“Yahin n'ohen tä ahäpe hap'altsentsaj”
1Dios, am tä let'u n'oyehen
tä ohäpehen aka wichi Israel,
wet lhekchufwi olhamel,
ohätet iwoye aläy tson'atas,
ch'ahu n'oyehen.
An'älit, am tä lhe'pe aniyatyaj
tä m'ayhay tä lhafwis ihi ichufwi.
2An'ältej wichi tä tälhe letes Efraín,
lhäy'e wichi tä tälhe letes Benjamín,
lhäy'e wichi tä tälhe letes Manasés.
Akhajyen wet fwayhat n'ohen.
3Dios, nachaj n'oyehen awujyaj,
mälhyej iwoye ifwalas tä pajche.
Yahin n'ohen tä ahäpe hap'altsentsaj,
wet otfwayhihena.
4Iwuk Dios tä lajit atumfwaya,
tä aka wichi iwo t'alhyaja ame,
¿atsihila ifwalak noj awäk?
5Hätet iwoyek lhen olhamel olhäka olhafwyhayaj
wet leyäyen at n'oyejen ottet'ilis.
6Lhen at otayhfwas läkwika olhamel,
wet t'ischey at n'oyejen.
7Dios tä lajit atumfwaya,
nachaj n'oyehen awujyaj,
mälhyej iwoye ifwalas tä pajche.
Yahin n'ohen tä ahäpe hap'altsentsaj,
wet otfwayhihena.
8Letonphä p'ante aka wichi tä tälho Egipto,
wet lhokwes wichi tä ihi honhatna
yämthilek letihi aka wichi.
9Letiyej kanhi m'ayhay tä pajche ihi,
wet aka wichi tapoyej häp honhat tä yen lew'eta.
10Niyatej imälhewek chenhas tä Judá,
wet hal'äy tä pino lhayis tä ihi Líbano,
lewuk t'at lhamel.
11Wet leniyatyaj y'ajpe honhat,
tälhe tewokitaj Éufrates
pajtha nichäte lewomekitaj
tä tumej lhip tä ifwala y'uy.
12Tä mälhyejtso,
¿chipte tä letach'anlhaye otayhfwas
yämthilek tiyäjo honhat
wet isoyej m'ak tä ihi?
13Hätet iwoye nitsaj lhayis tä fwitses
tä inukwe honhat tä yachuyaj ihi,
t'äsche wet tuj.
14Dios tä lajit atumfwaya, woye tä owoye,
is chik letapil n'oyehen.
Yahinchä n'oyejen tä lhe puleye,
en atichunhayaja aka wichina.
15Am t'at tä lhen p'ante aka wichiya olhamel
wet lekhajyen n'ohen.
16¡Tetshan otayhfwas wet tiyejen awäk lhamel!
¡Täyhthen lhamel tä ikänchi aka wichi wet itäyhat!
17Ch'otehen t'at häp wichi tä letatshupiye,
uyehen Israel lhayis tä lekhajyenhen p'ante.
18Chik mälhyejtso, nemla oyachajo
chik olhamel olehla amej.
W'en n'ohohen ow'atshancheyaj,
häpkhilek olhamel owo eya
wet owunit ame.
19Iwuk Dios tä lajit atumfwaya,
nachaj n'oyehen awujyaj,
mälhyej iwoye ifwalas tä pajche.
Yahin n'ohen tä ahäpe hap'altsentsaj,
wet otfwayhihena.
