Zac 5

₁Tä oyahinphä, wet iche elh ow'enek, ow'en n'olesaynekhi tä õ'käfwelche tä wey'ä. ₂Wet ángel tay'ätshen n'oye, yok:

–¿Atsi m'ak tä lew'eney?

Wet onchulho, oyok:

–Ow'eney n'olesaynekhi tä õ'käfwelche tä wey'ä, nueve metros tä pitaj, cuatro metros y medio tä tsajo.

₃Wet ángel yok:

–Häp m'ak tä ihi n'olesaynekhi häpe Lhawuk lhämet tä tatayejlä wichi tä iwoye m'ak tä ni'isa tä ihi honhatna. Ihi lhip tä tumphä lhäy'e tä tumchä. Elh che t'etan wok isitäyen Lhawuk lhey, õ'wit'äyenhila, õ'sohiyeja tä ihi honhat, mälhyej tä n'olesaynek yäme. ₄Lhawuk tä laj letumfwaya yok, “Ochen honhate olhämettso, häpkhilek iwit'äyen lewukwey etantses lhäy'e sitäwos, pajla'tha ihämthen. Nits'ilakhiyet che hal'ä wok tunte che imälhehi.”

₅Ángel tä yämlhi n'oho äp yok:

–Lhek äp yahinlä m'ak elh tä äp n'äl athana.

₆Oty'ätshene ángel, oyok:

–¿Atsi m'ak tä häpe?

Wet lham yok:

–Häpe lehi tä w'awulhej nilhokej wichi lech'isukyajay tä ihi honhatna.

₇Häp lep'ot chinaj mok, tä õ'fwoyenpe, iche atsinha tä tatayhiphä. ₈Wet ángel yok:

–Atsinhana häpe m'ak tä ni'isa.

Wet ihutho lehi wet hip'oyejpe lep'ot tä chinaj mok.

₉Tä oyahinphä, ow'eney täkwfwas atsinhay. Wet lhafwis ihi, tet iwoye pätsaj lhafwis, wet häp tä wey'ähen. Wet lhamel lhaithatejchä lehi wet ichäjtshi. ₁₀Oty'ätshene ángel tä yämlhi n'oho, oyok:

–¿Atsi lhip tä ichäje lehi?

₁₁Lham yok:

–Ichäje Babilonia wet yenhilhila hup. Che wak'alh, itihlachufwi häpkhilek wichi tä ihoye n'okwiyej.