Salmo|Sal 91

₁Hin'o tä ihi N'owujtaj tä laj letumfwaya t'uhyaj yok:

₂“Ahäpe oletnhawet wet owukwe tä takhajay.

Ahäpe oka Dios tä ot'ekhaye.”

₃Tsi lham aifwayhthiyeja chowalhnaj

lhäy'e t'akanyajay tä athahen,

lhäy'e n'otnhayaj tä n'ot'ilek.

₄Hip'ohiyeja atape lhafwis,

wet awit'äy ihit'ala amej chik lhechufwi.

Wet ilehit'ala amej wet t'uhla ame,

tehlat iwoye afwamthi.

₅Yej nowaych'oye m'ayhay tä tanhoch'ay tä nekche honatsi,

wok häp n'och'ähal tä õ'thatchetshi tä ifwala.

₆Yej nowaych'oye häp n'otnhayajay tä nekche honatsi,

wok häp n'ot'ilek tä nichätpe wichi tä ifwala.

₇Tejlak mil wichi y'inhen tä tumej hats'amkat,

wet tejlak diez mil y'inhen tä tumej afwomkat,

mat am ihichet'ala awit'äyhyaj.

₈Leyahnhiphäla wet atelhoy hiw'enla

wichi tä ni'isahen chik Dios iwo lahayayej

m'ak tä ni'isa tä iwoye.

₉Wet tä lhen aletnhaweta häp Lhawuk,

wet lhen hap'ota lham tä häpe N'owujtaj,

₁₀nämhit'ala ame m'ak at chik häpek ni'isa,

wet ihichet'ala n'otnhayaj

chik nichäte haw'et lheley.

₁₁Tsi lham ne'tehlak laka ángeles t'u ame,

honhat at chik häpek lehoye.

₁₂Lhehla'pe takweyey häpkhilek

kachäta'pe tunte chik häpe

wet laj awit'äyhyaja.

₁₃Tejlak lelunhilhi t'owalhas lhäy'e amlhätas,

lhäy'e m'ayhay tä fwitses,

mat tek awit'äy ihichela,

let'äslatpe lhamel.

₁₄Lhawuk yok:

“Olham ofwayhthila häp lhamel tä ihuminn'o.

Ot'uhiyela lhamel tsi nitäfwel n'oyej.

₁₅Wet häp tä chik lhamel t'än n'oye, onchulhihola,

wet chik lhamel lelhakli ihi, oihiyeja,

otihiyeja kanhi lelhakli

wet owujyenla lhamel.

₁₆Ow'enhihola lew'atshancheyaj tä pitaj

yämthilek yen lakäjyaja,

wet äp yenla lakäjyaja lefwayhyaj tä ow'enho.”