Salmo|Sal 81

₁¡Wo akäjyajayej Dios wet ten atenkay,

tsi lham t'at tä häpe lhakhajyhayaj!

¡Fwitsenej tä let'änhen

tä akäjyaj iyeji häp Jacob laka Dios!

₂Ten atenkay wet aji arpa,

enlhi música tä isilataj.

₃Afwutche trompeta tä lechäte wel'a nech'ayek,

lhäy'e wel'a tapoyej tä häpe

ifwala tä n'okäjyaj tä wuj.

₄Tsi häp täjtso lhämet häp Jacob laka Dios

tä hiw'enho p'ante Israel lhayis

₅täjp'ante lham tatayhlä honhat tä Egipto.

Oläte n'opak tä n'am täfwelche tä yok:

₆“Osohte amejen alhuk tä i'pe afwapol

wet nemhit äytajte achumet.

₇Tä alhakli ihi wet let'än n'oye,

wet oaifwayhthen t'at.

Onchulh amhohen, otet iwoye

pelhay tä y'ip tä tumho pule.

Wet äp oyelhatte amehen

tä lhewhäye inätw'etes tä ihi Meriba,

yämthilek ow'en m'ak tä ahäpehen.

₈“Ch'ahu n'oye, amel tä ahäpe oka wichi,

wet tetshan olhämtes.

Wet che letach'ahu n'oye, Israel lhayis,

häp tä is.

₉Yej ti amhihen m'ak at che häpek lhen häpeya aka dios,

wet yej takhoschufwi yämthilek len'okwiyej.

₁₀Ohäpe Awuk Dios tä itonphä amel

tä lhehihte Egipto.

Ch'enhi ayhi, oaichunnhihena.

₁₁“Matkat oka wichi tach'ahuhit'a n'oye,

Israel iwohiyet'a olhämet.

₁₂Häp tä tamenej tä otch'anlhayeje t'at lehusey tä t'unhen,

wet iwoye t'at lhamel lenech'ethayajay.

₁₃“Che oka wichi tach'ahuhi n'oye

wet che iwohiye olhämtes,

₁₄mälhhiyejn'et che lefwilhek tä ikalhi letayhfwas,

wet olham otasnhin'e häp wichi

tä fwetaj tatayhlä lhamel.”

₁₅Che mälhyejtso, wichi tä n'äyiho Lhawuk,

lewit'äyhyaj häpe tä takhosche katsi tä nowayhen,

wet tek tafwayej lewit'äyhyaj pajtha tiyäj'attsiy.

₁₆Matkat Dios hiw'enhihon'e laka wichi

häp yachuyaj lhay tä wuj tä isen,

wet ichunnhiyejn'e akäyek tä ihi chenhas.”