämthilek nittäya

pajla'tha tiyäj'attsiy,

hätet iwoye honhat tä ihit tä ihi.

₇₀Wet äp tatshupiye lakawo David

tä häpe tson'ataswo,

₇₁isoyej lechumet tä t'uye tson'atas

yämthilek t'uye lham laka wichi,

wet nech'e häpe tson'atas

tä häpehen Israel lhayis,

häp tä lewo.

₇₂Wet David t'uye t'at Dios laka wichi imälhewek lehusek,

wet lehanyaj ihi lhäy'e letäfwnhayaj

tä yenlhi m'ak at chik häpe.