Salmo|Sal 97

₁¡Imälhewek honhat, wo akäjyaja,

lhäy'e lhiletas tä wujpey,

tsi Lhawuk häpe Rey!

₂Ihi t'at lechowej häp pule lhayis tä wuj,

wet m'ak tä matche lhäy'e m'ak tä is alhoho

häp tä ikhajyen leniyatyaj.

₃Itäj ichunlä wet hip'ohen letayhfwas tä ilunej.

₄Leleplehyaj ihutunpe honhat,

wet honhat w'ahuye tä hiw'en.

₅Chenhas wachuhiche tä ihi tä Lhawuk tatache,

häp lham tä imälhewek honhat tä Lewuk,

tet iwoye akäyek lhus tä wachuhi.

₆Pule yen silätyaja

tä Lhawuk häpe Elh tä is alhoho,

wet nilhokej wichi tä i'pe honhat

hiw'en t'at lewujyaj.

₇Häp wichi tä lhaiwujyenejen lecheyälis tä n'okwiyej,

lhamel len'äfwlhi ihi.

Nilhokej lhamel lhäy'e dios lhayis

t'upechehchä tä ihi tä Lhawuk tatache.

₈Iwuk, häp wichi tä lew'et Jerusalén,

lhäy'e iyhäj tä ihiche lew'etes tä ihi Judá,

lhamel iläte ämtes wet akäsejwethä.

₉Tsi am, Iwuk, ahäpe N'owujtaj

tä niyatej imälhewek honhat,

wet matche tä lenu'pe nilhokej dios lhayis.

₁₀Lhawuk ihumin häp lhamel tä n'äyiho m'ak tä ni'isa,

wet t'amajej lew'atshancheyaj häp laka wichi,

wet iwahnhiyejt'ak wichi tä ni'isahen iwit'äyen.

₁₁Tsi ihutunche'pe wichi tä isen

häpkhilek lakäjyajay ihi.

₁₂¡Wo akäjyajayej Lhawuk, amel tä aisen,

wet wunitay lhey tä t'amajchet!